Chapter 63

vaiśaṃpāyana uvāca |
avajitya dhanaṃ cāpi virāṭo vāhinīpatiḥ |
prāviśannagaraṃ hṛṣṭaścaturbhiḥ saha pāṇḍavaiḥ || 1 ||
[Analyze grammar]

jitvā trigartānsaṃgrāme gāścaivādāya kevalāḥ |
aśobhata mahārājaḥ saha pārthaiḥ śriyā vṛtaḥ || 2 ||
[Analyze grammar]

tamāsanagataṃ vīraṃ suhṛdāṃ prītivardhanam |
upatasthuḥ prakṛtayaḥ samastā brāhmaṇaiḥ saha || 3 ||
[Analyze grammar]

sabhājitaḥ sasainyastu pratinandyātha matsyarāṭ |
visarjayāmāsa tadā dvijāṃśca prakṛtīstathā || 4 ||
[Analyze grammar]

tataḥ sa rājā matsyānāṃ virāṭo vāhinīpatiḥ |
uttaraṃ paripapraccha kva yāta iti cābravīt || 5 ||
[Analyze grammar]

ācakhyustasya saṃhṛṣṭāḥ striyaḥ kanyāśca veśmani |
antaḥpuracarāścaiva kurubhirgodhanaṃ hṛtam || 6 ||
[Analyze grammar]

vijetumabhisaṃrabdha eka evātisāhasāt |
bṛhannaḍāsahāyaśca niryātaḥ pṛthivīṃjayaḥ || 7 ||
[Analyze grammar]

upayātānatirathāndroṇaṃ śāṃtanavaṃ kṛpam |
karṇaṃ duryodhanaṃ caiva droṇaputraṃ ca ṣaḍrathān || 8 ||
[Analyze grammar]

rājā virāṭo'tha bhṛśaṃ prataptaḥ śrutvā sutaṃ hyekarathena yātam |
bṛhannaḍāsārathimājivardhanaṃ provāca sarvānatha mantrimukhyān || 9 ||
[Analyze grammar]

sarvathā kuravaste hi ye cānye vasudhādhipāḥ |
trigartānnirjitāñśrutvā na sthāsyanti kadācana || 10 ||
[Analyze grammar]

tasmādgacchantu me yodhā balena mahatā vṛtāḥ |
uttarasya parīpsārthaṃ ye trigartairavikṣatāḥ || 11 ||
[Analyze grammar]

hayāṃśca nāgāṃśca rathāṃśca śīghraṃ padātisaṃghāṃśca tataḥ pravīrān |
prasthāpayāmāsa sutasya hetorvicitraśastrābharaṇopapannān || 12 ||
[Analyze grammar]

evaṃ sa rājā matsyānāṃ virāṭo'kṣauhiṇīpatiḥ |
vyādideśātha tāṃ kṣipraṃ vāhinīṃ caturaṅgiṇīm || 13 ||
[Analyze grammar]

kumāramāśu jānīta yadi jīvati vā na vā |
yasya yantā gataḥ ṣaṇḍho manye'haṃ na sa jīvati || 14 ||
[Analyze grammar]

tamabravīddharmarājaḥ prahasya virāṭamārtaṃ kurubhiḥ prataptam |
bṛhannaḍā sārathiścennarendra pare na neṣyanti tavādya gāstāḥ || 15 ||
[Analyze grammar]

sarvānmahīpānsahitānkurūṃśca tathaiva devāsurayakṣanāgān |
alaṃ vijetuṃ samare sutaste svanuṣṭhitaḥ sārathinā hi tena || 16 ||
[Analyze grammar]

athottareṇa prahitā dūtāste śīghragāminaḥ |
virāṭanagaraṃ prāpya jayamāvedayaṃstadā || 17 ||
[Analyze grammar]

rājñastataḥ samācakhyau mantrī vijayamuttamam |
parājayaṃ kurūṇāṃ cāpyupāyāntaṃ tathottaram || 18 ||
[Analyze grammar]

sarvā vinirjitā gāvaḥ kuravaśca parājitāḥ |
uttaraḥ saha sūtena kuśalī ca paraṃtapa || 19 ||
[Analyze grammar]

kaṅka uvāca |
diṣṭyā te nirjitā gāvaḥ kuravaśca parājitāḥ |
diṣṭyā te jīvitaḥ putraḥ śrūyate pārthivarṣabha || 20 ||
[Analyze grammar]

nādbhutaṃ tveva manye'haṃ yatte putro'jayatkurūn |
dhruva eva jayastasya yasya yantā bṛhannaḍā || 21 ||
[Analyze grammar]

vaiśaṃpāyana uvāca |
tato virāṭo nṛpatiḥ saṃprahṛṣṭatanūruhaḥ |
śrutvā tu vijayaṃ tasya kumārasyāmitaujasaḥ |
ācchādayitvā dūtāṃstānmantriṇaḥ so'bhyacodayat || 22 ||
[Analyze grammar]

rājamārgāḥ kriyantāṃ me patākābhiralaṃkṛtāḥ |
puṣpopahārairarcyantāṃ devatāścāpi sarvaśaḥ || 23 ||
[Analyze grammar]

kumārā yodhamukhyāśca gaṇikāśca svalaṃkṛtāḥ |
vāditrāṇi ca sarvāṇi pratyudyāntu sutaṃ mama || 24 ||
[Analyze grammar]

ghaṇṭāpaṇavakaḥ śīghraṃ mattamāruhya vāraṇam |
śṛṅgāṭakeṣu sarveṣu ākhyātu vijayaṃ mama || 25 ||
[Analyze grammar]

uttarā ca kumārībhirbahvībhirabhisaṃvṛtā |
śṛṅgāraveṣābharaṇā pratyudyātu bṛhannaḍām || 26 ||
[Analyze grammar]

śrutvā tu tadvacanaṃ pārthivasya sarve punaḥ svastikapāṇayaśca |
bheryaśca tūryāṇi ca vārijāśca veṣaiḥ parārdhyaiḥ pramadāḥ śubhāśca || 27 ||
[Analyze grammar]

tathaiva sūtāḥ saha māgadhaiśca nandīvādyāḥ paṇavāstūryavādyāḥ |
purādvirāṭasya mahābalasya pratyudyayuḥ putramanantavīryam || 28 ||
[Analyze grammar]

prasthāpya senāṃ kanyāśca gaṇikāśca svalaṃkṛtāḥ |
matsyarājo mahāprājñaḥ prahṛṣṭa idamabravīt |
akṣānāhara sairandhri kaṅka dyūtaṃ pravartatām || 29 ||
[Analyze grammar]

taṃ tathā vādinaṃ dṛṣṭvā pāṇḍavaḥ pratyabhāṣata |
na devitavyaṃ hṛṣṭena kitaveneti naḥ śrutam || 30 ||
[Analyze grammar]

na tvāmadya mudā yuktamahaṃ devitumutsahe |
priyaṃ tu te cikīrṣāmi vartatāṃ yadi manyase || 31 ||
[Analyze grammar]

virāṭa uvāca |
striyo gāvo hiraṇyaṃ ca yaccānyadvasu kiṃcana |
na me kiṃcittvayā rakṣyamantareṇāpi devitum || 32 ||
[Analyze grammar]

kaṅka uvāca |
kiṃ te dyūtena rājendra bahudoṣeṇa mānada |
devane bahavo doṣāstasmāttatparivarjayet || 33 ||
[Analyze grammar]

śrutaste yadi vā dṛṣṭaḥ pāṇḍavo vai yudhiṣṭhiraḥ |
sa rājyaṃ sumahatsphītaṃ bhrātṝṃśca tridaśopamān || 34 ||
[Analyze grammar]

dyūte hāritavānsarvaṃ tasmāddyūtaṃ na rocaye |
atha vā manyase rājandīvyāva yadi rocate || 35 ||
[Analyze grammar]

vaiśaṃpāyana uvāca |
pravartamāne dyūte tu matsyaḥ pāṇḍavamabravīt |
paśya putreṇa me yuddhe tādṛśāḥ kuravo jitāḥ || 36 ||
[Analyze grammar]

tato'bravīnmatsyarājaṃ dharmaputro yudhiṣṭhiraḥ |
bṛhannaḍā yasya yantā kathaṃ sa na vijeṣyati || 37 ||
[Analyze grammar]

ityuktaḥ kupito rājā matsyaḥ pāṇḍavamabravīt |
samaṃ putreṇa me ṣaṇḍhaṃ brahmabandho praśaṃsasi || 38 ||
[Analyze grammar]

vācyāvācyaṃ na jānīṣe nūnaṃ māmavamanyase |
bhīṣmadroṇamukhānsarvānkasmānna sa vijeṣyati || 39 ||
[Analyze grammar]

vayasyatvāttu te brahmannaparādhamimaṃ kṣame |
nedṛśaṃ te punarvācyaṃ yadi jīvitumicchasi || 40 ||
[Analyze grammar]

yudhiṣṭhira uvāca |
yatra droṇastathā bhīṣmo drauṇirvaikartanaḥ kṛpaḥ |
duryodhanaśca rājendra tathānye ca mahārathāḥ || 41 ||
[Analyze grammar]

marudgaṇaiḥ parivṛtaḥ sākṣādapi śatakratuḥ |
ko'nyo bṛhannaḍāyāstānpratiyudhyeta saṃgatān || 42 ||
[Analyze grammar]

virāṭa uvāca |
bahuśaḥ pratiṣiddho'si na ca vācaṃ niyacchasi |
niyantā cenna vidyeta na kaściddharmamācaret || 43 ||
[Analyze grammar]

vaiśaṃpāyana uvāca |
tataḥ prakupito rājā tamakṣeṇāhanadbhṛśam |
mukhe yudhiṣṭhiraṃ kopānnaivamityeva bhartsayan || 44 ||
[Analyze grammar]

balavatpratividdhasya nastaḥ śoṇitamāgamat |
tadaprāptaṃ mahīṃ pārthaḥ pāṇibhyāṃ pratyagṛhṇata || 45 ||
[Analyze grammar]

avaikṣata ca dharmātmā draupadīṃ pārśvataḥ sthitām |
sā veda tamabhiprāyaṃ bhartuścittavaśānugā || 46 ||
[Analyze grammar]

pūrayitvā ca sauvarṇaṃ pātraṃ kāṃsyamaninditā |
tacchoṇitaṃ pratyagṛhṇādyatprasusrāva pāṇḍavāt || 47 ||
[Analyze grammar]

athottaraḥ śubhairgandhairmālyaiśca vividhaistathā |
avakīryamāṇaḥ saṃhṛṣṭo nagaraṃ svairamāgamat || 48 ||
[Analyze grammar]

sabhājyamānaḥ pauraiśca strībhirjānapadaistathā |
āsādya bhavanadvāraṃ pitre sa pratyahārayat || 49 ||
[Analyze grammar]

tato dvāḥsthaḥ praviśyaiva virāṭamidamabravīt |
bṛhannaḍāsahāyaste putro dvāryuttaraḥ sthitaḥ || 50 ||
[Analyze grammar]

tato hṛṣṭo matsyarājaḥ kṣattāramidamabravīt |
praveśyatāmubhau tūrṇaṃ darśanepsurahaṃ tayoḥ || 51 ||
[Analyze grammar]

kṣattāraṃ kururājastu śanaiḥ karṇa upājapat |
uttaraḥ praviśatveko na praveśyā bṛhannaḍā || 52 ||
[Analyze grammar]

etasya hi mahābāho vratametatsamāhitam |
yo mamāṅge vraṇaṃ kuryācchoṇitaṃ vāpi darśayet |
anyatra saṃgrāmagatānna sa jīvedasaṃśayam || 53 ||
[Analyze grammar]

na mṛṣyādbhṛśasaṃkruddho māṃ dṛṣṭvaiva saśoṇitam |
virāṭamiha sāmātyaṃ hanyātsabalavāhanam || 54 ||
[Analyze grammar]