Chapter 234

śrīpuruṣottama uvāca |
śṛṇu nārāyaṇīśri tvaṃ śastradharakathāṃ tathā |
nāmnā vikhaṇḍalavarmā śastradhārī purā'bhavat || 1 ||
[Analyze grammar]

kṣattriyo nāndale grāme mahīnadītaṭe śubhe |
vanasthānāṃ kirātānāṃ caurāṇāṃ śāsako mahān || 2 ||
[Analyze grammar]

luṇṭakānāṃ śāsakaśca dhanurbāṇadharastathā |
pariṇītayugalānāṃ mārge nirbhayarakṣakaḥ || 3 ||
[Analyze grammar]

vivāhārthaṃ prayātānāṃ vāhinīnāṃ ca rakṣakaḥ |
vyāpāriṇāmanasāṃ ca trātā nāmadharo'bhitaḥ || 4 ||
[Analyze grammar]

śrutvā tannāma caurāśca prayānti dūrataḥ sadā |
evaṃ bhītipradaḥ śāstā śāsakānāṃ tu śāsakaḥ || 5 ||
[Analyze grammar]

kintu bhakto hi hṛdaye nītimārgamupāśritaḥ |
rakṣaṇena pradattaṃ yacchreṣṭhibhiḥ rājabhistathā || 6 ||
[Analyze grammar]

vetanaṃ tena mātreṇa nirvahatyeva nānyathā |
yāmyadūtasamo veṣe dayāyāṃ dharmavat sadā || 7 ||
[Analyze grammar]

rakṣaṇe rājavaccāpi nītimārge tu śukravat |
bṛhaspatisamo bodhe bhaktau ye garuḍo yathā || 8 ||
[Analyze grammar]

sarvasvārpaṇabhāvena vartate cātmavedanaḥ |
kintvanītiparāṃ vyaktiṃ prāpya daṇḍaṃ karoti saḥ || 9 ||
[Analyze grammar]

yathāyogyaṃ daṇḍayati naraṃ duṣṭaṃ śaṭhaṃ sadā |
śastraghātena vā cātiduṣṭaṃ hanti balena vai || 10 ||
[Analyze grammar]

evaṃ ghātādipāpaṃ ca bhavatyeveti taddhṛdi |
saṃkalpo jāyate nityaṃ pūjāyāṃ yācate kṣamām || 11 ||
[Analyze grammar]

prātaḥ snātvā mama mūrteḥ pūjāṃ ṣoḍaśavastubhiḥ |
kṛtvā nīrājanaṃ cānnaṃ miṣṭaṃ datvā nivedanam || 12 ||
[Analyze grammar]

jalaṃ datvā mukhavāsaṃ tāmbūlakaṃ tataḥ param |
śastraṃ madagre nikṣipya kṣamāṃ prayācate yathā || 13 ||
[Analyze grammar]

nā'haṃ krūro hiṃsakaśca nā'haṃ svārthī na lampaṭaḥ |
śastraṃ me mā bhaved duṣṭaṃ patitaṃ doṣavarjite || 14 ||
[Analyze grammar]

nayā'nvite ca bhakte cā'daṇḍye mā patitaṃ bhavet |
ajñānena na me śastraṃ doṣaspṛṣṭaṃ bhavet prabho || 15 ||
[Analyze grammar]

duṣṭānāṃ śāsane caitanmā parājayamāpnuyāt |
mā'haṃ pāpena lipyeya nītibahiḥpravartinā || 16 ||
[Analyze grammar]

evaṃ satyapi mānuṣyājñānavegena karhicit |
cedākrameta pāpaṃ vai mayi dīnāparādhataḥ || 17 ||
[Analyze grammar]

daṇḍyo'haṃ sarvathā kṛṣṇa kṣamyaścet kṣamyatāṃ tadā |
ityevaṃ mama bhakto'yaṃ khaṅgabāṇādi matpuraḥ || 18 ||
[Analyze grammar]

samarpya nityamāvakti tato bhuktvā prasādajam |
pītvā pādāmṛtaṃ yāti rakṣyarakṣaṇahetave || 19 ||
[Analyze grammar]

grāme vane khale vāṭyāṃ kṣetre rakṣati sarvathā |
rakṣyavastūni sarvāṇi vikhaṇḍalaḥ pramodavān || 20 ||
[Analyze grammar]

madhyāhne me nivedyā'nnaṃ prasādaṃ cā'tti sarvadā |
sāyaṃ sīmnaḥ samāgatya gṛhe karoti pūjanam || 21 ||
[Analyze grammar]

puṣpaṃ dhūpaṃ ca dīpaṃ ca naivedyaṃ jalamuttamam |
nīrājanaṃ stavanaṃ ca tāmbūlakaṃ sugandhi ca || 22 ||
[Analyze grammar]

mahyaṃ samarpya śastrāṇi nikṣipyāpi puro mama |
punaḥ prārthayate nityaṃ kṣamasvā'jñānajaṃ hyagham || 23 ||
[Analyze grammar]

tavā'smi tava dāso'smi tava bhakto'smi tāmasaḥ |
tava tādātmyamāpannastava śeṣo bhavāmyaham || 24 ||
[Analyze grammar]

evaṃ lakṣmi sadā mahyaṃ śastraṃ samarpya karma ca |
samarpyaiva śayane vai nidrāṃ karoti māṃ smaran || 25 ||
[Analyze grammar]

tasya bhāryā harasatīnāmnī prasevate ca tam |
mahābhaktā bālakṛṣṇe mayi śrīśanarāyaṇe || 26 ||
[Analyze grammar]

patyau nārāyagaṃ māṃ ca paśyatyeva na cetarat |
patimūrtau sarvasevāṃ karoti mayi saṃsthite || 27 ||
[Analyze grammar]

pratimāyāṃ pṛthak sevāṃ karoti svāmino mama |
snānaśṛṃgārabhūṣādi nīrājanaṃ subhojanam || 28 ||
[Analyze grammar]

pānaṃ tāmbūlakaṃ vāyudānaṃ dolā'bhidolanam |
gītikāṃ miṣṭakaṇṭhotthāṃ mama līlābharāṃ tathā || 29 ||
[Analyze grammar]

parihāraṃ ca nidrāyāḥ kīrtanaṃ prakaroti ca |
tato naijaṃ nityakāryaṃ nirvartayati bhāminī || 30 ||
[Analyze grammar]

evaṃ bhaktā'tisaṃsnigdhā bhajate māṃ nirantaram |
sādhavaścāpi sādhvyaśca tadgṛhaṃ yānti pāvanam || 31 ||
[Analyze grammar]

bhuktvā pītvā śramaṃ tyaktvā prayānti tīrthamuttamam |
athaikadā samāyācca sādhurnirmohanāyanaḥ || 32 ||
[Analyze grammar]

pūjito bhojitaścāpi rātrau saṃvāhitaḥ padoḥ |
upādideśa tābhyāṃ sa mokṣasādhanamuttamam || 33 ||
[Analyze grammar]

kṣamāśastraṃ pare śastraṃ sarvaśāntipradaṃ śubham |
kṣamā tejasvināṃ tejaḥ kṣamā tapastapasvinām || 34 ||
[Analyze grammar]

kṣamate sarvatāmyāni sa vai nārāyaṇo mataḥ |
kṣamā pṛthvyāṃ sadā cāsti mātari sarvadehinām || 35 ||
[Analyze grammar]

kṣamā satsu sadā divyaguṇātmikā pravidyate |
sā vai jayapradā loke svargamokṣasahāyinī || 36 ||
[Analyze grammar]

āpattīnāṃ samastānāṃ kṣamā śastraṃ nibarhaṇam |
kāme krodhe made lobhe māne kṣamā hi śāntidā || 37 ||
[Analyze grammar]

nirbalasya kṣamā śastraṃ yadvacchastraṃ vivekinām |
sādhūnāṃ ca kṣamā śastraṃ śāsakaṃ tārakaṃ hyapi || 38 ||
[Analyze grammar]

kṣamiṇāṃ hṛdye kṛṣṇaścāntarātmā sadā'sti ca |
sa eva kṛpayā rakṣāṃ karotyasya viśeṣataḥ || 39 ||
[Analyze grammar]

śāsakaṃ kathyate trātṛ śastraṃ taddhi mataṃ janaiḥ |
māyākālabhayāt karmabhayācchāstṛ ṛtaṃ hi tat || 40 ||
[Analyze grammar]

dehasya śāsakaṃ naiva ṛtaṃ śastraṃ yathārthakam |
indriyāṇāṃ śāsakaṃ vā tathaivāti ṛtaṃ na tat || 41 ||
[Analyze grammar]

dehendriyāṇi māyāyāḥ kāryāṇi naśvarāṇi ca |
rakṣaṇe'yutadhā jāte'pyabhinaśyanti vai laye || 42 ||
[Analyze grammar]

vināśino rakṣaṇaṃ vai viphalaṃ tattadarthakam |
śastraṃ ca viphalaṃ tvevaṃ yatno bhāraḥ phalojjhitaḥ || 43 ||
[Analyze grammar]

araṇyaṃ nāśaśīlaṃ vai sīmā'pi ca tathaiva ha |
kṣetravāṭyādisarvaṃ vai nāśaśīlaṃ pravartate || 44 ||
[Analyze grammar]

caurā maraṇadharmāṇaḥ sasyānyapi tathaiva ca |
śāstā tvaṃ deharūpastu tathaiva nāśadharmavān || 45 ||
[Analyze grammar]

mṛtidharmā mṛtidharmaiḥ śikṣyate tat kutūhalam |
varaṃ vai kardamā'sparśaḥ paṃkaprakṣālanātpurā || 46 ||
[Analyze grammar]

tasmād dehasya śastrāṇi mokṣadāni na santi hi |
mokṣadāni tu śastrāṇi gopanīyāni sarvathā || 47 ||
[Analyze grammar]

rakṣaṇīyāni dhāryāṇi yoktavyāni tu muktaye |
vikhaṇḍala divyaśastrāṇyetāni me nibodha ha || 48 ||
[Analyze grammar]

yauvanaṃ śatrurūpaṃ vai tacchastraṃ tu vratārjanam |
kāmaḥ śatrurmahāṃstatra tacchastraṃ brahmacaryakam || 49 ||
[Analyze grammar]

vāsanā śātravī mātā tacchastraṃ cātmasaṃsthitiḥ |
vivako bhedavijñānaṃ bhajana śrīharermuhuḥ || 50 ||
[Analyze grammar]

tyāgo vairāgyamevā'pi caudāsīnyaṃ bahiḥ sadā |
evaṃ śastrāṇi māyāyā nāśakāni bhavanti vai || 51 ||
[Analyze grammar]

śrīhareḥ śaraṇaṃ nityaṃ sādhusevāsamāgamaḥ |
śrīharernavadhā bhaktirbhajanaṃ cātibhāvataḥ || 52 ||
[Analyze grammar]

amāyikānāṃ sādhūnāṃ sarvasvārpaṇasevanam |
hṛdaye śrīharerdhyānaṃ dehenātmasamarpaṇam || 53 ||
[Analyze grammar]

manasā cintanaṃ nityaṃ buddhyā sphūrtiḥ sadā hareḥ |
ānandādikriyāṇāṃ tu sarveśvare samarpaṇam || 54 ||
[Analyze grammar]

rasāsvādādikaṃ kṛṣṇaprasāde eva nānyathā |
śabdasparśādayaḥ sarve kṛṣṇasyaiva na cetarāḥ || 55 ||
[Analyze grammar]

ebhiḥ śastrairbhavenmāyānāśaḥ karmalayastathā |
niṣkāmakarmaṇā śāntirvitṛṣṇasya prajāyate || 56 ||
[Analyze grammar]

kāmasaṃkalpahīnāśca yasyā''raṃbhā hi nirguṇāḥ |
nairguṇyaṃ cāpyate tena sādhusaṃgena daivatam || 57 ||
[Analyze grammar]

hareḥ prāptyā tu divyatvaṃ sākṣādyogena mokṣaṇam |
māhātmyajñānayuktasya harau snehaḥ prajāyate || 58 ||
[Analyze grammar]

harau snehena saktasya hareḥ sphuraṇamavyayam |
pravarteta tataścendriyāṇi tadrūpakāṇyapi || 59 ||
[Analyze grammar]

jāyante'ntaḥkaraṇāni kṛṣṇasya mandirāṇi vai |
ātmā siṃhāsanaṃ tasya nārāyaṇasya jāyate || 60 ||
[Analyze grammar]

tenā''tmā ramate śete'śnute harṣati modate |
ānandayāti tādātmyabhāvairbrahmadaśāmayaḥ || 61 ||
[Analyze grammar]

vyavahāre vartamānaḥ sarvatra brahmabhāvanaḥ |
karmabandhananirmukto brahmaiva nātra saṃśayaḥ || 62 ||
[Analyze grammar]

harau sthiramanā divyo brahmaiva brahmatanmayaḥ |
kṛṣṇadṛḍhāśrayaḥ kṛṣṇe ramate nātra saṃśayaḥ || 63 ||
[Analyze grammar]

adhamoddhārakaḥ kṛṣṇo gṛhṇāti śaraṇe'rpitam |
punāti patitaṃ cāpi dīvyati snehinā saha || 64 ||
[Analyze grammar]

satīṃ gatiṃ dadātyeva svasmin raktāya mādhavaḥ |
ātyantikaṃ padaṃ śreya āpnoti mādhavārpitam || 65 ||
[Analyze grammar]

prakṛteḥ sarvakāryāṇāṃ laye cākṣaradhāmani |
bhaktasya saccidānandamayaṃ tejaḥ prakāśate || 66 ||
[Analyze grammar]

tatra tejasyanādiśrīkṛṣṇanārāyaṇaḥ patiḥ |
virājate cidacitāṃ niyāmako'ntarā''sthitaḥ || 67 ||
[Analyze grammar]

divyamūrtirdivyavāsā divyabhūṣāvibhūtimān |
sevyamāno mahābrahmabhūtamuktairasaṃkhyakaiḥ || 68 ||
[Analyze grammar]

anantaśaktibhiḥ rādhāramāmuktānikādibhiḥ |
kṛtārcanapādasaṃvāhanā''nandapradāyibhiḥ || 69 ||
[Analyze grammar]

sa eva svacaraṇayoḥ sevāṃ dadāti sevine |
sa eva vartate bhūmau kṛṣṇo brahmapriyāpatiḥ || 70 ||
[Analyze grammar]

niḥśreyasāya lokānāṃ divyaguṇārthavigrahaḥ |
vicāryetthaṃ parabrahma puruṣottamamāśrayet || 71 ||
[Analyze grammar]

āśritāḥ pakvaniṣṭhāśca sākṣāt paśyanti taṃ tataḥ |
sūkṣmadṛśo'ntarātmānaṃ sūkṣmaṃ paśyanti cāntare || 72 ||
[Analyze grammar]

sthūladṛśaḥ sthūlarūpaṃ sthūle paśyanti taṃ prabhum |
māyā kāyā'navacchinnā līnā sāmyā yadā'kṣare || 73 ||
[Analyze grammar]

tadā sūkṣmā tadā kṛṣṇaḥ sūkṣmarūpo'tra lokyate |
cetanāśca yadā līnāstattvāntaravivarjitāḥ || 74 ||
[Analyze grammar]

tadā sūkṣmāstatra kṛṣṇaḥ sūkṣmarūpo vilokyate |
māyā tu viṣamāvasthā cetanāḥ karmiṇastathā || 75 ||
[Analyze grammar]

tadā sthūlāsteṣu kṛṣṇaḥ sthūlarūpo vilokyate |
divyadṛṣṭimatāṃ kṛṣṇavīkṣaṇaṃ divyatānvitam || 76 ||
[Analyze grammar]

adivyadarśināṃ kṛṣṇavīkṣaṇaṃ prākṛtaṃ yathā |
aiśvaryāṇi samastāni sūkṣmasthūlāni vai hareḥ || 77 ||
[Analyze grammar]

sūkṣmasthūlapadārtheṣu nihitāni tu śārṅgiṇā |
aiśvaryaiḥ sakalā māyā cetanā vā parasparam || 78 ||
[Analyze grammar]

pṛthag vā samprakāśante saguṇā nirguṇāśca vā |
sarvāstāḥ sampado'nādikṛṣṇanārāyaṇasya ha || 79 ||
[Analyze grammar]

bhuṃkte bhakto'rpitasarvasvo'tibhāgavatottamaḥ |
aiśvaryāṇi samastāni prāpnoti patibhaktimān || 80 ||
[Analyze grammar]

patitvamekaṃ deveśe mukteśe śiṣyate harau |
anyat sarvaṃ nijaṃ tasmai bhaktāyā'rpayati prabhuḥ || 81 ||
[Analyze grammar]

snehaśastraṃ svāmino'pi vaśaṃkaraṃ vṛhat sadā |
tenaiva snehaśastreṇa śāsanīyo harirhadi || 82 ||
[Analyze grammar]

bandhanīyaḥ snehapāśairhṛdi dūraṃ na saṃcaret |
eṣaiva cā''kṣarī muktirdehināmiha divyatā || 83 ||
[Analyze grammar]

divyanāthapradabhogānandabhoktrī sthitistu yā |
sā pratyakṣe gurau kṛṣṇe prāptavyeha kṣitau purā || 84 ||
[Analyze grammar]

tato brahmapure saiva vartamānā prakāśate |
mohinī sā hareḥ prītirmahānandapradā sadā || 85 ||
[Analyze grammar]

koṭyabjakāmadevānāṃ sukhaṃ yatra harau sadā |
tādātmyabhāvamāpanno labhate svāmini prabhau || 86 ||
[Analyze grammar]

netrasukhamanantaṃ ca sparśasukhamanantakam |
cumbanānandamatulaṃ labhate svāmini prabhau || 87 ||
[Analyze grammar]

āliṅganamahānandaṃ labhate paramātmani |
sarvendriyarasaṃ divyaṃ dikṣeyamāsvādanaṃ tathā || 88 ||
[Analyze grammar]

labhate ca tathā divyaprītipramodamutsavam |
harṣaṃ divyaṃ tathā śāntiṃ śaityaṃ cāmṛtamiśritam || 89 ||
[Analyze grammar]

labhate śrīharau kānte svāmini śrīpatau prabhau |
caturviṃśatitattvānāṃ ye cānandā bhavanti vai || 90 ||
[Analyze grammar]

sṛṣṭitrayāṇāmānandā ye ye yatra bhavanti vai |
tān sarvān labhate mūrtau svāmini śrīparātmani || 91 ||
[Analyze grammar]

evaṃ lakṣmi copadeśaṃ kṛtvā nirmohanāyanaḥ |
rātrimuṣitvā prayayau tīrthāntaraṃ supūjitaḥ || 92 ||
[Analyze grammar]

prātarvikhaṇḍalo bhaktiṃ cakāra ca yathoditām |
jñānena sahitāṃ tasya patnyapi brahmarūpiṇī || 93 ||
[Analyze grammar]

vidadhe tādṛśīṃ bhaktiṃ snehayuktāṃ pravardhitām |
mūrtervai pūjane sarvaṃ kurutastau yathocitam || 94 ||
[Analyze grammar]

tayorbhaktyā prasanno'haṃ prāvirbarbhūva tatpuraḥ |
divyacaturbhujaḥ kṛṣṇanārāyaṇo'tisundaraḥ || 95 ||
[Analyze grammar]

prahasan cārpitān sarvopacārān cottamottamān |
ādade'haṃ ca naivedyaṃ bhuktvā dade prasādikam || 96 ||
[Analyze grammar]

tau bhuktavantau prītyā ca pītavantau jalāmṛtam |
tāvad divyasvarūpau cā'jāyetāṃ matsamānakau || 97 ||
[Analyze grammar]

prārthitavantau mokṣāya nirmohināvubhāvapi |
ahaṃ vimāne tau dhṛtvā divyau dhāmā'kṣaraṃ nijam || 98 ||
[Analyze grammar]

anayaṃ pārṣadaiḥ sākaṃ tayoḥ saṃkalpapūrakaḥ |
muktau tau cā'kṣare dhāmni vartete kamale sadā || 99 ||
[Analyze grammar]

evaṃ sādhuprasaṃgena samuddhṛtau nijānugau |
paṭhanācchravaṇādasya lakṣmi muktimavāpnuyāt || 100 ||
[Analyze grammar]

svargaṃ vā satyalokaṃ vā rājyaṃ vā caiśvaraṃ padam |
bhuktiṃ muktiṃ yatheṣṭāṃ vā labhate bhaktimān mayi || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne nirmohanāyanasāghuprasaṃgena vikhaṇḍalākhyaśastradharasya tatpatnyā harasatyāśca bhagavaddarśanaṃ mokṣaṇaṃ cetyādinirūpaṇanāmā catustriṃśadadhika |
dviśatatamo'dhyāyaḥ || 234 ||
[Analyze grammar]