Chapter 103

śrīnārāyaṇīśrīruvāca |
kadā kāle pradānena svarṇagobhūmayaḥ phalam |
kīdṛśaṃ samadadati tanme bodhaya keśava || 1 ||
[Analyze grammar]

śrīpuruṣottama uvāca |
datvā dānāni prathame dine śuklasya padmaje |
śrāddhabhojanayuktāni prāpnuyāt subhagāḥ priyāḥ || 2 ||
[Analyze grammar]

dvitīyāyāṃ tathā datvā labhate kanyakāḥ sutān |
tṛtīyāyāṃ tathā datvā labhate śreṣṭhavājinaḥ || 3 ||
[Analyze grammar]

caturthyāṃ tu tadā datvā labhate paśugodhanam |
pañcamyāṃ tu tathā datvā labhate sadguṇān sutān || 4 ||
[Analyze grammar]

ṣaṣṭhyāṃ tu ca tathā datvā labhate sadyaśo balam |
saptamyāṃ tu tathā datvā labhate kṣetravāṭikām || 5 ||
[Analyze grammar]

aṣṭamyāṃ tu tathā datvā labhate dravyamuttamam |
navamyāṃ tu tathā datvā hastyuṣṭrā'śvādikān labhet || 6 ||
[Analyze grammar]

daśamyāṃ tu tathā datvā kāmadhenuyuto bhavet |
ekādaśyāṃ tathā datvā rūpyaśevadhimān bhavet || 7 ||
[Analyze grammar]

dvādaśyāṃ tu tathā datvā svarṇaratnādimān bhavet |
trayodaśyāṃ tathā datvā lokarājastathā bhavet || 8 ||
[Analyze grammar]

caturdaśyāṃ tathā datvā sāmrājyaṃ samavāpnuyāt |
pūrṇamāsyāṃ tathā datvā camatkārī jano bhavet || 9 ||
[Analyze grammar]

amāyāṃ tu tathā datvā sarvān kāmānavāpnuyāt |
me jayantyāṃ tathā datvā mokṣaṃ paramamāpnuyāt || 10 ||
[Analyze grammar]

nakṣatreṣu viśeṣeṇa dānaphalaṃ vadāmi ca |
kṛttikāyāṃ pradānena bhavedvai vigatajvaraḥ || 11 ||
[Analyze grammar]

rohiṇyāṃ sampradānena cāpatyavān bhavejjanaḥ |
dānena mṛgaśirasi tejasvī mānavān bhavet || 12 ||
[Analyze grammar]

ārdrāyāṃ tu pradānena jayavān sarvadā bhavet |
punarvasau pradānena dhanavān ṛddhimān bhavet || 13 ||
[Analyze grammar]

puṣye dānapradātā tu sarvathā puṣṭimān bhavet |
āśleṣāyāṃ pradānena dhīrān putrānavāpnuyāt || 14 ||
[Analyze grammar]

maghāyāṃ tu pradānena prajāprādhānyamāpnuyāt |
pūrvāphālgunikādānācchreṣṭhabhāgyayuto bhavet || 15 ||
[Analyze grammar]

uttarāphālgunīdānādbahvapatyo bhavejjanaḥ |
haste dānaprakartā tu kāryaphalāni cāpnuyāt || 16 ||
[Analyze grammar]

citrāyāṃ tu pradānena labhed rūpavataḥ sutān |
svātau dānapradātā tu vāṇijyaratnavān bhavet || 17 ||
[Analyze grammar]

viśākhāyāṃ pradātā tu suputro bahuputravān |
anurādhāsu dātā syāccakravartī pradhānakaḥ || 18 ||
[Analyze grammar]

jyeṣṭhāyāṃ sampradātā vai cādhipatyaṃ labhediha |
mūle dānaprakartā tu labhedārogyamuttamam || 19 ||
[Analyze grammar]

pūrvāṣāḍhāpradānena yaśobhāṅmānavān bhavet |
uttarāṣāḍhikādānād vītaśoko bhavet sadā || 20 ||
[Analyze grammar]

dānaṃ tvabhijiti kurvan bhiṣaksiddhimavāpnuyāt |
śravaṇe dānakartā tu labhetsuparamāṃ gatim || 21 ||
[Analyze grammar]

dhaniṣṭhāyāṃ pradātā syādācāryo gururāṇnṛpaḥ |
śatabhiṣāpradānena dhātusiddhimavāpnuyāt || 22 ||
[Analyze grammar]

pūrvabhādrapadādānaphalaṃ cājāvikādikam |
uttaraproṣṭhapadādo govājigajavān bhavet || 23 ||
[Analyze grammar]

revatyāṃ tu pradānena svarṇarūpyādimān bhavet |
aśvinīdānakartā syānmahiṣyaśvādimān janaḥ || 24 ||
[Analyze grammar]

bharaṇyāṃ dānado dīrghajīvī bhavenna saṃśayaḥ |
gobhūsvarṇapradātā vai sarvaphalānyavāpnuyāt || 25 ||
[Analyze grammar]

parīkṣeta na vai dānapātrāṇi dānadharmavit |
daive paitrye ca sādhavye parīkṣeta na vai kvacit || 26 ||
[Analyze grammar]

vidyāvanto bhaktimanto brahmiṣṭhāḥ sarvapāvanāḥ |
sadācāraparā brahmadeyāśca sāmagā dvijāḥ || 27 ||
[Analyze grammar]

mātāpitṛsevakāśca devānāṃ sevakāstathā |
brahmacaryaparāḥ śuddhā yatayaḥ sarvapāvanāḥ || 28 ||
[Analyze grammar]

satyadharmavrataśīlāḥ puṇyatīrthaniṣeviṇaḥ |
makhābhiṣekavantaścā'vabhṛthasnānakāriṇaḥ || 29 ||
[Analyze grammar]

pārāyaṇapravaktārastāpasāḥ kīrtane ratāḥ |
mokṣamārgaparāḥ kathāvācakā dharmadeśakāḥ || 30 ||
[Analyze grammar]

gurumantrapradā vṛddhādarā gosevakāśca ye |
sādhavaḥ sādhusevāḍhyāḥ pātrāṇi sarvapāvanāḥ || 31 ||
[Analyze grammar]

agryā dharmapralekheṣu mokṣalekheṣu cāgragāḥ |
vidyāśrayā jñānaśīlāḥ śāntā vai paṃktipāvānāḥ || 32 ||
[Analyze grammar]

yāvadete prapaśyanti paṃktiṃ punanti tatkṣaṇāt |
dhyānajñānaparā bhaktiparāstapaḥparāstathā || 33 ||
[Analyze grammar]

nirguṇakriyayā yuktāḥ sādhavaḥ paṃktipāvanāḥ |
pretānāṃ muktidāḥ santo bhojitāḥ pūjitā natāḥ || 34 ||
[Analyze grammar]

bhaktimantastāpasāśca santo brahmāṇḍapāvanāḥ |
tapaścaiṣāmindriyāṇāṃ nigrahaḥ paramaṃ matam || 35 ||
[Analyze grammar]

manaso nigrahaścāpi śrīharerdhāraṇaṃ sadā |
tyāgasya cāpi sampattistapa uttamameva tat || 36 ||
[Analyze grammar]

upavāso brahmacaryaṃ maunaṃ kṣamā tapaḥ param |
titikṣā tuṣṭiraudāryaṃ sahanaṃ tapa uttamam || 37 ||
[Analyze grammar]

ṛtavāditvamevā'pi vighasāśitvamityapi |
amṛtāśitvamevāpi paramaṃ tapa ucyate || 38 ||
[Analyze grammar]

ekabhukto bhavedeva sadopavāsivat khalu |
ekapatnīvrataścāpi brahmacārī sadā bhavet || 39 ||
[Analyze grammar]

ṛtumātraprasaṃgī ca sādhureva bhaveddhi saḥ |
strīmātrasaṃgarahito mukto bhūmau na saṃśayaḥ || 40 ||
[Analyze grammar]

svarṇastrīpāśarahito dvibhujaḥ parameśvaraḥ |
tādṛśī strī dharmayuktā sākṣānnārāyaṇī matā || 41 ||
[Analyze grammar]

sādhvī sā dānapātraṃ ca satī pātraṃ tathottamam |
vidhavā dānapātraṃ cā'pyanāthā dānapātrakam || 42 ||
[Analyze grammar]

kanyakā dānapātraṃ ca vṛddhā dānasya pātrakam |
nirāśrayā dānapātraṃ yadi bhaktivṛṣānvitā || 43 ||
[Analyze grammar]

dānadātā pavitro vai sadā bhavati bhaktimān |
vibhajya ca tato bhuṃkte'mṛtabhojī bhaveddhi saḥ || 44 ||
[Analyze grammar]

devebhyaḥ sannivedyā'ttā vighasāśī bhaveddhi saḥ |
etādṛśasya bhavane hyadṛśyā api ṛddhayaḥ || 45 ||
[Analyze grammar]

mūrtarūpaṃ paraṃ prāpya modante modayanti tam |
devatāḥ pitaraḥ siddhā yogino yatayastathā || 46 ||
[Analyze grammar]

santa īśā īśvarāṇyo ramante dātṛmandire |
apsarasaśca gandharvāḥ surā devyaśca sādhavaḥ || 47 ||
[Analyze grammar]

satyaśca bhāgyavatyaśca tathā ca kāmadhenavaḥ |
putrāḥ pautrāḥ sutāḥ putryo gāvaścāsya bhavanti hi || 48 ||
[Analyze grammar]

evaṃ dātuḥ kuṭumbaṃ vai sarvaṃ devakulaṃ bhavet |
paśavo devapaśavaḥ sasyāni daivatānyapi || 49 ||
[Analyze grammar]

svarṇarūpyādikaṃ sarvaṃ lakṣmīrūpaṃ sudaivatam |
bhāgyānyapi ca sarvāṇi rūpaṃ bhūṣāśca daivatam || 50 ||
[Analyze grammar]

evaṃ dāturbhavedeva divyaṃ daivaṃ kuṭumbakam |
tasmāllakṣmi pradātavyaṃ svarṇaṃ gauḥ pṛthivī śubhā || 51 ||
[Analyze grammar]

yadi pācanaśaktiḥ syād grahītavyaṃ na cānyathā |
alpaśakteḥ puṇyanāśo bhavatyeva pratigrahāt || 52 ||
[Analyze grammar]

saptarṣibhyaḥ purā rājā vṛṣādarbhiḥ samutsukaḥ |
ratnānyadarśayad dātuṃ nā'gṛhṇan ṛṣayastadā || 53 ||
[Analyze grammar]

vṛṣādarbhiḥ svayaṃ prāha samarthāḥ stha pratigrahe |
pratigrahastārayati vṛṇudhvaṃ vittamuttamam || 54 ||
[Analyze grammar]

suvarṇāni rūpyakāṇi mauktikāni ca hīrakān |
maṇīn śvetagajānaśvān śvetān govṛṣabhāṃstathā || 55 ||
[Analyze grammar]

gṛṣṭīścāgnyāḥ kāmadhenūrgrāmān kṣetrāṇi cārpaye |
rājyaṃ rājñīrdāsavargān dāsīdāsye mahāsabhāḥ || 56 ||
[Analyze grammar]

prāsādān saritaścādrīn dāsye vanāni sarvaśaḥ |
gṛhṇantu brāhmaṇā me'dya viprāśca sādhavo mama || 57 ||
[Analyze grammar]

adeyaṃ me vidyate na mokṣārthaṃ prayate yataḥ |
datvā pātrebhya evā'tra lapsye'haṃ śāśvataṃ phalam || 58 ||
[Analyze grammar]

ityevaṃ tvarthayantaṃ vai dānaṃ dātuṃ hyupasthitam |
ṛṣayaḥ prāhuravyagrā dhīrāḥ śāntāḥ pratoṣiṇaḥ || 59 ||
[Analyze grammar]

rājan pratigraho rājñāṃ madhvāsvādo viṣopamaḥ |
tad dāva iva nirdahyāt prāpto rājaparigrahaḥ || 60 ||
[Analyze grammar]

apratigrāhyamevā'taḥ pretyeha ca sukhepsunā |
rājadhanaṃ pratīcchan vai pāpiṣṭhāṃ labhate gatim || 61 ||
[Analyze grammar]

yat pṛthivyāṃ vrīhiyavaṃ hiraṇyaṃ paśavaḥ striyaḥ |
sarvaṃ tannā'lamekasya tasmād vidvān śame vaset || 62 ||
[Analyze grammar]

utpannasya ruroḥ aṃgaṃ vardhamānasya vardhate |
puruṣasya striyāścāpi tathecchā vardhate sadā || 63 ||
[Analyze grammar]

na talloke dravyamasti yallokān paritarpayet |
samudratṛṣṇaḥ puruṣo na kadāpi pratuṣyati || 64 ||
[Analyze grammar]

kāmaṃ kāmayamānasya kāmo yadopayujyate |
prakāmaḥ sa pravardheta satṛṣṇaścāti vidhyati || 65 ||
[Analyze grammar]

pratigrahe saṃyamo vai tapo dhārayate dhruvam |
parigrahe tapaḥ sarvaṃ naśyatyeva na saṃśayaḥ || 66 ||
[Analyze grammar]

tapaḥsaṃcaya eveha viśiṣṭo dravyasañcayāt |
tasmād rājān dhanaṃ te'stu mā viṣaṃ secaya dvije || 67 ||
[Analyze grammar]

dāvaṃ rājadhanaṃ naivecchāmaḥ śāntā maharṣayaḥ |
svasti te'stu mahārāja yāmo vayaṃ divaṃ punaḥ || 68 ||
[Analyze grammar]

ityuktvā prayayuḥ sarvarṣayo dānagrahaṃ vinā |
vṛṣādarbhistataḥ samyajjñātavān dānaghoratām || 69 ||
[Analyze grammar]

apātre'rpitadānasyā'pathyatvaṃ sutarāṃ khalu |
tasmāt pātraṃ hi dānānāṃ puṇyāśrayā dvijāstathā || 70 ||
[Analyze grammar]

santo'pi bhagadbhaktāstebhyo deyaṃ viśeṣataḥ |
viprā api harerbhaktāstebhyo deyaṃ viśeṣataḥ || 71 ||
[Analyze grammar]

ye lobhaṃ naiva kurvanti svārthamātravivarjitāḥ |
śrīhareḥ pūjakāstebhyo deyaṃ dānaṃ viśeṣataḥ || 72 ||
[Analyze grammar]

pātrajanaḥ sarvarītyā lobhaṃ sadā vivarjayet |
haraye cā'rpaṇaṃ matvā gṛhṇīyānnānyathā kvacit || 73 ||
[Analyze grammar]

vṛṣādarbhistato lakṣmi prayāge kuṃbhayogake |
dadau dānāni gatvaiva sādhubhyastāni bhāvavān || 74 ||
[Analyze grammar]

athā''gataṃ vimānaṃ ca vaikuṇṭhād yāmune taṭe |
gaṃgāyāḥ saṃgame viṣṇupārṣadaiḥ śobhitaṃ tadā || 75 ||
[Analyze grammar]

rājānaṃ pārṣadā nītvā yayurvikuṇṭhadhāma ha |
evaṃ sādhujanānāṃ vai sevayā mokṣaṇaṃ rame || 76 ||
[Analyze grammar]

bhavatyeva na sandehastasmāt pātraṃ samarjayet |
dadyādbhāvena tasmai ca haraye'rpaṇamastviti || 77 ||
[Analyze grammar]

atha dadyācchatradānaṃ copānaddānamityapi |
dhotrakañcukadānaṃ ca śirastrāṇasamarpaṇam || 78 ||
[Analyze grammar]

bhavecchatrapatistena bhavedvimānagastathā |
dadyāt siṃhāsanadānaṃ rājyādhipo bhavettataḥ || 79 ||
[Analyze grammar]

dadyāccāmaradānaṃ ca vetradānaṃ tathā'rpayet |
dhvajadānaṃ prakuryācca rathadānaṃ carettathā || 80 ||
[Analyze grammar]

kośadānaṃ prakuryācca kaṇasañcayadānakam |
ikṣukṣetrapradānaṃ ca sasyakṣetrapradānakam || 81 ||
[Analyze grammar]

sarovarā'rpaṇaṃ cāpi śākavāṭīpradānakam |
udyānapuṣpavāṭyāderdānaṃ kuryātprayatnataḥ || 82 ||
[Analyze grammar]

śāṭībhūṣākañcukīna kuryād dānāni vai tathā |
khadvāśayyāpradānāni kuryāt pretasya muktaye || 83 ||
[Analyze grammar]

pātragargarikādānaṃ kalaśasthālikā'rpaṇam |
śṛṃgāravastudānāni dadyāt pretasya muktaye || 84 ||
[Analyze grammar]

udakuṃbhīdugdhakuṃbhīdadhikuṃbhīpradānakam |
jaladroṇīghṛtakuṃbhīkaṇḍanyādisamarpaṇam || 85 ||
[Analyze grammar]

muśalasya pradānaṃ ca mārjanīsampradānakam |
vyajanādeḥ pradānaṃ ca dīpapeṭīpradānakam || 86 ||
[Analyze grammar]

śayyādhrīsampradānaṃ ca pātradhrīsampradānakam |
cullikāpeṣaṇīdānaṃ darvīcīpiṭikā'rpaṇam || 87 ||
[Analyze grammar]

sandaṃśadānaṃ kāṃgakeśīdānaṃ darpaṇadānakam |
raśanārajjudānāni kārayet pretamuktaye || 88 ||
[Analyze grammar]

jaladānaṃ randhitānnapradānaṃ ca phalārpaṇam |
payaḥpākādidānaṃ ca miṣṭānnānāṃ pradānakam || 89 ||
[Analyze grammar]

godhūmaśālitilānāṃ dānāni vividhāni ca |
kuryād rasamadhukṣārārpaṇaṃ pretasya muktaye || 90 ||
[Analyze grammar]

mahākambaladānāni mahāmbarapradānakam |
mahāśṛṃgāradānāni kuryāt pretasya muktaye || 91 ||
[Analyze grammar]

ekādaśyādipuṇyānāṃ dānaṃ kuryāt prayatnataḥ |
vratadānaṃ tapodānaṃ bhaktidānaṃ kathā'rpaṇam || 92 ||
[Analyze grammar]

japadānaṃ dharmadānaṃ kuryāt pretasya muktaye |
vāyuvāhanadānaṃ ca vahnivāhanadānakam || 93 ||
[Analyze grammar]

jalavāhanadānaṃ ca bhūvāhanapradānakam |
narayānapradānaṃ ca yantravāhanadānakam || 94 ||
[Analyze grammar]

saudhadānaṃ mandirasya dānaṃ prāsādadānakam |
grāmadānaṃ varmadānaṃ kuryāt pretasya muktaye || 95 ||
[Analyze grammar]

śṛṇu lakṣmi purā naije cāśrame saṃvasan ṛṣiḥ |
krīḍan vai dhanuṣā bāṇān jamadagnirmumoca ha || 96 ||
[Analyze grammar]

tānānīya śarān patnī reṇukā'dāt punaḥ punaḥ |
madhyāhne viṣatāpaśca sūryasyogro'bhavattadā || 97 ||
[Analyze grammar]

dagdhapādā tu sā patnī śanairāyāt patiṃ prati |
muniḥ prāha kathaṃ kānte cirāyate śarā''hṛtau || 98 ||
[Analyze grammar]

patnī prāhā'rkatāpena dagdhāpādā bhavāmi vai |
munistūrṇaṃ samākarṇya śarānmumoca bhāskaram || 99 ||
[Analyze grammar]

sūryastrastaścāyayau ca viprarūpo muniṃ prati |
uvācarṣe hata mā māṃ prasādaye kṣamasva mām || 100 ||
[Analyze grammar]

muniḥ prāha mama patnyāḥ panthāḥ sukhagamo yathā |
bhavet tāpavihīno vai tathā sūrya vidhāpaya || 101 ||
[Analyze grammar]

śrutvā sūryo dadāvasmai chatropānahamāśu vai |
svalpaṃ yānaṃ kāmagaṃ ca bhūṣāmbarāṇi vai tathā || 102 ||
[Analyze grammar]

pātramakṣayamevā'pi kalpachāyāṃ vitānajām |
hāraṃ tāpahāraṃ cāpi tṛptidaṃ cāmṛtaṃ tathā || 103 ||
[Analyze grammar]

upakaraṇānyanyāni dadau sūryaḥ sukhāni ca |
yayau natvā divaṃ cā'rko reṇukā'bhūt sukhāśrayā || 104 ||
[Analyze grammar]

apādadagdhā mṛdulā ṛṣiḥ prasannatāṃ gataḥ |
evaṃ chatrādidānaṃ vai pravṛttaṃ sūryamūlakam || 105 ||
[Analyze grammar]

tattaddānapradānena jīvatāṃ pretadehinām |
duḥkhaśāntirbhavatyeva puṇyena mokṣaṇaṃ bhavet || 106 ||
[Analyze grammar]

paṭhanācchravaṇādasya sarvadānaphalaṃ bhavet |
lakṣmi dānaphalaṃ sarvaṃ punarāyāti dātari || 107 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vividhadānaiḥ pretoddhāro bhavati dānapātraṃ śreṣṭhaṃ sādhujanaścetyādau vṛṣādarbheḥ sūryasya ca nidarśanamityādinirūpaṇanāmā tryadhikaśatatamo'dhyāyaḥ || 103 ||
[Analyze grammar]