Chapter 226

śrīkṛṣṇa uvāca |
śṛṇu tvaṃ rādhike śrīmatkṛṣṇanārāyaṇo hariḥ |
yamupadeśaṃ pradadau svātmakalyāṇakārakam || 1 ||
[Analyze grammar]

tamahaṃ te pravakṣyāmi prajābhyaḥ pradadau prabhuḥ |
parabrahmaprayuktena brahmaṇā cākṣareṇa vai || 2 ||
[Analyze grammar]

preryate puruṣo dhāmni sthitaḥ sṛṣṭividhāpane |
yuyuje nijaśaktyā sa māyayā tena māyikāḥ || 3 ||
[Analyze grammar]

māyālīnā'nādino ye ātmānaste svakarmabhiḥ |
preritā īśvarā yadvā jīvā bhavanti dehinaḥ || 4 ||
[Analyze grammar]

dehendriyāntaḥkaraṇatanmātrābhūtasaṃjñakam |
saṃghātaṃ tu nijaṃ matvā badhyate tatra karmabhiḥ || 5 ||
[Analyze grammar]

saṃghātarūpān bhāvān vai gṛhṇanti prāṇino muhuḥ |
punarviyogaṃ saṃyanti cakravatpariyanti ca || 6 ||
[Analyze grammar]

śāntaghoravimūḍhāṃśca bhāvān prayānti sarvataḥ |
romalohitamāṃsāni bhāvā vai mātṛsaṃbhavāḥ || 7 ||
[Analyze grammar]

majjā'sthisnāyavo bhāvā bhavanti pitṛsaṃbhavāḥ |
sukhaduḥkhavimohāḍhyāḥ śītoṣṇadāhakāḥ sadā || 8 ||
[Analyze grammar]

tān bhāvān samavāpyā'pi tairna yo bhāvito bhavet |
so'haṃ so'haṃ vicintya syād bhāvabandhanavarjitaḥ || 9 ||
[Analyze grammar]

navadvāraṃ puraṃ ramyaṃ tattadbhāvaiḥ samanvitam |
vyāpya śete cetanātmā puruṣaḥ so'yamucyate || 10 ||
[Analyze grammar]

tebhyaḥ puruṣasaṃjñebhyo'nantebhyaścottamo'smyaham |
antarātmā virāje'haṃ brahmaloke yathā'smyaham || 11 ||
[Analyze grammar]

puruṣottama evā'haṃ bhavāmi sarvaśāsakaḥ |
sarveṣu cetaneṣu yadvadahaṃ nivasāmi ha || 12 ||
[Analyze grammar]

tathā sarvajaḍe'pyasmi śarīrī tattvavadhārakaḥ |
taṃ māṃ vijñāya bhakto me videho jāyate'cirāt || 13 ||
[Analyze grammar]

ajaraḥ so'maraścaiva sūkṣmo mama vṛṣānvitaḥ |
mama mūrtau mama bhaktau sarvārpaṇo vimucyate || 14 ||
[Analyze grammar]

agniścāste sadā dārau dārunāśe viyujyate |
pare tattve prayātyeva tathā''tmā dehanāśane || 15 ||
[Analyze grammar]

taṃ paraṃ paramātmānaṃ māmāśrityā'pi pāpinaḥ |
puṇyavanto bhavantyevā'ṅgārā ivā'gniyogataḥ || 16 ||
[Analyze grammar]

mama satāṃ prasaṃgena mamaiśvaryātiyogataḥ |
mamāṃ'śaguṇalābhācca bhakto matsamatāṃ vrajet || 17 ||
[Analyze grammar]

svapnadṛśyān padārthān vai tyaktvā cāyāti jāgrati |
tathā māyādikāstyaktvā sarvadraṣṭari yāti vai || 18 ||
[Analyze grammar]

bhūmiṃ tyaktvā yathā vāri sariddvārā mahārṇavam |
yāti tadvad vihāyedaṃ varṣmātmā māṃ pumuttamam || 19 ||
[Analyze grammar]

kṛtakāryā nivartante yathā vai karmacāriṇaḥ |
bhuktabhogā nirvatante tathā''tmānaśca dehinaḥ || 20 ||
[Analyze grammar]

vegahīnaḥ śaro yadvanniṣkriyo yāti bhūtalam |
vāsanāvegahīno'yaṃ jīvo yāti mamā'kṣaram || 21 ||
[Analyze grammar]

nirāśo jāyate yadvannivṛttaḥ karmaṇastathā |
sarvāśāvarjito loke nivṛtto māṃ prayāti vai || 22 ||
[Analyze grammar]

sarvabhāvairvarjito yat tato yāti mamāspadam |
madabhyāsānmayi sakto na yāti prakṛtiṃ punaḥ || 23 ||
[Analyze grammar]

bījānyagnyupadagdhāni na prarohanti sarvathā |
tathā'sya sarvabījāni na prarohanti vai punaḥ || 24 ||
[Analyze grammar]

amṛtāsvādasaṃsaktaḥ svādāntare na sajjate |
mama svāde prasaktaḥ sa guṇasvāde na sajjate || 25 ||
[Analyze grammar]

durlabhā mama vettāro jagatyatra bhavanti vai |
sulabhāḥ sarvato jīvā dehendriyārthapoṣakāḥ || 26 ||
[Analyze grammar]

nimnabhāve vegavanto yānti vāripravāhaṇāḥ |
nimnagrāmye tathāvegā yānti vai prāyaśo janāḥ || 27 ||
[Analyze grammar]

vahnisvabhāvāḥ santastu yāntyūrdhvaṃ brahmavedinaḥ |
satāṃ prasaṃgato bhaktāḥ prayāntūrdhvaṃ mamā'kṣaram || 28 ||
[Analyze grammar]

evaṃ vicārya satataṃ bhajanīyaḥ pareśvaraḥ |
satāṃ saṃgena kartavyā bhaktirme dhāmadāyinī || 29 ||
[Analyze grammar]

sarvārpaṇaṃ mayi kṛṣṇe nārāyaṇe pareśvare |
ye kurvanti na vai teṣāṃ māyā bādhakarī bhavet || 30 ||
[Analyze grammar]

yaḥ snehaḥ putravittādau yaḥ snehaḥ pramadādiṣu |
yaḥ sneho nijadehādau taṃ snehaṃ tvarjayenmayi || 31 ||
[Analyze grammar]

yā tṛṣṇā viṣaye saukhye yā tṛṣṇā bhogasādhane |
yā tṛṣṇā mānayaśasoḥ sā kāryā mayi mādhave || 32 ||
[Analyze grammar]

yo vegaḥ svārthasamprāptau yo vego'rijayādiṣu |
yo vego'haṃkṛtau cāste sa kāryo mayi keśave || 33 ||
[Analyze grammar]

yā tṛptiśceṣṭalābhe'sti yā tṛptirbhoganirgame |
yā tṛptirbahusantoṣe sā kāryā mayi sarvathā || 34 ||
[Analyze grammar]

yatsukhaṃ sāttvike bhāve nirdvandve cāpi yatsukham |
yatsukhaṃ ca vivekena tat kāryaṃ mayi sarvathā || 35 ||
[Analyze grammar]

yā puṣṭiḥ sampadā syācca yā puṣṭirbalasaṃgrahaiḥ |
yā puṣṭiḥ śāstraviṣayaiḥ sā kāryā mayi sarvadā || 36 ||
[Analyze grammar]

yatsthānaṃ cāśraye nityaṃ yatsthānaṃ ca sahāyade |
yatsthānaṃ svasya hṛdaye tatkāryaṃ mayi sarvathā || 37 ||
[Analyze grammar]

yat tādātmyaṃ ca dehādau yattādātmyaṃ ca gaurave |
yattādātmyaṃ nije saukhye tatkāryaṃ mayi satpatau || 38 ||
[Analyze grammar]

yā śubhāśā nije putre yā cā''śā tvāyatau sukhe |
yā cāśā lābhasaṃlagnā sā kāryā mayi sarvadā || 39 ||
[Analyze grammar]

upārjite yā mamatā tādātmye mamatā ca yā |
yā'bhimate ca mamatā sā kāryā mayi muktaye || 40 ||
[Analyze grammar]

yaḥ prayatno viṣayārthaṃ dhanārthaṃ yaḥ prayatnakaḥ |
prāṇārthaṃ yaḥ prayatnaśca kāryaḥ sa mayi mādhave || 41 ||
[Analyze grammar]

śarīravānupādatte mohāt sarvān parigrahān |
tena vai bandhanaṃ syācca nirayaṃ tvabhiyāti saḥ || 42 ||
[Analyze grammar]

nā'śuddhamācarettasmāt samicchan brahmasadgatim |
karmaṇāṃ vighnarūpāṇāṃ phalaṃ necchet subuddhimān || 43 ||
[Analyze grammar]

yaśca karmā''carellobhānmohānmadācca matsarāt |
mokṣapanthānamutkramya sānubandhaḥ sa naśyati || 44 ||
[Analyze grammar]

tasmād rāgayujā naiva bhāvyaṃ kvacid vivekinā |
bāliśena na vai bhāvyaṃ vā mugdhena jaḍātmanā || 451 ||
[Analyze grammar]

mṛnmayaṃ tu gṛhaṃ yadvanmṛdā samparilipyate |
annamayaṃ tathā varṣma lepanīyaṃ tathānnakaiḥ || 46 ||
[Analyze grammar]

pārthivaṃ varṣma caivaitat pārthivaiḥ puṣṭimeti hi |
naitāvatā mamatvena kāryā''saktirhi varṣmaṇi || 47 ||
[Analyze grammar]

miṣṭaṃ tiktaṃ ghṛtaṃ tailaṃ snigdhaṃ dhānyaphalādikam |
mṛdvikārā mṛdo dehe'pekṣaṇīyā hi santi vai || 48 ||
[Analyze grammar]

tāvantaścopayoktavyā bandhanādivivarjitāḥ |
evaṃ yātrāṃ vinirvāhya bhavapāraṃ prayāti vai || 49 ||
[Analyze grammar]

yathā'raṇyaṃ gato yogī kvacidbhojyaṃ hi pattanāt |
gṛhṇātyapi na tatrāpi badhyate rāgatastathā || 50 ||
[Analyze grammar]

saṃsārāraṇyamātiṣṭhan śramavān yātriko bhavan |
yātrārthamadyādāhāraṃ yathā bandhāya no bhavet || 51 ||
[Analyze grammar]

indriyairmanasā buddhyā samīkṣya viṣayānapi |
śāntimicchanna lubdhaḥ syāttadā nirbandhano bhavet || 52 ||
[Analyze grammar]

vāsanābhibhūtalokā mohitā māyayā mama |
cakravat parivartante janmamṛtyubhavabhrame || 53 ||
[Analyze grammar]

tasmādajñānajān doṣān tyaktvā ca bandhanānyapi |
mama mārgaṃ samāśritya mokṣabhāk syādvivekavān || 54 ||
[Analyze grammar]

akālapuruṣāt sarvaṃ cāhaṃkāre bhramatyapi |
phalaṃ cāhaṃkṛtaṃ bhuṃkte punarmāyāṃ pragacchati || 55 ||
[Analyze grammar]

rajojanyaṃ svargarūpaṃ sthānaṃ vai bandhanaṃ param |
tamojanyaṃ rākṣasādi sthānaṃ vai bandhanaṃ param || 56 ||
[Analyze grammar]

tasmādātmavatā varjyaṃ rajaśca tama ityapi |
rajastamobhyāṃ śūnyaṃ ca sattvaṃ nirmalatāmiyāt || 57 ||
[Analyze grammar]

nairmalye cetanaḥ samyak prasādavān prajāyate |
prasādarūpaḥ prāpnuyāt parameśaprasannatām || 58 ||
[Analyze grammar]

nityaprasannatāprāpto mokṣaṃ samadhigacchati |
ātmā nara itiprokto nārī tu vāsanā matā || 59 ||
[Analyze grammar]

kṛtyā hyeṣā ghorabhāvā garte nayati kāminaḥ |
rajastamomayīmūrtirindriyāṇāṃ balapradā || 60 ||
[Analyze grammar]

vāsanā ḍākinī duṣṭā naraṃ kṣipati sāgare |
naradehe ca vā nārīdehe mohasya kāriṇī || 61 ||
[Analyze grammar]

pātayatyeva saṃghāte'śucau malinamandire |
asaṃskṛtamahāmārge rūparāgapralepite || 62 ||
[Analyze grammar]

mohātpatitaḥ puruṣo bījaṃ vapati māyikam |
jāyante jantavo bījāt putraputrītināmakāḥ || 63 ||
[Analyze grammar]

sādṛśye'tra viśeṣo'sti sāmye'pi svedajaiḥ sutaiḥ |
svedajāḥ kramayaḥ proktā dhātujāḥ sutasaṃjñakāḥ || 64 ||
[Analyze grammar]

mokṣārthī tu kramīn putrān svajātān sāmyabhāvavān |
virāgeṇa vivekena visṛjya māṃ samāśrayet || 65 ||
[Analyze grammar]

janau duḥkhe pāravaśye bālabhāve'pi duḥkhakam |
yauvane viṣayecchābhiścendriyaparatantratā || 66 ||
[Analyze grammar]

vārdhakye pāravaśye ca punarduḥkhaṃ taduttaram |
duḥkhādyantairduḥkhamadhyairnaraḥ śārīramānasaiḥ || 67 ||
[Analyze grammar]

vijñāyedaṃ duḥkhasaudhaṃ tadupekṣet māṃ śrayet |
upādānānnimittācca sahakārita ityapi || 68 ||
[Analyze grammar]

āpūrakāttathā sarvaṃ duḥkhameva hi varṣmaṇi |
tādṛśaṃ samanādṛtya tyāgānnirodhamāśrayet || 69 ||
[Analyze grammar]

mayi rodhaṃ prapannasyā'tarṣulasya vivekinaḥ |
bhaktasya mama yogena muktireva na saṃśayaḥ || 70 ||
[Analyze grammar]

tattvajñānāmṛtabhujo bhaktirasapibasya vai |
mama snehasudhāktasya mamā'kṣarapadaṃ matam || 71 ||
[Analyze grammar]

brahmacaryaṃ brahmarūpaṃ śīlaṃ cidambaraṃ matam |
cidākāśaṃ samālambya mamākāśamupāvrajet || 72 ||
[Analyze grammar]

dehākāśaṃ tathendriyākāśaṃ cāntarvikāśakam |
brahmākāśena saṃyujya haryākāśe'rpayet kṛtī || 73 ||
[Analyze grammar]

evaṃ mukto bhavatyeva mama yogamupāgataḥ |
kṛtvaivaṃ nityamabhyāsaṃ kartavyaṃ nāvaśiṣyate || 74 ||
[Analyze grammar]

ityuktvā virarāmā'sau bhagavān kṛṣṇavallabhaḥ |
rādhike sa tato mantrān dadau bhaktebhya ārthitān || 75 ||
[Analyze grammar]

tato rātrau parāṃ śāntiṃ yoganidrātmikāṃ yayau |
prātarvādyādimāṃgalyaiḥ kīrtanairyaśasāṃ śravaiḥ || 76 ||
[Analyze grammar]

jajāgāra svayaṃ nāthastrailokyāṃ maṃgalaṃ vyadhāt |
kṛtāhnikaḥ kṛtapūjaḥ kṛtasambhāvanaḥ prabhuḥ || 77 ||
[Analyze grammar]

sarvān bhaktān mahīmānān saṃbhāvya maṇḍapaṃ yayau |
tadā vādyānyavādyanta makhotsāhapravṛttaye || 78 ||
[Analyze grammar]

maṃgalā gītayaścāsan nārīṇāṃ brahmayoṣitām |
vedaghoṣā abhavaṃśca vaidikānāṃ samantataḥ || 79 ||
[Analyze grammar]

āyayuśca kratusthānaṃ makhīyāḥ karmaṭhā drutam |
avatārāśca muktāśceśvarā devā maharṣayaḥ || 80 ||
[Analyze grammar]

pitaro mānavā daityā yakṣāḥ surāśca dānavāḥ |
kāśyapyaśca prajāḥ sarvā devyaśca brahmayoṣitaḥ || 81 ||
[Analyze grammar]

nāgāḥ sarpāḥ khanijāścāyayurvai jaḍacetanāḥ |
ṣaṣṭhyāṃ prātaryajñakāryaṃ pūrvavanmunibhistadā || 82 ||
[Analyze grammar]

pravartitaṃ yathāyogyaṃ svastivācanapūrvakam |
devānāṃ pūjanaṃ jātaṃ tathā balinivedanam || 83 ||
[Analyze grammar]

havyadānaṃ ca vahnau cāhutipradānakaṃ tathā |
pitṝṇāṃ tarpaṇaṃ cāpi puṣpāñjaliśca dakṣiṇāḥ || 84 ||
[Analyze grammar]

ārārtrikaṃ parihāraḥ sarvaṃ jātaṃ yathocitam |
viprāṇāṃ bhojanaṃ cāpi mahīmānādibhojanam || 85 ||
[Analyze grammar]

yajamānādilokānāṃ bhojanāni śubhānyapi |
jātānyatha suviśramya hariḥ sāyaṃ sabhāṃ śubhām || 86 ||
[Analyze grammar]

akārayat svayaṃ tatra svāmīśrīkṛṣṇavallabhaḥ |
ācāryavaryo bhagavān janebhyaḥ pradadau manūn || 87 ||
[Analyze grammar]

tataścopādideśāpi mokṣadaṃ hitakṛcca vai |
rādhike'nādikṛṣṇaḥ śrīpatirgopālabālakaḥ || 88 ||
[Analyze grammar]

śrīkṛṣṇavallabhācāryaḥ koṭimuktābhivanditaḥ |
dhāmadhāmeśvaranāthaḥ sarvāvatārakāraṇam || 89 ||
[Analyze grammar]

asaṃkhyabrāhmīsevābhiprasāditapareśvaraḥ |
yajñe tṛptaḥ surādyaiśca pūjito mokṣadaḥ prabhuḥ || 90 ||
[Analyze grammar]

kāruṇikaḥ kāṃbhareyo'nantaśaktipatirhariḥ |
upadeśakṣaṇe sarvaistvekavṛttyā vilokitaḥ || 91 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne pañcamyāṃ rātrau prajābhya upadeśanaṃ rātrau viśramaṇaṃ ṣaṣṭhyāṃ prātaścāhnikottaraṃ yajñasamastakāryanirvartanaṃ bhojanādi cetyādinirūpaṇanāmā ṣaḍviṃśatyadhikadviśatatamo'dhyāyaḥ || 226 ||
[Analyze grammar]