Chapter 268

śrīkṛṣṇa uvāca |
śṛṇu tataśca vai tīrthaṃ gatvā sādhusamāśritam |
papraccha lomaśaṃ rādhe cāśvapāṭalabhūpatiḥ || 1 ||
[Analyze grammar]

aśvapāṭala uvāca |
kimidaṃ sādhubhirvyāptaṃ tīrthaṃ paramapāvanam |
sthāvaraṃ jaṃgamaṃ cāpi guro tīrthadvayaṃ vada || 2 ||
[Analyze grammar]

śrīlomaśa uvāca |
amohākṣo'bhavad rājā himācalasya sannidhau |
prabodhākhyaṃ guruṃ prāpya toṣayāmāsa sevayā || 3 ||
[Analyze grammar]

gurustasmai dadau naije rūpe śrīharidarśanam |
caturbhujaṃ śaṃkhacakragadāpadmādirājitam || 4 ||
[Analyze grammar]

punargurusvarūpaścā'bhavat tatra kṣaṇāntare |
amohākhyo vismitaśca saṃśiśye śrīpatiṃ prati || 5 ||
[Analyze grammar]

guruścāyaṃ mānavo'sti dṛśyate ca caturbhujaḥ |
manye nārāyaṇaṃ tvenaṃ militaṃ mama bhāgyataḥ || 6 ||
[Analyze grammar]

tasmādenaṃ bhajāmyeva seve tvenaṃ samastataḥ |
dhyātvā sampūjya vai bhaktyā paraṃ śreyo vrajāmi ca || 7 ||
[Analyze grammar]

ityevaṃ hṛdaye kṛtvā niścayaṃ ca prabodhakam |
sevate parayā bhaktyā rājā guruṃ janārdanam || 8 ||
[Analyze grammar]

rājñī putrāḥ prajāḥ putryaḥ sevante sma guruṃ harim |
annajalapradānena pādasaṃvāhanādibhiḥ || 9 ||
[Analyze grammar]

vacasāṃ pālanenāpi vastrakṣālanakādibhiḥ |
śayanāsanadānaiśca patraphaladalārpaṇaiḥ || 10 ||
[Analyze grammar]

candanā'kṣatatailaiśca sugandhihārabhūṣaṇaiḥ |
rājabhogaiḥ sadā rājakuṭumbaṃ vai samastakam || 11 ||
[Analyze grammar]

sevate sma prabhuṃ matvā guruṃ harimatandritam |
bhajate sma prabodheti nāmnāṃ saṃkīrtanena ca || 12 ||
[Analyze grammar]

gururvicārayāmāsa bandhanaṃ samupasthitam |
rājabhogā bandhanāni jāyante nirayāya vai || 13 ||
[Analyze grammar]

tasmādbhogāḥ parihāryā dūrato muktirodhinaḥ |
prabodhaṃ māyikaṃ parābhāvayituṃ na cārhati || 14 ||
[Analyze grammar]

ityevaṃ niścayaṃ kṛtvā prabodho vai śanaiḥ śanaiḥ |
upadeśairniyamaiśca bhogatyāgaṃ cakāra ha || 15 ||
[Analyze grammar]

amohākṣāya ca prāha dharmavārtāṃ śubhāvahām |
rājan rājñāṃ pṛthagdharmo dharmaścānyastapasvinām || 16 ||
[Analyze grammar]

ahaṃ sādhuḥ prabodho'smi na bhogo mama yujyate |
gṛhasthānāṃ bhūṣaṇāni sādhūnāṃ dūṣaṇāni vai || 17 ||
[Analyze grammar]

gṛhasthānāṃ dūṣaṇāni sādhūnāṃ bhūṣaṇāni vai |
sādhudharmaḥ kṣamā proktā rājadharmo hi śāsanam || 18 ||
[Analyze grammar]

sādhudharmastriṣavaṇaṃ rājadharmo hyavabhṛtham |
sādhudharmaḥ śīlarakṣā gṛhidharmaḥ strīyogitā || 19 ||
[Analyze grammar]

sādhudharmaścāvamānaṃ gṛhidharmo hi mānanam |
sādhurbhikṣājīvanaśca gṛhī bhujārjitādanaḥ || 20 ||
[Analyze grammar]

sādhurjīrṇāmbaraścāpi gṛhī svarṇāmbarādimān |
sādhurvihāraśīlaśca gṛhī caikatra saudhavān || 21 ||
[Analyze grammar]

sādhuḥ snehavihīnaśca gṛhī kuṭumbavāsanaḥ |
sādhuścātmaparo nityaṃ gṛhī gṛhyaparastathā || 22 ||
[Analyze grammar]

sādhuścāpyaniketaśca gṛhī sambandhiketanaḥ |
mitāhāraḥ sadā sādhurgṛhī puṣṭyadanaḥ sadā || 23 ||
[Analyze grammar]

dvandvahīnaḥ sadā sādhurgṛhī dvandvasamanvitaḥ |
nirāśaśca sadā sādhurgṛhī tvāśābhirāvṛtaḥ || 24 ||
[Analyze grammar]

mokṣadaḥ sādhudharmaśca gṛhadharmo hi nākadaḥ |
ityevaṃ dharmamārgeṣu pārthakyaṃ vidyate hi nau || 25 ||
[Analyze grammar]

atha jñāne'pi vai rājan śṛṇu pārthakyamatra nau |
mama putro mama patnī mama dravyaṃ gajādikam || 26 ||
[Analyze grammar]

mama kṣetraṃ mama rājyaṃ gṛhasthasya vibhāti hi |
na me putro na me patnī na me dravyaṃ gajādikam || 27 ||
[Analyze grammar]

na me kṣetraṃ kuto rājyaṃ sādhulokasya bhāti ha |
mama sambandhinaśceme kuṭumbinastathā mama || 28 ||
[Analyze grammar]

mama bhṛtyā me prajāśca gṛhasthasya vibhāti ha |
na me sambandhinaścāpi na me kuṭumbinastathā || 29 ||
[Analyze grammar]

na me bhṛtyāḥ kutaḥ prajāḥ sādhulokasya bhāti ha |
mama deho mama rūpaṃ mamā''jñā ca balaṃ mama || 30 ||
[Analyze grammar]

mama sattā mama sarvaṃ gṛhasthasya vibhāti ha |
na me deho na me rūpaṃ na cā''jñā me balaṃ na me || 31 ||
[Analyze grammar]

na me sattā kutaḥ sarvaṃ sādhulokasya bhāti ha |
mama puṣṭirmama rogo me miṣṭaṃ mama śītalam || 32 ||
[Analyze grammar]

mama duḥkhaṃ mama garvo gṛhasthasya vibhāti ha |
na me puṣṭirna me rogo miṣṭaṃ śaityaṃ na me na me || 33 ||
[Analyze grammar]

na me duḥkhaṃ na me garvaḥ sādhulokasya bhāti ha |
ahaṃ vṛkṇo hyahaṃ sthūlaḥ kuṣṭhyahaṃ khañjako'smyaham || 34 ||
[Analyze grammar]

ahaṃ buddho jaḍaścā'haṃ gṛhasthasya vibhāti ha |
nā'haṃ vṛkṇo na ca sthūlo na kuṣṭhī na ca khañjakaḥ || 35 ||
[Analyze grammar]

na vā buddho jaḍo naiva sādhulokasya bhāti ha |
mama janma mama mṛtyurmama svargaṃ bhavediti || 36 ||
[Analyze grammar]

mama pūjā mama kīrtirgṛhasthasya vibhāti vai |
na me janma na me mṛtyurna me svargaṃ na bandhanam || 37 ||
[Analyze grammar]

na me pūjā na me kīrtiḥ sādhulokasya bhāti ha |
tava grāmastava vāṭī tavodyānaṃ tava kṣitiḥ || 38 ||
[Analyze grammar]

tavedaṃ ca mamedaṃ ca gṛhasthasya vibhāti ha |
na te grāmo na te vāṭī te nodyānaṃ na te kṣitiḥ || 39 ||
[Analyze grammar]

tavedaṃ na mamedaṃ na sādhulokasya bhāti hi |
evaṃ jñāne'pi pārthakyaṃ vairāgye śṛṇu pārthiva || 40 ||
[Analyze grammar]

kamanīyā mama bhāryā kamanīyaṃ gṛhaṃ mama |
kamanīyaśca me deho gṛhasthasya hi raktatā || 41 ||
[Analyze grammar]

na me bhāryā gṛhaṃ dehaḥ kutaśca kamanīyatā |
pratyuta kledamiśrāste kalmaṣāśca jugupsitāḥ || 42 ||
[Analyze grammar]

ityevaṃ sādhulokasya svabhāvād rāgahīnatā |
aho dravyamaho bhogā aho tatsādhanāni ca || 43 ||
[Analyze grammar]

aho'haṃ ca madarthaṃ yad gṛhasthasya tu vismayaḥ |
kiṃsvid dravyaṃ ca ke bhogāḥ kānisvit sādhanāni ca || 44 ||
[Analyze grammar]

ko'haṃkāro mamakāraḥ sādhornaivā'sti vismayaḥ |
utsavo'dya vivāho'dya nṛtyamadya ca gāyanam || 45 ||
[Analyze grammar]

raṅgo'dya nāṭakaṃ cā'dya gṛhasthasya tu vibhramaḥ |
ātmotsavo mokṣavāho nṛtyagītī harau sadā || 46 ||
[Analyze grammar]

raṅganāṭye pareśārthaṃ sādhoḥ kṛṣṇe samarpaṇam |
idaṃ dyūtamidaṃ labdhaṃ jitaṃ grastaṃ nijīkṛtam || 47 ||
[Analyze grammar]

dattaṃ cāpi gṛhītaṃ ca gṛhasthasya sarāgatā |
ātmadyutaṃ brahmalabdhaṃ jitaṃ manaḥ sthirīkṛtam || 48 ||
[Analyze grammar]

adattamagṛhītaṃ ca sādhoḥ rāgavihīnatā |
sukhānuśayitā nityaṃ tṛṣṇātantvanupātitā || 49 ||
[Analyze grammar]

gṛdhnabhāvānuyāyitvaṃ gṛhasthasya sarāgatā |
ātmānuśayitā nityaṃ brahmasūtrānupātitā || 50 ||
[Analyze grammar]

sādhubhāvānuyāyitvaṃ sādhorvirāgatā sadā |
evaṃ vairāgyapārthakyaṃ bhaktau cāpi niśāmaya || 51 ||
[Analyze grammar]

gṛhasthasya gṛhe bhaktiḥ sādhorbhaktistu mādhave |
gṛhasthasya ratau bhaktiḥ sādhostu viratau hi sā || 52 ||
[Analyze grammar]

svārthe ca gṛhiṇo bhaktiḥ sādhorbhaktiḥ parārthake |
gṛhasthasyaihike bhaktiḥ sādhoḥ sā paramārthikā || 53 ||
[Analyze grammar]

gṛhasthasya sthitau bhaktiḥ sādhorbhaktiḥ parasthitau |
gṛhasthasya rase bhaktiḥ sādhoḥ sarvarasātmani || 54 ||
[Analyze grammar]

gṛhasthasya bhrame bhaktiḥ sādhorbhaktirbhramātige |
gṛhasthasya ṛtau bhaktiḥ sādhorbhaktiḥ ṛte harau || 55 ||
[Analyze grammar]

bhaktiḥ sādhoranāvartte hyāvarte gṛhiṇastu sā |
bhaktirgarbhe gṛhasthasya sādhorbhaktirhiraṇmaye || 56 ||
[Analyze grammar]

gṛhabhaktā gṛhasthāśca sādhavo grahasevinaḥ |
bhaktabhaktā gṛhasthā vai sādhavo naktabhaktakāḥ || 57 ||
[Analyze grammar]

bahubhaktā gṛhasthāśca sādhavaścaikabhaktakāḥ |
sabhaktā vai gṛhasthāśca nirbhaktāḥ sādhavaḥ sadā || 58 ||
[Analyze grammar]

sarvabhaktā gṛhasthāśca hyabhaktāḥ sādhavaḥ khalu |
evaṃ rājan bhaktimārge pārthakyaṃ gṛhiṇāṃ satām || 59 ||
[Analyze grammar]

gatau cāpi sāhacaryaṃ bhavatyeva nahi kvacit |
gṛhasthasya gatirnimnā sādhorgatiḥ sadordhvikā || 60 ||
[Analyze grammar]

gṛhī tvārāmagatikaḥ sādhuḥ rāmagatiḥ sadā |
gṛhastho raktagatimān sādhuḥ śuklagatiḥ sadā || 61 ||
[Analyze grammar]

gṛhastho dvandvagatikaḥ sādhurdvandvā'gatistathā |
gṛhagatirgṛhasthaśca sādhurgrahagatiḥ sadā || 62 ||
[Analyze grammar]

karmagatirgṛhasthasya sādhorbrahmagatistathā |
ātmagatirgṛhasthasya sādhoścātmā''tmasadgatiḥ || 63 ||
[Analyze grammar]

sādhorgatirbhagavati gṛhasthasya bhage gatiḥ |
evaṃ rājan gateścāpi pārthakyaṃ gṛhiṇāṃ satām || 64 ||
[Analyze grammar]

vad tvayā samaṃ me'tra kathaṃ syāt sahayojanam |
rāgā'rāgau sahanastastejastamasī naiva ca || 65 ||
[Analyze grammar]

bandhamokṣau sahayogau na sto na staḥ kadācana |
tasmād vāsaṃ vane sādhusammataṃ samarocaye || 66 ||
[Analyze grammar]

paśya rājan śarīraṃ vai kalalaṃ kalalodbhavam |
apānasya pradeśena dhātudvārā prajāyate || 67 ||
[Analyze grammar]

apānasya sthale garbhe pacyate kalalaiḥ sadā |
puṣṭimeti bahiryāti payasā randhitānnakaiḥ || 68 ||
[Analyze grammar]

sarvaṃ kalalasaṃvyāptaṃ nidhānaṃ kalalasya vai |
kalalaṃ ca malaṃ vāpi salilaṃ tatra vartate || 69 ||
[Analyze grammar]

bhautikaṃ cāpi durgandhaṃ tvāpādanakhamasti yat |
malātmakaṃ nidhānaṃ ca malasyaiva vilokyate || 70 ||
[Analyze grammar]

sugandhāḍhyaṃ prabhuktaṃ ca pītaṃ galādadhogatam |
durgandhaṃ jāyate śīghraṃ malaṃ kṛtvā prarakṣati || 71 ||
[Analyze grammar]

sugandho gandhasāraśca ghrāṇena yaḥ prapūritaḥ |
koṣṭhale sa tu durgandho bhūtvā bahiḥ prayāti ca || 72 ||
[Analyze grammar]

navadvāreṣu sarvatra durgandhāni malāni vai |
kṣarantyeva hi sarveṣāṃ nārakaṃ kuṇḍameva yat || 73 ||
[Analyze grammar]

paśya svāṃgajugupsāṃ ca mā saṃsargaṃ paraiḥ kuru |
jalānnagrahaṇe yogyaṃ kalalakledavikṛtau || 74 ||
[Analyze grammar]

malamūtrasarjane ca kā tatra śubhavāsanā |
aśubhaṃ śubhamāvidya ramate nigaḍe yathā || 75 ||
[Analyze grammar]

bhuktavikārarūpād vai lālātmasalilāt khalu |
bhūtejovāyusammiśrājjāyate kalalodbhavaḥ || 76 ||
[Analyze grammar]

tasmād dehastatastatrendriyāṇi golakādayaḥ |
tanmātrādyāstathā teṣāṃ sañcālikā praśaktayaḥ || 77 ||
[Analyze grammar]

grāhyagrāhakabhāvāśca tasmādeva bhavanti vai |
tatra ko nāma saṃvidvān pramodaṃ labhate'vaśaḥ || 78 ||
[Analyze grammar]

kṣaṇe kṣaṇe'nyarūpāṇi dṛśyante'tarkitāni vai |
kutrakṣaṇe'yaṃ saṃghāto vighātaṃ saṃprayāsyati || 79 ||
[Analyze grammar]

abbhravad dhūmravadvā ca dhūlīpaṭalavattathā |
jñātvaivaṃ dehapaṭalaṃ jño na viśvāsamāpnuyāt || 80 ||
[Analyze grammar]

śūnyaṃ kṣaṇāntare tvetatprāṇasya vigame bhavet |
duḥkhaṃ cālokyate sākṣād yataḥ svalakṣaṇaṃ hi tat || 81 ||
[Analyze grammar]

śarīraṃ cedṛśaṃ tasya sambandhiṣu tu kā kathā |
tasmād rājannivatsye'haṃ tvātmanyaraṇyasaṃjñake || 82 ||
[Analyze grammar]

anaraṇye parameśe vāsaṃ lapsye tataḥ param |
maduktaṃ yadi miṣṭaṃ te taṃ sumārgaṃ prasādhaya || 83 ||
[Analyze grammar]

eṣa yāmi viyogasya mā śokaṃ vara vijñaka |
gurau deho yathoktaśca sadā cettādṛśo'sti vai || 84 ||
[Analyze grammar]

araṇye'pi tathaivāste tatsaṃgastu bhayāvahaḥ |
tatsaṃge cedaraṇye'pi vāsaste saṃbhaviṣyati || 85 ||
[Analyze grammar]

samadraṣṭuśca te'raṇyaṃ gṛhaṃ me'pi samaṃ yataḥ |
vāsaṃ tvatraiva satataṃ vidhehi yāhi mā prabho || 86 ||
[Analyze grammar]

prabuddha uvāca |
satyaṃ rājan tvaduktaṃ vai mayoktaṃ cāpi tattathā |
avighne bhavane gatvā mokṣaṃ yāsyāmi durlabham || 87 ||
[Analyze grammar]

bahuvighnamayaṃ rājan bhavanaṃ te vilokyate |
svalpavighnamaraṇyaṃ vai yatiṣye ca yathābalam || 88 ||
[Analyze grammar]

ātmavittiṃ prāpya pravekṣyāmi vai brahmavittike |
brahmavittyā parabrahma sādhayiṣyāmi śāśvatam || 89 ||
[Analyze grammar]

amohākṣa uvāca |
pūrṇabrahmasvarūpasya darśanaṃ me kathaṃ bhavet |
guro tvaṃ me pradehyatra pūrṇabrahmapradarśanam || 90 ||
[Analyze grammar]

prabuddha uvāca |
karmakaṣāyadāhena pūrṇaṃ brahma prakāśate |
rājannā'haṃ tathā yuktaḥ karmajālasamāvṛtaḥ || 91 ||
[Analyze grammar]

amohākṣa uvāca |
dehasyā'sya na viśvāsaḥ kṣaṇānte'yaṃ vinaśyati |
guroḥ sakāśāllābho na parabrahmapragocaraḥ || 92 ||
[Analyze grammar]

tadā śiṣyeṇa tu kadā kva sa lābho hyavāpsyate |
tvaṃ pradehi guro jñānaṃ cā'parokṣaṃ parātmanaḥ || 93 ||
[Analyze grammar]

prabuddha uvāca |
nāhaṃ tādṛk samartho'smi sāmarthyaṃ bhajanāśrayam |
mādṛśā avatārāstu buddhā jātāḥ sahasraśaḥ || 94 ||
[Analyze grammar]

bhaktyopāsanayā yasya parabrahmaṇa eva ha |
tadupāstyā bhavān rājan tariṣyati na saṃśayaḥ || 95 ||
[Analyze grammar]

yāsyāmyahaṃ vane rājan tvaṃ cedicchasi satvaram |
brahmadarśanamatraiva vinā sādhanasampadam || 96 ||
[Analyze grammar]

kṛpayā'haṃ kathayāmi deśe surāṣṭrasaṃjñake |
aśvapaṭṭasaraḥkṣetre'kṣarakṣetre śubhāvahe || 97 ||
[Analyze grammar]

kuṃkumavāpikātīrthe pratyakṣo bhagavān svayam |
anādiśrīkṛṣṇanārāyaṇaḥ śrīpuruṣottamaḥ || 98 ||
[Analyze grammar]

virājate parabrahma dhṛtamānuṣavigrahaḥ |
yāhi śīghraṃ ca taṃ deśaṃ parabrahma miliṣyati || 99 ||
[Analyze grammar]

prāsāde māṃ guruṃ tatra sthāpayitvā tataḥ param |
yāsyasi brahmalokaṃ ca yāhi śīghraṃ hi mā ciram || 100 ||
[Analyze grammar]

eṣa yāsyāmi rājaṃste svasti bhavatu sarvadā |
ityuktvā nṛpate buddho niryayau vanavistaram || 101 ||
[Analyze grammar]

amohākṣo drutaṃ sajjo bhūtvā samājagāma ha |
kṣetrametatsamāgatyā'nādikṛṣṇanarāyaṇam || 102 ||
[Analyze grammar]

pratyakṣaṃ sandadarśāpi tīrthe'tra nyavasattathā |
prabuddhaṃ sthāpayitvā'tra yayau mokṣaṃ parātparam || 103 ||
[Analyze grammar]

divyavimānamāruhyā'kṣaraṃ dhāma sanātanam |
tadidaṃ buddhatīrthaṃ vai tathā tīrthamamohakam || 104 ||
[Analyze grammar]

mohanāśakaraṃ pūrṇabrahmaprāptikaraṃ sadā |
snāhi rājan guruṃ dhyātvā dānānyapi pradehi ca || 105 ||
[Analyze grammar]

ityukto rādhike rājā cāśvapāṭalakastadā |
lomaśoktadiśā snānaṃ dānaṃ cakāra śobhanam || 106 ||
[Analyze grammar]

yayau tato'yaṃ sahasā tīrthaṃ cā'parameva saḥ |
paṭhanācchravaṇāccāsya parabrahmagatirbhavet || 107 ||
[Analyze grammar]

viveko jāyate cāpi tathā brahmasthitirbhavet |
bhuktirmuktirbhaveccāpi svargaṃ ca śāśvataṃ bhavet || 108 ||
[Analyze grammar]

atra dānena tapasā bhajanenā''plavena ca |
jalapānena yajñasyā'śvamedhasya phalaṃ bhavet || 109 ||
[Analyze grammar]

api pāpijanaścātrā''gatya prāṇān jahāti cet |
prabuddhaścātra saṃbhūtvā mokṣapadaṃ prayāsyati || 110 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne amohākṣanṛpateḥ prabuddhagurorupadeśena kuṃkumavāpīkṣetrā''game sākṣātparabrahmaprāptiḥ buddhatīrthaṃ mokṣaścetyādinirūpaṇa |
nāmā'ṣṭaṣaṣṭyadhikadviśatatamo'dhyāyaḥ || 268 ||
[Analyze grammar]