Chapter 532

śrīnārāyaṇa uvāca |
śṛṇu lakṣmi camatkāraṃ munergauramukhasya vai |
āsīt kṛtayuge rājā supratīko balādhikaḥ || 1 ||
[Analyze grammar]

tasya bhāryādvayaṃ vidyutprabhā kāntimatī tathā |
aputrastoṣayāmāsa citrakūṭe tu sevayā || 2 ||
[Analyze grammar]

durvāsasaṃ varaṃ tasmāllebhe suputravān bhava |
rājā vidyutprabhāyāṃ durjayākhyaṃ prāptavān sutam || 3 ||
[Analyze grammar]

kāntimatyāṃ sudyumnākhyaṃ dvitīyaṃ prāptavān sutam |
durjayasya dadau vārāṇasīrājyaṃ nṛpastataḥ || 4 ||
[Analyze grammar]

svayaṃ tu citrakūṭādriṃ tapo'rthaṃ prajagāma ha |
durjayaścintayāmāsa rājyavṛddhiṃ prati prabhuḥ || 9 ||
[Analyze grammar]

triṃśadakṣauhiṇīsainyayutaḥ sa uttarāṃ diśam |
jitvā kiṃpuruṣaṃ harivarṣaṃ romāvrataṃ kurum || 6 ||
[Analyze grammar]

bhadrāśvaṃ merumadhyaṃ ca jitvā jetuṃ divaṃ yayau |
meruparvatamāruhya yāvat prayāti tāvatā || 7 ||
[Analyze grammar]

nārado durjayajayaṃ devarājāya coktavān |
indraḥ sainyaṃ samādāya prati yuddhaṃ cakāra ha || 8 ||
[Analyze grammar]

śaṃkarasya triśūlena durjayena parājitaḥ |
indrastadvaśatāṃ yātaḥ surāḥ sarve vaśaṃgatāḥ || 9 ||
[Analyze grammar]

durjayo lokapālāṃstu vihāyaiva bhuvaṃ yayau |
tatra dvāvasurau vidyutsuvidyunnāmakau tataḥ || 10 ||
[Analyze grammar]

āgatya durjayaṃ cobhau prāhatuḥ śṛṇu bhūpate |
lokapālānavijitya sukhaṃ na syāt kadācana || 11 ||
[Analyze grammar]

āvāṃ jeṣyāva evaitān dehi svargaṃ ca nau yadi |
omityuktvā dadau tābhyāṃ dyurājyaṃ tatsuhṛdvarau || 12 ||
[Analyze grammar]

hetuprahetṛnāmānau bahusainyaparicchadau |
manoḥ svāyaṃbhuvaḥ putrau kanye dve dadaturhiṃ te || 13 ||
[Analyze grammar]

hetukanyā sukeśī tu miśrakeśī prahetṛjā |
durjayaste hyubhe labdhvā nijaṃ rāṣṭraṃ jagāma ca || 14 ||
[Analyze grammar]

sukeśyāḥ prabhavākhyaśca miśrakeśyāḥ sudarśanaḥ |
putrau dvau durjayasyā''stām mahābalaparākramau || 15 ||
[Analyze grammar]

evaṃ rājā vardhamānastvekadā sa himālayam |
araṇyeṣu jagāmā'sau mṛgayārthaṃ sasainyakaḥ || 16 ||
[Analyze grammar]

grīṣmakālamaraṇyeṣu nināya bahusainyakaḥ |
hāstine nagare yasya rājadhānī tadā'bhavat || 17 ||
[Analyze grammar]

araṇye vāsite tenā'kṣauhiṇīpañcakaṃ balam |
pañcaviṃśatisaṃkhyākaṃ hāstine nagare dhṛtam || 18 ||
[Analyze grammar]

durjayo himabhūmīnāmaraṇye vicaraṃstadā |
dadarśāraṇyake deśe nāmnā gauramukhaṃ munim || 19 ||
[Analyze grammar]

anekarṣisusañjuṣṭaṃ mahābhāgavatottamam |
yatra vedān pāṭhayanti kumārān vai maharṣayaḥ || 20 ||
[Analyze grammar]

kanyakābhyo munibhiśca pāṭhyante vedakāṇḍikāḥ |
durjayo darśanārthaṃ vai gatastvāśramamaṇḍalam || 21 ||
[Analyze grammar]

cakāra svāgataṃ rājñastadā gauramukho muniḥ |
jagāda ca yathāśaktyā te sānugasya bhojanam || 22 ||
[Analyze grammar]

kariṣyāmi pramucyantāṃ sādhu vāhā vane'bhitaḥ |
rājā prasannastadbhaktyā''śramasyāntikameva saḥ || 23 ||
[Analyze grammar]

pañca cākṣauhiṇīsainyaṃ vāsayāmāsa satvaram |
ṛṣiḥ saṃsmṛtya manasā kṛṣṇanārāyaṇaṃ prabhum || 24 ||
[Analyze grammar]

kiṃ mayā bhojanaṃ cāsya deyamiti vicārya ca |
gaṃgājale praviśyā'yaṃ tuṣṭāva śrīnarāyaṇam || 25 ||
[Analyze grammar]

namaste śrīkṛṣṇanārāyaṇāyākṣaradhāmine |
namaste cādyarūpāya vīṇādhṛkdvibhujāya ca || 26 ||
[Analyze grammar]

śaṃkhacakrānvitalakṣmīpataye'rthadhṛge namaḥ |
sarvapradāya divyāya bhaktagoptre ca te namaḥ || 27 ||
[Analyze grammar]

pañcabhūtasthitāyā'tra hṛdayasthāya te namaḥ |
āpūrakāya sarveṣāmakṣayāya ca te namaḥ || 28 ||
[Analyze grammar]

brahmavratadharāyā'bdhau śeṣasthāya ca te namaḥ |
tvatto bhūtamidaṃ sarvaṃ sarvadātre ca te namaḥ || 29 ||
[Analyze grammar]

tvatto yajñastathā havyaṃ kavyaṃ bhojyaṃ ca vāri ca |
sarvaṃ cāsti śarīraṃ te tasmai bhojyaṃ pradehi vai || 30 ||
[Analyze grammar]

mamā'tra śrīkṛṣṇanārāyaṇa rājā hi durjayaḥ |
āgato'bhyāgatastasya cātithyaṃ kuru mādhava || 31 ||
[Analyze grammar]

ahaṃ ca tava dāso'smi kuruṣvannādisañcayam |
yaṃ yaṃ spṛśyāmi hastena yaṃ ca paśyāmi cakṣuṣā || 32 ||
[Analyze grammar]

kāṣṭhaṃ vā tṛṇakandaṃ vā tattadannaṃ caturvidham |
tathā peyaṃ jalaṃ miṣṭaṃ dugdhaṃ dadhi ghṛtādikam || 33 ||
[Analyze grammar]

tatsarvaṃ siddhyatāṃ mahyaṃ yaddhyātaṃ manasā mayā |
tavaiva tu pratāpena bhavedātithyamacyuta || 34 ||
[Analyze grammar]

iti stutaḥ prasannātmā sākṣādbabhūva sannidhau |
śrīyutaḥ śrīkṛṣṇanārāyaṇo garuḍasaṃsthitaḥ || 35 ||
[Analyze grammar]

śaṃkhacakradhanurvajradhvajaśūlakaraṃ harim |
dṛṣṭvā taṃ sa munirnatvā kṛtāñjalirathā'bravīt || 36 ||
[Analyze grammar]

idānīmeṣa nṛpatiryathā sabalavāhanaḥ |
mamāśrame kṛtāhāraḥ śvaḥ prayātā svakaṃ gṛham || 37 ||
[Analyze grammar]

tathā kuru mahārāja kṛṣṇanārāyaṇa prabho |
oṃ namaḥ śrīkṛṣṇanārāyaṇāya svāmine namaḥ || 38 ||
[Analyze grammar]

ityuktaḥ śrīharistasmai cittaśuddhiṃ dadau purā |
tataścintāmaṇiṃ divyaṃ dadau tasmai mahāprabham || 39 ||
[Analyze grammar]

taṃ datvā'ntardadhe kṛṣṇaḥ sa tu gauramukho muniḥ |
maṇiṃ spṛṣṭvā mahāsaudhaṃ cintayāmāsa connatam || 40 ||
[Analyze grammar]

himavacchikharākāraṃ gṛhaṃ vai śatabhūmikam |
śaśāṃkaraśmisaṃvyāptaṃ svarṇarājatavastukam || 41 ||
[Analyze grammar]

tādṛśānāṃ sahasrāṇi lakṣalakṣāṇi sarvaśaḥ |
gṛhāṇi nirmame vipro viṣṇormaṇeḥ prabhāvataḥ || 42 ||
[Analyze grammar]

prākārāṇi tathopānte tallagnodyānakāni ca |
kokilāhaṃsamenāsārasamayūravanti ca || 43 ||
[Analyze grammar]

campakāśokapunnāganāgakesaravanti ca |
vṛkṣavallīstambapuṣpanānādvijayutāni ca || 44 ||
[Analyze grammar]

hastināṃ hastiśālāśca turagāṇāṃ ca mandurāḥ |
uṣṭrāṇāṃ ca gavayānāṃ vṛṣabhāṇāṃ ca śālikāḥ || 45 ||
[Analyze grammar]

racayāmāsa saṃkalpāccakāra bhakṣyasañcayān |
bhakṣyaṃ bhojyaṃ tathā lehyaṃ coṣyaṃ pānaṃ saśarkaram || 46 ||
[Analyze grammar]

cakārā'nnā'dyaviṣayaṃ śākāni vyañjanāni ca |
haimarājatapātrāṇi phalāni vividhāni ca || 47 ||
[Analyze grammar]

evaṃ kṛtvā sa viprastu rājānaṃ bhūritejasam |
uvāca sarvasainyāni svasvanāmā'ṅkitagṛhān || 48 ||
[Analyze grammar]

praviśantu sukhaṃ tatra vasantu muditāni ca |
daśayojanavistāraṃ triṃśadyojanadīrghakam || 49 ||
[Analyze grammar]

sainyāni viviśurdivyaṃ nagaraṃ sūryasannibham |
rājā svabhavanaṃ tvadripronnataṃ praviveśaha || 50 ||
[Analyze grammar]

gauramukho'tha saṃgṛhya maṇiṃ rājānamāha yat |
majjanā'bhyavahārārthaṃ dāsān vilāsinīstathā || 51 ||
[Analyze grammar]

preṣayāmi ca saṃprocya maṇiṃ spṛṣṭvā jagāda saḥ |
dāsā dāsyo navāvasthā bhavantyasya prabhāvataḥ || 52 ||
[Analyze grammar]

niśceruryoṣitastāvad rājñastasya prapaśyataḥ |
sukumārāṃgarāgādyā divyāśca navayauvanāḥ || 53 ||
[Analyze grammar]

sukapolāḥ sucārvaṃgyaḥ sukeśāntāḥ sulocanāḥ |
svarṇacampakavarṇābhāḥ kumārā lakṣaśastathā || 54 ||
[Analyze grammar]

surūpāśca samārabdhayauvanā devasadṛśāḥ |
kāścit sauvarṇapātrīśca gṛhītvā sampratasthire || 55 ||
[Analyze grammar]

evaṃ sarvāḥ kumāryaśca kumārāśca prasevakāḥ |
rājñaḥ sainyasya ca kṛte cakruḥ siddhaṃ hi bhojanam || 56 ||
[Analyze grammar]

paridhānaṃ parāścakruḥ snāpayāmāsuranyakāḥ |
pādasaṃvāhanaṃ cakruranyā āstaraṇaṃ vyadhuḥ || 57 ||
[Analyze grammar]

tāmbūlāni daduścānyā miṣṭaṃ jalaṃ dadustathā |
vījayāmāsuraparāścakruḥ parāstu gāyanam || 58 ||
[Analyze grammar]

bhṛtyā yathā'bhyapekṣaṃ ca cakruḥ sevāṃ janasya vai |
nānāvidhāni tūryāṇi tatrā'vādyanta bhūriśaḥ || 59 ||
[Analyze grammar]

majjato nṛpatestasya nanṛtuścānyayoṣitaḥ |
evaṃ divyopacāreṇa snātvā rājā mahābalaḥ || 60 ||
[Analyze grammar]

vibidhānnaṃ tu vidhinā bubhuje sainyamityapi |
yathā rājñastathā bhṛtyajanasyāpi prapūjanam || 61 ||
[Analyze grammar]

gajāśvādipaśūnāṃ ca mānanaṃ cottamottamam |
cakāra munirāṭ svīyadāsadāsībhiruttamam || 62 ||
[Analyze grammar]

atha rātriḥ samāyātā candrakāntisamanvitā |
pradarśanāni ramyāṇi muninā darśitāni ca || 63 ||
[Analyze grammar]

nṛtyānyapi ca nārīṇāṃ mahotsavāśca darśitāḥ |
mallānāṃ carayuddhāni darśitāni śubhānyapi || 64 ||
[Analyze grammar]

saṃgītāni ca daivāni vādyāni cottamāni ca |
gāndharvarāgarāgiṇyo darśitā maṇimūlikāḥ || 65 ||
[Analyze grammar]

vyākhyānāni rañjanāni hāsyānyapi kṛtāni ca |
dyūtānyapīndrajālāni naṭanartanakāni ca || 66 ||
[Analyze grammar]

dṛṣṭibandhāni cānyāni darśitāni niśārdhake |
atha teṣāṃ śayaneṣu ratnasvarṇamayeṣu ca || 67 ||
[Analyze grammar]

puṣpānviteṣu mṛduṣu nāryaḥ sevāṃ pracakrire |
rājā divyāṃganābhiśca sevyate śayanottame || 68 ||
[Analyze grammar]

evaṃ sumanasastasya ṛṣermaṇeḥ prabhāvataḥ |
rājā sainyāni ca sukhaṃ hṛṣṭāḥ prasuṣupustataḥ || 69 ||
[Analyze grammar]

prātarutthānakāryārthaṃ vādyāni vividhāni ca |
avādyanta kumārīṇāṃ gāyanaiḥ saha sarvaśaḥ || 70 ||
[Analyze grammar]

snātvā rājā jalapānaṃ kṛtvā bhakṣyaṃ vidhāya ca |
sasainyastvarito gauramukhasya pūjanāya vai || 71 ||
[Analyze grammar]

āyayau parṇaśālāyāṃ yatrāste tu maṇirmuniḥ |
tataḥ kumāryo bhṛtyāśca sarvāṇyapi gṛhāṇi ca || 72 ||
[Analyze grammar]

gṛhopaskaraṇādīni bhojyapeyāni sarvaśaḥ |
antardhānaṃ gataṃ sarvaṃ kṣaṇād vanaṃ babhūva tat || 73 ||
[Analyze grammar]

sa rājā vismayāpannaścintayāmāsa vīkṣya tat |
kathamevaṃ maṇirmahyaṃ bhavatīti punaḥ punaḥ || 74 ||
[Analyze grammar]

cintāmaṇimimaṃ tvasya harāmīti vicintya saḥ |
natvā''śramabahirbhāge gatvā tūvāca mantriṇam || 75 ||
[Analyze grammar]

virocana muniṃ yāhi yācanāṃ kuru vai maṇeḥ |
sa tamṛṣiṃ samāgatya maṇiṃ yācitumudyataḥ || 76 ||
[Analyze grammar]

ratnānāṃ bhājanaṃ rājā maṇiṃ tasmai pradīyatām |
amātyenaivamuktastu kruddho gauramukho'bravīt || 77 ||
[Analyze grammar]

rājā dātā bhavennityaṃ pratigrāhī tu bhūsuraḥ |
tvaṃ ca rājā svayaṃ bhūtvā yācase dīnavat katham || 78 ||
[Analyze grammar]

ayogyastvaṃ maṇeḥ pātraṃ nāsi mā yācanāṃ kuru |
trailokyaṃ yasya vaśagaṃ svargaṃ pātālamityapi || 79 ||
[Analyze grammar]

meruḥ ratnākarāścāpi tathāpyaho daridratā |
brāhmaṇasya dhane vāñchāṃ karoṣi nyāyavarjitām || 80 ||
[Analyze grammar]

atṛptasyā'jñāninastu sarve syurviṣayā gṛhe |
tathāpi tṛṣṇayā śāntiṃ nādhigacchati pāpavān || 81 ||
[Analyze grammar]

evaṃ brūhi durācāraṃ rājānaṃ durjayaṃ svayam |
gaccha drutaṃ ca yāvatte vighnaḥ kaścinna jāyate || 82 ||
[Analyze grammar]

dūto jagāma rājānaṃ proktavāṃśca yathocitam |
krudhā nīlākhyasāmantaṃ rājā''ha gaccha mā ciram || 83 ||
[Analyze grammar]

viprasya maṇimāhṛtya tūrṇamehi mamāntikam |
nīlo yayau tathā śīghraṃ maṇeḥ kuṭyāṃ pragacchati || 84 ||
[Analyze grammar]

tāvanmaṇestu nirjagmuḥ koṭiśaḥ śastrapāṇayaḥ |
yoddhāraḥ sarathāścānye sadhvajāścāsicarmiṇaḥ || 85 ||
[Analyze grammar]

sadhanustūṇīrabāṇāḥ śaktibhūśuṇḍikānvitāḥ |
pañcadaśākṣauhiṇyaśca pañcadaśa ca nāyakāḥ || 86 ||
[Analyze grammar]

nāmabhiḥ suprabho dīptitejāśca śubhadarśanaḥ |
sukāntiḥ sundaraḥ sundaḥ pradyumnaḥ sumanāḥ śubhaḥ || 87 ||
[Analyze grammar]

suśīlaḥ sukhadaḥ śambhuḥ sudāntaḥ soma ityapi |
suraśmiśceti te sarve yodhayāmāsurulbaṇāḥ || 88 ||
[Analyze grammar]

bhūśuṇḍikāstathā śūlāḥ khaḍgāni ca dhanūṃṣi ca |
patanti ca gadā vajrāḥ śaktayaśca suyodhinām || 89 ||
[Analyze grammar]

ratho rathaṃ parivārya tasthau gajo gajaṃ tathā |
hayo hayaṃ padātiśca padātiṃ prasasāra vai || 90 ||
[Analyze grammar]

raṇe tvavirate tatra nadī raktasamutthitā |
rājñaḥ sacivo visaṃjñaḥ sasainyaśca hato raṇe || 91 ||
[Analyze grammar]

durjayastu svayaṃ tatra maṇijaiḥ saṃyuyodha ha |
avaśiṣṭasya sainyasya sarvaṃ kadanamābabhau || 92 ||
[Analyze grammar]

atha hetṛprahetṛbhyāṃ śruto jāmeḥ raṇo mahān |
yudhyatastau sahāye'sya camvaḥ pañcadaśolbaṇāḥ || 93 ||
[Analyze grammar]

nāyakāḥ pañca ca daśa preṣitā raṇamūrdhani |
ye punarnotthitā naṣṭā nāmatastān prakarṇaya || 94 ||
[Analyze grammar]

praghaso vighasaścāpi saghasaścāśaniprabhaḥ |
vidyutprabhaḥ sughoṣaśca pronmattākṣaḥ pratardanaḥ || 95 ||
[Analyze grammar]

agnidanto'gnitejāśca bāhuḥ śakro virodhakaḥ |
bhīmakarmā vipracittiḥ daiteyāḥ paramāyudhāḥ || 96 ||
[Analyze grammar]

mahāmāyā yuyudhuste maṇijairyodhṛpuṃgavaiḥ |
pañcadaśākṣauhiṇyaśca daiteyānāṃ hatāstu tāḥ || 97 ||
[Analyze grammar]

tāvat hetā prahetā cāyayatuḥ sainyakoṭibhiḥ |
vidyut suvidyuśca tāvat svargeśāvasurāvubhau || 98 ||
[Analyze grammar]

triṃśadakṣauhiṇīyuktau śrutvā yuddhe sahāyadau |
āyayaturhimadeśe kampitā'bhūdvasundharā || 99 ||
[Analyze grammar]

raktavāhā nadī tatra tvabdhiṃ prāptuṃ drutaṃ gatā |
atha gauramukho dṛṣṭvā'nantaṃ sainyaṃ tu rakṣasām || 100 ||
[Analyze grammar]

sasmāra śrīkṛṣṇanārāyaṇaṃ maṇipatiṃ prabhum |
śrīhariḥ puratastasya pītavāsāḥ khagāsanaḥ || 101 ||
[Analyze grammar]

samāgatya samuvāca vada kiṃ kāryamatra me |
ṛṣiḥ provāca bhagavan jahīmaṃ durjayaṃ nṛpam || 102 ||
[Analyze grammar]

daiteyāṃśceti vai śrutvā cakraṃ mumoca daityahā |
koṭisūryasamaṃ cakraṃ bhasmīcakāra durjayam || 103 ||
[Analyze grammar]

sainyānyapi ca rakṣāṃsi naiko'pyatrā'vaśiṣyate |
uvāca nimiṣeṇedaṃ nihataṃ dānavaṃ kulam || 104 ||
[Analyze grammar]

araṇye'smiṃstatasvetannamiṣāraṇyasaṃjñitam |
bhaviṣyati yathārthaṃ ca ṛṣīṇāṃ sanniveśanam || 105 ||
[Analyze grammar]

ahaṃ ca yajñapuruṣa etasmin vanagocare |
nāmnā yājyāḥ sadā ceme pañcadaśa ca nāyakāḥ || 106 ||
[Analyze grammar]

kṛte yuge kramādete syurnṛpā maṇijā ime |
evamuktvā maṇiṃ nītvā devo'ntardhānamāgataḥ || 107 ||
[Analyze grammar]

dvijo'pi svāśrame tasthau mudā paramayā yutaḥ |
sainyānyapi ca sarvāṇi śrīviṣṇau līnatāṃ yayuḥ || 108 ||
[Analyze grammar]

durjayaḥ śrīharau tatra līno babhūva yogataḥ |
cakrahatāni sainyāni svargaṃ gatāni yogataḥ || 109 ||
[Analyze grammar]

evaṃ nārāyaṇasyāṃśā uktā maṇyudbhavāḥ priye |
paṭhanāchravaṇāccāsya muktiḥ syāt svargamityapi || 110 ||
[Analyze grammar]

atha gauramukho vipra ārirādhayiṣurharim |
yuddhadurītanāśārthaṃ prabhāsakṣetramāyayau || 111 ||
[Analyze grammar]

saurāṣṭre raivatī bhūmau snātvā dāmodarāhvaye |
kuṇḍe nārāyaṇahrade samudre gomatīyute || 112 ||
[Analyze grammar]

prācyāṃ cāpi sarasvatyāṃ cāśvapaṭṭasaro yayau |
kuṃkumavāpikākṣetre lomaśasyāśrame śubhe || 113 ||
[Analyze grammar]

tatrā''jagāma ṛṣirāṭ mārkaṇḍeyo mahāmuniḥ |
lomaśaṃ prathamaṃ natvā mārkaṇḍeyaṃ nanāma saḥ || 114 ||
[Analyze grammar]

maṇeḥ samarpayitāraṃ kṛṣṇanārāyaṇaṃ prabhum |
pratyakṣaṃ vartamānaṃ taṃ gopālakṛṣṇanandanam || 115 ||
[Analyze grammar]

ātmānaṃ ca kṛtārthaṃ vai mene gauramukho muniḥ |
oṃ namaḥ śrīkṛṣṇanārāyaṇāya svāmine namaḥ || 116 ||
[Analyze grammar]

itimantraṃ japan devaṃ mārkaṇḍeyaṃ papraccha saḥ |
mṛtānāṃ mokṣaṇārthaṃ ca durītakṣayakārakam || 117 ||
[Analyze grammar]

mayā'tra kimanuṣṭheyaṃ śādhi mamātra tīrthake |
mārkaṇḍeyaśca taṃ prāha kṛṣṇanārāyaṇo hariḥ || 118 ||
[Analyze grammar]

sarveṣāmeva devānāmādyo'tra vartate prabhuḥ |
pratyakṣaṃ taṃ bhaja kṛṣṇanārāyaṇaṃ śriyaḥ patim || 119 ||
[Analyze grammar]

tena muktiśca sarveṣāṃ durītānāṃ ca nāśanam |
bhaviṣyatyeva kṣetre'smin śrāddhāni kuru cātra vai || 120 ||
[Analyze grammar]

ityuktaḥ sa muniḥ śrāddhāni cakre mokṣakāṃkṣayā |
yuddhe mṛtāśca ye teṣāmuddhāraṃ kṛtavān svayam || 121 ||
[Analyze grammar]

vimānaiste gatāḥ sarve'kṣaraṃ dhāma parātmanaḥ |
ayaṃ gauramukhaḥ pūrve janmanyāsīd bhṛguḥ svayam || 122 ||
[Analyze grammar]

tadanvayātmajastveṣo mārkaṇḍeyo munīśvaraḥ |
śrāddhena bodhayāmāsa putrastaṃ pitaraṃ punaḥ || 123 ||
[Analyze grammar]

atha gauramukhastatra jñātvā kṛtvā ca tarpaṇam |
sasmāra sarvajanmāni smṛtvā kṛṣṇanarāyaṇe || 124 ||
[Analyze grammar]

sarvātmanā'rpito bhūtvā yayau dhāmā'kṣarā'bhidham |
layaṃ jagāma sarveśe cā'punarbhavasaṃjñite || 125 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne durjayasya trilokarājyaṃ gauramukhāśrame śrīkṛṣṇanārāyaṇārpitamaṇinā susvāgataṃ cintāmaṇyarthe yuddhaṃ durjayādivināśaḥ gauramukhasya prabhāsā''gamanaṃ muktiścetyādinirūpaṇanāmā dvātriṃśadadhikapañcaśatatamo'dhyāyaḥ || 532 ||
[Analyze grammar]