Chapter 106

śrīpuruṣottama uvāca |
yathā patnī tathā putro dharmāśrayaḥ piturmataḥ |
pitā putrasvarūpo'sti pitṛdharmaḥ sute sthitaḥ || 1 ||
[Analyze grammar]

pracchanno vā prakāśo vā putraḥ pitā prakīrtitaḥ |
āryatvaṃ dharmaśīlatvaṃ mārdavaṃ vyavasāyitā || 2 ||
[Analyze grammar]

bhaktirviveka ete vyañjayanti putramuttamam |
anāryatvamanācāraḥ krūratā niṣkriyātmatā || 3 ||
[Analyze grammar]

abhaktiścā'vivekaśca kāluṣyaṃ vyañjayanti vai |
pitryaṃ vai bhajate śīlaṃ mātṛjaṃ vobhayaṃ tathā || 4 ||
[Analyze grammar]

śuddhayoniprajanmā vai sāṃkaryaṃ bhajate nahi |
jyāyānapi tu śīlena hīno mānaṃ na cārhati || 5 ||
[Analyze grammar]

api śūdro'pi śīlāḍhyaḥ sadvṛttaḥ pūjyate janaiḥ |
ākhyātmānamevā'tra śīlacāritrakarmabhiḥ || 6 ||
[Analyze grammar]

ātmā putra aurasaḥ svaḥ pitā svayaṃ sa kathyate |
svakṣetre tu niyogena parajanyo dvitīyakaḥ || 7 ||
[Analyze grammar]

svakṣetre cā'niyogena pracchannajastṛtīyakaḥ |
ūḍhā garbhavatī bhāryā tajjātastu caturthakaḥ || 8 ||
[Analyze grammar]

janmataḥ kenaciddattaḥ pañcamaḥ saḥ pravardhitaḥ |
yauvane dattakatayā gṛhītaḥ ṣaṣṭha ityapi || 9 ||
[Analyze grammar]

śiṣyarūpeṇa samprāptaḥ saptamaḥ putra ityapi |
krītaḥ proktastvaṣṭamaścā'nūḍhājo navamaḥ sutaḥ || 10 ||
[Analyze grammar]

manojanyo daśamaśca kathito mānasaḥ sutaḥ |
pathi tyakto jātamātro gṛhītaḥ kṛtrimaḥ sutaḥ || 11 ||
[Analyze grammar]

ekādaśaḥ sa vijñeyaḥ dauhitro dvādaśaḥ smṛtaḥ |
putryaścāpi tathā bodhyā dvādaśadhā tu vaṃśajāḥ || 12 ||
[Analyze grammar]

saṃskārāścātmavatteṣāṃ svāmivat saṃbhavanti hi |
kānīnako hyanūḍhājo mātṛvarṇaṃ prapadyate || 13 ||
[Analyze grammar]

gaṇikānāmapatyāni mātṛvarṇāni tāni vai |
dāsīnāṃ patihīnānāmapatyāni tu yāni vai || 14 ||
[Analyze grammar]

mātṛvarṇāni bodhyāni svāmivarṇāni vā tathā |
bhikṣādīkṣālabhyabālā acyutagotrakā hi te || 15 ||
[Analyze grammar]

sādhvyaśca sādhavaḥ sarve bhavantyacyutagotrakāḥ |
tyāgivargāśca vai putrāḥ putryo nārāyaṇasya ha || 16 ||
[Analyze grammar]

evaṃ vai bhūtale loke vyavasthā'sti tu padmaje |
aicchikī tvanyalokeṣu tathaiṣā'pi pravartate || 17 ||
[Analyze grammar]

bhāryā caturvidhā lakṣmi prāyaśaḥ saṃbhavanti hi |
patnī vivāhitā proktā dāsī yā tu sahāgatā || 18 ||
[Analyze grammar]

upakurvāṇikā yā tu kañcitkālaṃ gṛhe sthitā |
pracchannayogamāpannā rakṣitā sā tu kīrtitā || 19 ||
[Analyze grammar]

svāmino'pi tathā santi caturdhā padmaje śṛṇu |
vivāhitaḥ patiḥ prokto lagnitaḥ śreṣṭha eva saḥ || 20 ||
[Analyze grammar]

devarādirgauṇakānto dvitīyaḥ sa prakīrtitaḥ |
niyogamāptastṛtīyaścopakurvāṇakaḥ sa hi || 21 ||
[Analyze grammar]

pracchannayogamāpanno rakṣitaḥ sa prakīrtitaḥ |
prajāstayoryathāyogaṃ nāryā vā ca narasya vā || 22 ||
[Analyze grammar]

vivāde'patyamevā'tra yamicchet tasya vai hi tat |
deśabhedāt kālabhedād rītibhedāt pṛthagvṛṣaḥ || 23 ||
[Analyze grammar]

dattā kanyā dānarūpā putrī kathaṃ na kalpyate |
kalpyate bhogyarūpā sā tasmād rītirhi kāraṇam || 24 ||
[Analyze grammar]

bhāvanā yādṛśī yatra vyavahāraśca tādṛśaḥ |
bhuktvā krodhena vai tyaktā vairāgyeṇa tathā ca vā || 25 ||
[Analyze grammar]

tyāgenā'pi vivekena tyaktā mātṛsamā hi sā |
tasmāllakṣmi mahāmāyāpravāho mūrchanātmakaḥ || 26 ||
[Analyze grammar]

mūrchanāsu vividhāsu nayanti dehinaḥ sadā |
yathāvidhaḥ pravāho'sti yadā yatra yuge sthale || 27 ||
[Analyze grammar]

tathārītikṛto dharmaḥ sukhadaḥ śāntido bhavet |
devānāṃ rītayaścānyā yogināmitarāśca tāḥ || 28 ||
[Analyze grammar]

mānavānāṃ vibhinnāśca paśvādīnāṃ tathetarāḥ |
yathārītiḥ sa vai dharmo yadyanarthaṃ na cā''vahet || 29 ||
[Analyze grammar]

anarthaṃ prāpayanpanthā dharmātmā naiva gaṇyate |
duḥkhado naiva dharmo'sti sukhadaḥ sarvathā vṛṣaḥ || 30 ||
[Analyze grammar]

artho vṛṣānusañjuṣṭo'nartho'dharmānuyojitaḥ |
kāmo dharmārthasahitastaddhīno na pumarthakaḥ || 31 ||
[Analyze grammar]

dharmārthakāmapāraṃ yo yātaḥ sa vindate'kṣaram |
adharmyanarthī viṣayī vindate yamayātanām || 32 ||
[Analyze grammar]

kuṭumbādivyavasthā'pi puruṣārthaparāyaṇā |
apumarthayutā rītiḥ pāśavī na tu mānuṣī || 33 ||
[Analyze grammar]

śāstraṃ śāsanadharmaṃ vai mānuṣādau pravartate |
tiryagyonau na vai śāstraṃ vidyāśūnyatayā khalu || 34 ||
[Analyze grammar]

balaṃ rītiḥ paśūnāṃ tu mohaśceti nibandhanam |
tadādhārāṇi tiryañci yādāṃsi kīṭayonayaḥ || 35 ||
[Analyze grammar]

athaivaṃ vartamānānāṃ bhavapāro na vidyate |
yadṛcchayā satāṃ yoge bhavapāro bhavet kvacit || 36 ||
[Analyze grammar]

nahyātmā śakyate hantuṃ tasmāduddhāramācaret |
snehena darśanaṃ sādhoḥ saṃvāsaṃ sevayā''caret || 37 ||
[Analyze grammar]

brahmavāsakṛtārambhaṃ sādhuṃ seveta mānavaḥ |
nihatya mānaṃ śokaṃ ca krodhaṃ harṣaṃ ca vāsanām || 38 ||
[Analyze grammar]

viśrambhapātraṃ bhūtānāṃ śuciṃ śrīkṛṣṇadaivatam |
ūrdhvabrahmasthitiṃ śāntaṃ sarveṣāṃ priyadarśanam || 39 ||
[Analyze grammar]

niḥśeṣitasamāraṃbhaṃ dhyānaniṣṭhaṃ vaśendriyam |
niṣṇātaṃ brahmavidyāyāṃ samanetraṃ dayāparam || 40 ||
[Analyze grammar]

etādṛśaṃ sādhujanaṃ cāśrayet prārthayettathā |
ajñānād yatkṛtaṃ pāpaṃ prakṣālaya jagadguro || 41 ||
[Analyze grammar]

mokṣamārgasya sopānaṃ pradarśaya jagadguro |
vāsanāgranthimujjvālya pāvaya svān jagadguro || 42 ||
[Analyze grammar]

bhaktiṃ pradarśya paramāṃ pramokṣaya jagadguro |
evaṃ vai prārthanāṃ kuryād yathā kuryāt kṛpāṃ tathā || 43 ||
[Analyze grammar]

vaktavyaṃ ca satāmagre tavā'smīti punaḥ punaḥ |
karavāṇi yadā''jñā syāt sarvaṃ kartā'smi duṣkaram || 44 ||
[Analyze grammar]

yadi rājyaṃ yadi dhanaṃ yadi gā yadi svaṃ gṛham |
yajñaṃ dānaṃ sutaṃ vāṭīṃ brūhi sarvaṃ dadāmi te || 45 ||
[Analyze grammar]

ityevamarthayet sādhuṃ pratoṣayet samarpaṇaiḥ |
aśaṃkayā'rpayet sarvaṃ muktibhāk sa bhavet khalu || 46 ||
[Analyze grammar]

māyā hi saṃśayaḥ prokto brahmaṇi nāsti saṃśayaḥ |
saṃśayaścet satāṃ yoge sevāyāṃ vacane kṛtau || 47 ||
[Analyze grammar]

kadā muktiḥ kadā śuddhiḥ kathaṃ sevā bhavediha |
kadā śuddhasvarūpasya niṣṭhā vāpi bhavediha || 48 ||
[Analyze grammar]

tasmānniḥsaṃśayo bhūtvā seveta sādhumuttamam |
pāpakṣālanaśaktaṃ ca mokṣadaṃ divyavartanam || 49 ||
[Analyze grammar]

santuṣṭaṃ jñānakośaṃ ca brahmādhānaṃ nirāśrayam |
nirālambaṃ madālambaṃ manmūrtiṃ sevayet sadā || 50 ||
[Analyze grammar]

śṛṇu lakṣmi kathayāmi sādhusevāphalaṃ param |
sasvāmipaśupakṣyāptasuhṛdāṃ mokṣaṇaṃ yataḥ || 51 ||
[Analyze grammar]

āsīt karṇāṭake deśe bhaktimān tāpaso muniḥ |
nāmnā śaṃbhalavāraśca jātyā sūtīyasaṃbhavaḥ || 52 ||
[Analyze grammar]

sa tu nadyāstaṭe vāsaṃ cakāraikala eva ha |
yuvā'pi strīṃ vinā'naṃgabhogecchuḥ samadhārayat || 53 ||
[Analyze grammar]

tapaḥ śreṣṭhaṃ paraṃ kṛtvā bhuktvā bhogān hi dharmataḥ |
yāsyāmyahaṃ tataḥ svargaṃ śāśvataṃ paramaṃ padam || 54 ||
[Analyze grammar]

vicāryetthaṃ tīrthayātrāṃ kartuṃ gṛhādvinirgataḥ |
godāvaryāstaṭe ramye samutsedhasthale śubhe || 55 ||
[Analyze grammar]

grāme satrāśayākhye vai nijāvāsaṃ vyadhāt tataḥ |
ucchraye sa tapaḥ kartuṃ vīkṣyānukūlabhūtalam || 56 ||
[Analyze grammar]

mānavaiḥ kṛtasammāno'nnādibhiḥ sa mano dadhe |
pañcāgniṣu niṣasāda ṣaṇmāsānatha tatparam || 57 ||
[Analyze grammar]

utthito'bhūd varṣamātraṃ tvekapādena tāpasaḥ |
tapaścacāra paramaṃ bhajan viṣṇuṃ narāyaṇam || 58 ||
[Analyze grammar]

varṣānte nijapādau sa baddhvā vallyā vaṭadrame |
śākhāyāṃ nimnamūrddhā'sau vyalambata samāntaram || 59 ||
[Analyze grammar]

evaṃ kṛtvā tapaḥ paścād varṣānte mastakaṃ bhuvi |
nidhāyordhvapado bhūtvā tapaścacāra dāruṇam || 60 ||
[Analyze grammar]

varṣānte cordhvahasto'bhūdaṃguṣṭhamātratolanaḥ |
animeṣo'rkadṛṣṭiśca tapaścacāra dāruṇam || 61 ||
[Analyze grammar]

ṣaṇmāsān tatparaṃ nadyāṃ jalāntare'vasattataḥ |
pañcame vatsare viṣṇurjale matsyasvarūpadhṛk || 62 ||
[Analyze grammar]

āyayau cakracihnāḍhyaścakhāda carma tanmuneḥ |
māṃsaṃ cakhāda ca tathāpi na kampaṃ yayau muniḥ || 63 ||
[Analyze grammar]

viṣṇurmatsyasya vācā taṃ prāha jale'tra vartase |
kastvaṃ kathaṃ sthitastvatra vada ko'rtho'tra te mataḥ || 64 ||
[Analyze grammar]

śrutvā śaṃbhalavārastaṃ matsyamāha śubhāśayam |
tapaḥ karomi saukhyārthaṃ sukhaṃ dharmaphalaṃ yataḥ || 65 ||
[Analyze grammar]

rājyaṃ gṛhaṃ dhanaṃ bhāryāḥ sutāḥ putryaśca dhenavaḥ |
dāsā dāsyo vāhanāni labhyante tapasā sadā || 66 ||
[Analyze grammar]

dharmārthakāmamokṣāśca labhyante gṛhayogataḥ |
bhūtvā gṛhī prayāsyāmi tapaḥ kṛtvā paraṃ padam || 67 ||
[Analyze grammar]

ityukto matsya āhā'pi kiṃ te bhogeṣu vāsanā |
tapaḥ kṛtvā phalaṃ bhuṃkṣva mokṣapade pare pade || 68 ||
[Analyze grammar]

anityāḥ santi bhogā vai duḥkhadā bandhanātmakāḥ |
tān vihāya padaṃ yāhi nārāyaṇasya śāśvatam || 69 ||
[Analyze grammar]

śrutvā śaṃbhalavāraśca prāha matsyaṃ tadā punaḥ |
bhavān matsyo yathā jñānī vartase viṣayeṣvapi || 70 ||
[Analyze grammar]

tathā jñātvā'pi viṣayānabhuktvā na nivartanam |
bhuktvā vividhān viṣayān tṛptimāsādya sarvathā || 71 ||
[Analyze grammar]

vāsanāyāḥ kṣayaṃ kṛtvā tato yāyātparaṃ padam |
ityevaṃ sulabhaḥ panthāstadanyaḥ saṃśayātmakaḥ || 72 ||
[Analyze grammar]

sarāgasya gatirnāsti rāgaṃ praśāmayettataḥ |
ato'haṃ tapasā''rādhya viṣṇuṃ prasādya mādhavam || 73 ||
[Analyze grammar]

vṛttvā bhogān prabhuktvā tān bhaktyā yāsyāmi tatpadam |
śrutvā matsyastadā prāha paśya me rūpamaiśvaram || 74 ||
[Analyze grammar]

tapasā te pratuṣṭo'smi nārāyaṇo'smi cāgataḥ |
vṛṇu yatte yatheṣṭaṃ tad dadāmi sarvathā ciram || 75 ||
[Analyze grammar]

munirvavre dhanaṃ rājyaṃ nārīḥ putrān paśūn sutāḥ |
gajāśvavṛṣabhān gāśca puruṣārthacatuṣṭayam || 76 ||
[Analyze grammar]

tathā'stviti hariḥ prāha datvā varaṃ tiro'bhavat |
atha śaṃbhalavāro'pi jalād bahirviniryayau || 77 ||
[Analyze grammar]

mālāmāvartayannāmnā nārāyaṇasya vai hareḥ |
uvāsotsedhabhāge ca nadyāstaṭe manohare || 78 ||
[Analyze grammar]

atha satrāśayo grāmo daśasāhasramānavaḥ |
varṣāyāṃ saritaḥ pūraiḥ samāvṛṇot samantataḥ || 79 ||
[Analyze grammar]

jalamagno'bhavaccāpi tadrājā maraṇaṃ yayau |
anye'pi bahavo lokā narā nāryo janāḥ prajāḥ || 80 ||
[Analyze grammar]

jalaplavena nidhanaṃ yātāḥ pañcasahasriṇaḥ |
tataḥ pare yayurdeśāntare vāsārthameva ca || 81 ||
[Analyze grammar]

sahasraṃ mānavāstatra nyūṣurdhairyaprapālitāḥ |
bhaktāḥ sarve tāpasāśca nārāyaṇaparāyaṇāḥ || 82 ||
[Analyze grammar]

atha śaṃbhalavāro'pi mānapātraṃ paraṃ śubham |
tadgrāmavāsināṃ tatra cābhavattāpaso yataḥ || 83 ||
[Analyze grammar]

grāmarājyaṃ pracakāra prajābhirmānitastataḥ |
evaṃ rājā'bhavattatra sahasramānavārcitaḥ || 84 ||
[Analyze grammar]

grāmaprajā dadustasmai kanyakāścaikaviṃśatim |
gāvaḥ paśavo dāsāśca dāsyaḥ prajājanāstathā || 85 ||
[Analyze grammar]

ajāvayo'śvavṛṣabhāḥ sarve tasyā'bhavaṃstataḥ |
evaṃ sa tapasā rājyaṃ bhogān strīśca sutādikān || 86 ||
[Analyze grammar]

prāpa nārāyaṇabhaktiṃ cakre satāṃ prasevanam |
asya bhaktyā dharmabhṛtyā vyavardhanta prajāḥ punaḥ || 87 ||
[Analyze grammar]

daśasāhasrasaṃkhyordhvā abhavan satranāgarāḥ |
sarvā anena muninā vaiṣṇvyastā kṛtāstathā || 88 ||
[Analyze grammar]

nāmasaṃkīrtanaṃ cāpi pūjanaṃ śrīharestathā |
akārayad yathāyogyaṃ mandiraṃ cāpyakārayat || 89 ||
[Analyze grammar]

sādhavo'sya gṛhe nityaṃ nivasanti sahasraśaḥ |
bhaktiṃ ca navadhā nityamakārayat sumandire || 90 ||
[Analyze grammar]

athā'yaṃ vigate kāle prajāḥ prāha vivekavān |
putrā me cāsate daivācchataṃ pañca tathā striyaḥ || 91 ||
[Analyze grammar]

ekaviṃśatisaṃkhyāśca putryo me dve śate tathā |
gāvaḥ santi sahasrāṇi vṛṣabhā vājinastathā |
śukāśca sārikāścāpi hastinaḥ saramāsutāḥ || 92 ||
[Analyze grammar]

dāsā dāsyo bhavantyatra prajā yūyaṃ sukhāstathā |
dharmaḥ kṛtastathā cārthaḥ kāmo dṛṣṭo'tha mokṣaṇam || 93 ||
[Analyze grammar]

kartumicchāmi sahasā datvā rājyaṃ sutāya me |
jyeṣṭhāya ca tato yāsye nārāyaṇākṣaraṃ padam || 94 ||
[Analyze grammar]

prajāstathāstviti prāhuḥ prāhuścānyacchubhā''spadam |
vayaṃ sarvāḥ prayāsyāmaḥ sahaiva paramaṃ padam || 95 ||
[Analyze grammar]

svasvasutān prasaṃsthāpya yathādhikārakarmasu |
evaṃ sammantrya rājā'sau samādhau yogamāptavān || 96 ||
[Analyze grammar]

sarvaṃ putre sannidhāya mokṣe vṛttiṃ samādadhat |
rājñyaḥ sarvāḥ prajāḥ sarvāstatsthale śrīharau tadā || 97 ||
[Analyze grammar]

yojayitvendriyaprāṇān lagnā āsan nijātmasu |
bhajantaḥ śrīpatiṃ nārāyaṇaṃ priyaṃ prabhuṃ patim || 98 ||
[Analyze grammar]

āyayau tatra vai viṣṇurvimānaiḥ saha pārṣadaiḥ |
prabhāsayan diśaḥ sarvā garjayadbhirdigantarān || 99 ||
[Analyze grammar]

prāha bhaktaṃ śaṃbhalaṃ taṃ samāgaccha vimānake |
natvā''rcya bhagavantaṃ taṃ prāha śaṃbhalavārakaḥ || 100 ||
[Analyze grammar]

bhagavan kṛpayā sarvāḥ prajā yāstu samutsukāḥ |
āgantuṃ mokṣamevā'tra sajjāstā naya vai saha || 101 ||
[Analyze grammar]

gavā'śvavṛṣabhā'jāścāvayo gāvaḥ śukādayaḥ |
tathā'nye ye bhavantyatra tava prasādapāvitāḥ || 102 ||
[Analyze grammar]

mama putrāśca putryaśca rājñyaścāpi kuṭumbinaḥ |
sajjā ye ye bhavantyatra tāṃstān naya nijaṃ padam || 103 ||
[Analyze grammar]

itīcchāṃ me hare kṛṣṇa prapūraya kṛpāṃ kuru |
hariḥ prāha tathāstvevaṃ tava bhaktyā karomyaham || 104 ||
[Analyze grammar]

putrāste bhinnajātīyā bhinnanārīsamudbhavāḥ |
brāhmaṇāḥ kṣatriyāścānye vaiśyāḥ śūdrāstathā'pare || 105 ||
[Analyze grammar]

bhinnajātīyarājñīnāṃ sutāḥ putrāstathā'nugāḥ |
dāsā bhṛtyāśca dāsyaśca ye'nye'nyā bhaktimārgagāḥ || 106 ||
[Analyze grammar]

ārohantu vimānaṃ me nayāmi mama dhāma tān |
ityuktāḥ sarva evaite ye ye mumukṣavo'bhavan || 107 ||
[Analyze grammar]

āruruhurvimānaṃ te navasāhasrasaṃkhyakāḥ |
paśavaḥ pakṣiṇaḥ sarve kṛpayā śrīharestadā || 108 ||
[Analyze grammar]

āruruhurvimānaṃ tad divyadehāścaturbhujāḥ |
caturbhujyaśca kamalā nāryaḥ śarvāstadā'bhavan || 109 ||
[Analyze grammar]

prajāḥ sarvā āruruhurvimānaṃ divyabhāsvarāḥ |
ekaikaputraṃ santyajya vaṃśabījaṃ yathāyatham || 110 ||
[Analyze grammar]

sarvāḥ prajāstathā rājā rājakuṭumbasaṃyutaḥ |
sarve yayurvimānena vaikuṇṭhaṃ paramaṃ padam || 111 ||
[Analyze grammar]

evaṃ śaṃbhalavāro vai sādhurgṛhe sthito'pi san |
tāpaso'pi bhuvo bhogān bhuktvā prapūjya keśavam || 112 ||
[Analyze grammar]

yayau padaṃ tu paramaṃ bhaktyā nārāyaṇāśritaḥ |
bhinnajātīyapatnīnāṃ patiḥ putrādisaṃyutaḥ || 113 ||
[Analyze grammar]

evaṃ sādhuprasaṃgena kuṭumbaṃ sarvathā rame |
prayāti paramaṃ dhāma yogyāyogye na tatra vai || 114 ||
[Analyze grammar]

paṭhanācchravaṇādasya bhogavairāgyavān bhavet |
bhaktyā bhuktiṃ samālabhya muktiṃ vrajed balāddhareḥ || 115 ||
[Analyze grammar]

sādhuvṛttyā vrajenmuktiṃ nayenmuktiṃ sahasraśaḥ |
yayā śaṃbhalavāro'sau yayau muktiṃ prajāyutaḥ || 116 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vividhaputrāḥ vividhapatnyo vividhapatayaḥ sādhuyoge muktiḥ sūtajātīyasya śaṃbhalavārasya sādhubhaktasya bhaktyā tapasā rājyasutapaśupakṣyādiprāptyuttaraṃ saprajasya muktirityādinirūpaṇanāmā ṣaḍadhikaśatatamo'dhyāyaḥ || 106 ||
[Analyze grammar]