Chapter 185

śrīlakṣmīruvāca |
hare himālayaṃ prāpte pārvatyā śaṃbhulabdhaye |
kṛtaṃ kiṃ śaṃbhunā cāpi kiṃ kṛtaṃ tad vadasva me || 1 ||
[Analyze grammar]

śrīnārāyaṇa uvāca |
satī tepe harārthaṃ ca harastepe satīkṛte |
dvayoryatno'bhavadvegānmahālakṣmi nibodha me || 2 ||
[Analyze grammar]

kāṃścid gaṇavarānśāntānnandyādīnavagṛhya saḥ |
gaṃgāvatāramagamat himavatprasthamīśvaraḥ || 3 ||
[Analyze grammar]

yatra gaṃgā brahmalokātprathamaṃ patitā girau |
tapaḥprāraṃbhamakarot sthitvā tatra vaśī haraḥ || 4 ||
[Analyze grammar]

ekāgraṃ cintayāmāsa svātmānaṃ brahma yatparam |
dhyānasthitā gaṇāḥ kecitkecitsevāparāstadā || 5 ||
[Analyze grammar]

ke'pi maunaparāścāsan dvārapāḥ kecanā'bhavat |
etasminnantare tatra jagāma himabhūdharaḥ || 6 ||
[Analyze grammar]

praṇanāma prabhuṃ rudraṃ tuṣṭāva ca kṛtāṃjaliḥ |
devadeva mahādeva yogirūpa namo'stu te || 7 ||
[Analyze grammar]

nirguṇāya saguṇāya līlākārāya te namaḥ |
paripūrṇāya vikṛtirahitāya ca te namaḥ || 8 ||
[Analyze grammar]

śāntāya sukharūpāya brahmaṇe te namonamaḥ |
tapaḥphalapradātre te tapaḥsthāya namonamaḥ || 9 ||
[Analyze grammar]

abahirbhogakārāya namaste paramātmane |
paramātmasvarūpāya te satīpataye namaḥ || 10 ||
[Analyze grammar]

bhāgyodayaphalaṃ me'tra tvāgatastvaṃ mama gṛhe |
sanāthaṃ kṛtavān māṃ tvaṃ prabho sādhusukhaprad || 11 ||
[Analyze grammar]

adya me saphalaṃ janma saphalaṃ jīvanaṃ mama |
adya me saphalaṃ sarvaṃ yadatra tvaṃ samāgataḥ || 12 ||
[Analyze grammar]

jñātvā'nanyaṃ tava dāsaṃ cājñāṃ dehi yadi prabho |
tvatsevāṃ tu sadā prītyā kuryāṃ dāsyavidhānataḥ || 13 ||
[Analyze grammar]

śrutvā netre samunmīlya dṛṣṭvā'grasthaṃ himālayam |
prītyā provāca śailendraṃ dhyānayogasthito haraḥ || 14 ||
[Analyze grammar]

tava pṛṣṭhe tapastaptuṃ rahasyamahamāgataḥ |
yathā na kopi nikaṭe samāyādvai tathā kuru || 15 ||
[Analyze grammar]

tvamāśrayo muniyogiyatisanyāsināṃ tathā |
devarṣiyakṣagandharvarākṣasadvijanākinām || 16 ||
[Analyze grammar]

tapodhāmā mahātmā'si gaṃgāpūto'si sarvadā |
sadā paropakārī ca girīṇāmadhipo mahān || 17 ||
[Analyze grammar]

ahaṃ tapaścarāmyatra gaṃgāvataraṇe sthale |
nirvighnaṃ me tapo bhūyātsāhāyyaṃ sevanaṃ kuru || 18 ||
[Analyze grammar]

śrutvā śailastadā śaṃbhuṃ praṇayādidamabravīt |
kariṣye sarvathā rakṣāṃ vighnaṃ tapasi mā bhavet || 19 ||
[Analyze grammar]

nirvighnaṃ kuru deveśa svatantraḥ parama tapaḥ |
kariṣye'haṃ tathā sevāṃ dāsavanniyatasthitaḥ || 20 ||
[Analyze grammar]

devendrādadhikaṃ manye svamanugrahabhājanam |
aprāpyaścogratapasā sa tvaṃ svayamupasthitaḥ || 21 ||
[Analyze grammar]

no'nyo'sti puṇyavānmatto yatpṛṣṭhe tapasi sthitaḥ |
gacchāmyājñāpālanārthaṃ prasanno bhava sarvadā || 22 ||
[Analyze grammar]

ityuktvā svasthalaṃ gatvā'mātyādīnāha sarvathā |
yāntu gaṃgāvataraṇe parito rakṣaṇāya vai || 23 ||
[Analyze grammar]

tapaḥ karoti deveśo matprasthe dhyānasaṃsthitaḥ |
tatrā'dyaprabhṛti kopi mā yātu svaḥ paropi vā || 24 ||
[Analyze grammar]

gamiṣyati janaḥ kaścittatra cettaṃ mahākhalam |
daṇḍayiṣye viśeṣeṇa śaṃkarasya kṛte'pyaham || 25 ||
[Analyze grammar]

ājñāpyā'tha svayaṃ śailaḥ satpuṣpaphalasaṃcayam |
samādāya svatanayāsahito'gāt śivāntikam || 26 ||
[Analyze grammar]

natvā cāgre phalādīni nidhāya prāha śaṃkaram |
bhagavan tanayā me tvāṃ sevituṃ pārvatī satī || 27 ||
[Analyze grammar]

sakhībhyāṃ sahitā''nītā sevane'styutsukā tava |
anujānīhi tāṃ nātha mayi te yadyanugrahaḥ || 28 ||
[Analyze grammar]

atha tāṃ śaṃkaro'paśyatprathamārūḍhayauvanām |
phullendīvarapuṣpābhāṃ pūrṇacandrasamānanām || 29 ||
[Analyze grammar]

surūpāṃ ca viśālākṣīṃ svarṇakāntisamujjvalāma |
rājīvakuḍmalaprakhyaghanapīnadṛḍhastanīm || 30 ||
[Analyze grammar]

tanumadhyāṃ sthūlaśroṇīṃ trivalīyukkṛśodarīm |
sthalapadmapratīkāśapādasaundaryarājitām || 31 ||
[Analyze grammar]

tapaso bhraśane śaktāṃ komalāṃ kāmavardhinīm |
dṛṣṭvā nyamīlayannetre śīghraṃ dadhyau svarūpakam || 32 ||
[Analyze grammar]

prāha śailastadā śaṃbhuṃ paśya māṃ śaraṇāgatam |
na tvāṃ jānanti śāstrāṇyatītaṃ vāṅmanasoḥ sadā || 33 ||
[Analyze grammar]

atadvyāvṛttitastvāṃ cā'bhidhatte śrutirīśvarī |
yeṣu kṛpā tvayā kṣiptā bhaktā jānanti te haram || 34 ||
[Analyze grammar]

sabhāgyo'haṃ prasādātte matvā dāsaṃ kṛpāṃ kuru |
anayā sutayā svāmin seviṣye'nvahamādarāt || 35 ||
[Analyze grammar]

śrutvā netre samunmīlya devadevo'bravīttadā |
kumārīṃ sadane tyaktvā sevāṃ kuru mamā'cala || 36 ||
[Analyze grammar]

śailaḥ prāha kathaṃ putrīṃ nā'nayeyaṃ vada prabho |
śaṃbhuḥ prāha sadā nārī māyā vighnaṃ tapasvinām || 37 ||
[Analyze grammar]

tapasvī yuvatīsaṃgāttapasā bhraśyati dhruvam |
atastapasvinā śaila na kāryaṃ strīprasaṃjanam || 38 ||
[Analyze grammar]

śrutvaivaṃ ca tadā natvā bhavānī vākyamabravīt |
yayā śaktyā tvayā rudra tapaḥ saṃkriyate'dhunā || 39 ||
[Analyze grammar]

sā śaktiḥ prakṛtirmūlā tvayi tiṣṭhati sā satī |
tvāṃ vinā tu kathaṃ cārcyo vandyo dhyeyo bhaviṣyasi || 40 ||
[Analyze grammar]

śaṃbhuḥ prāha prakṛtiṃ tāṃ vināśya tapasā tataḥ |
sthāsyāmyahaṃ parabrahmasvarūpo'vikṛtaḥ sukhī || 41 ||
[Analyze grammar]

kālyuvāca tadā śaṃbhuṃ prakṛtidhvaṃsanasthitiḥ |
sā kiṃ prakṛtiranyā vā vicāryaiva samucyatām || 42 ||
[Analyze grammar]

tadānīmapi sā brāhmī sthitiḥ prakṛtirucyate |
idānīṃ śāṃbhavī sā ca sthitiḥ prakṛtirucyate || 43 ||
[Analyze grammar]

prakṛteḥ paramaścet tvaṃ kimarthaṃ tapase tapaḥ |
prakṛterantaraścet tvaṃ kathaṃ satīṃ niṣedhasi || 44 ||
[Analyze grammar]

kiṃ bahūktena yogīśa yadarthaṃ tapase tapaḥ |
pratyakṣaṃ balavatsarvapramāṇebhyastathā'tra tat || 45 ||
[Analyze grammar]

sa cāhaṃ puruṣo'si tvaṃ mayaiva saguṇo bhavān |
māṃ vinā tvaṃ nirīhaḥ sanna kiṃcitkartumarhasi || 46 ||
[Analyze grammar]

evaṃsthite na bhettavyaṃ matsānnidhye'pi nirguṇa |
śaṃbhuḥ prāha tadā devīṃ yadyahaṃ brahma nirguṇaḥ || 47 ||
[Analyze grammar]

nirlepaścāpyakartā cā'bhoktā hyātmā niraṃjanaḥ |
tadā sevāṃ kuru saumye tvaṃ kariṣyasi kinnu mām || 48 ||
[Analyze grammar]

pitrā bināpi sā kālī sakhībhyāṃ saha nityaśaḥ |
sevāyāṃ vartate nityaṃ sā śaṃbhoranapāyinī || 49 ||
[Analyze grammar]

idameva mahaddhairyaṃ dhīrāṇāṃ sutapasvinām |
vighnasvarūpayā cāpi kṛtavighnairna hanyate || 50 ||
[Analyze grammar]

kālī prakṣālya caraṇau papau taccaraṇodakam |
vahniśaucena vastreṇa cakre tadrātramārjanam || 51 ||
[Analyze grammar]

ṣoḍaśabhirupacāraiḥ sampūjya vidhivaddharam |
punaḥ punaḥ praṇamyaiva yayau kvacitpiturgṛham || 52 ||
[Analyze grammar]

bahule samaye yāte sasakhī śaṃkarāśrame |
vitene sundara gānaṃ sutālaṃ smaravardhanam || 53 ||
[Analyze grammar]

visismiye vīkṣamāṇā sakāmā śaṃkaraṃ prabhum |
śaṃkaro'pi kvacittāṃ saṃcintayatyeva sarvathā || 54 ||
[Analyze grammar]

mahālāvaṇyanicayāṃ sarvadā nikaṭasthitām |
cintayamānāṃ satataṃ śaṃbhuṃ patidhiyā'cyutam || 55 ||
[Analyze grammar]

etasminnantare devāḥ śakrādyā munayastathā |
brahmādyāśca mahāduṣṭatārakeṇa prapīḍitāḥ || 56 ||
[Analyze grammar]

kāmaṃ saṃpreṣya ca tayoryogaṃ kārayituṃ muhuḥ |
akurvanbahudhā yatnaṃ haraḥ kintu na cukṣubhe || 57 ||
[Analyze grammar]

śivavīryasamutpannaṃ putraṃ vinā na tārakaḥ |
mahāsuro vinaśyedvai vicintyendraḥ punaḥ punaḥ || 58 ||
[Analyze grammar]

sasmāra smaramatyarthaṃ savasantaṃ ratipriyam |
āgatastatkṣaṇātkāmaḥ savasanto ratipriyaḥ || 59 ||
[Analyze grammar]

provāca prāṃjaliḥ śakraṃ dāso'yaṃ samupasthitaḥ |
indraḥ prāha vijayasva sanmitraṃ tvaṃ mahānmama || 60 ||
[Analyze grammar]

jayārthaṃ me dvayaṃ śastraṃ vajraṃ kāmaśca sarvadā |
vajraṃ tu niṣphalaṃ syādvai tvaṃ tu naiva kadācana || 61 ||
[Analyze grammar]

dātuḥ parīkṣā durbhikṣe raṇe śūrasya jāyate |
āpatkāle tu mitrasyā'śaktau strīṇāṃ kulasya ca || 62 ||
[Analyze grammar]

kṣamāyāḥ saṃkaṭe prāpte satyasya tu parokṣake |
susnehasya mahatkārye nā'nyathā tatparīkṣaṇam || 63 ||
[Analyze grammar]

vyarthaṃ ca bahu yo brūte sa kiṃ kāryaṃ kariṣyati |
sarvasurādisaṃprārthya kārya caitatkuru smara || 64 ||
[Analyze grammar]

smaraḥ prāha tadendraṃ vai grahītuṃ tvatpadaṃ yadi |
tapaḥ karoti kaściccet pātayāmi kṣaṇāntare || 65 ||
[Analyze grammar]

strīkaṭākṣairbhraṃśayāmi kṣaṇāt devarṣidānavān |
vajraṃ śastraṃ tathā'straṃ te dūre'stu mayyupasthite || 66 ||
[Analyze grammar]

brahmāṇaṃ śaṃkaraṃ viṣṇuṃ pātayeyaṃ kṣaṇāntare |
anyeṣāṃ gaṇanā nāsti madvaśā māyikā''kṛtiḥ || 67 ||
[Analyze grammar]

paṃcaiva mṛdavo bāṇāste ca puṣpamayā mama |
cāpastridhā puṣpamayaḥ śiṃjinī bhramarārjitā || 68 ||
[Analyze grammar]

balaṃ suyuvatī me'sti vasantaḥ sacivaḥ sadā |
ahaṃ paṃcabalo devo mitraṃ mama sudhākaraḥ || 69 ||
[Analyze grammar]

senāpatiśca śṛṃgāro hāvabhāvāśca sainikāḥ |
tāni me mṛduśastrāṇi mṛduścāpyahameva vai || 70 ||
[Analyze grammar]

yadyena pūryate kāryaṃ dhīmāṃstat tena sādhayet |
mama yogyaṃ tu yatkāryaṃ tatra māṃ vai niyojaya || 71 ||
[Analyze grammar]

śrutvā mahendrastaṃ prāha brahmaṇā'bhihitaṃ purā |
tārakākhyamahādaityamaraṇaṃ śāṃbhavātsutāt || 72 ||
[Analyze grammar]

bhaviṣyatīti śaṃbhośca sevāyāṃ pārvatī satī |
vartate ca rucistasyāṃ yathā śarvasya jāyate || 73 ||
[Analyze grammar]

tathā kāryaṃ tvayā kāryaṃ sarvaṃ duḥkhaṃ vinaṃkṣyati |
omityuktvā ca natvā ca yayau smaraḥ samaṇḍalaḥ || 74 ||
[Analyze grammar]

sa tu prāpyā'karot cintāṃ kāryasyopāyapūrvikām |
mahātmāno hi niṣkampā manasteṣāṃ sudurjayam || 75 ||
[Analyze grammar]

tadādāveva saṃkṣubhya tatasteṣāṃ jayo bhavet |
krodhakrūratarāsaṃgādbhīṣaṇerṣyāmahāsakhī || 76 ||
[Analyze grammar]

cāpalyānmūrdhni vidhvastadhairyādhāramahābalā |
tāmasya viniyokṣyāmi manaso vikṛtiṃ puraḥ || 77 ||
[Analyze grammar]

pidhāya dhairyadvārāṇi santoṣamapakṛṣya ca |
kāmatṛṣṇāṃ samudbhāvya praviśāmi tato hare || 78 ||
[Analyze grammar]

cintayitveti madano jagāma haramandiram |
dadarśa śaṃkaraṃ kāmaḥ kramaprāptāntikaḥ śanaiḥ || 79 ||
[Analyze grammar]

mohakaḥ sa madhoścādau dharmān vistārayan sthitaḥ |
vasantasya tadā dharmaḥ prasasāra ca sarvataḥ || 80 ||
[Analyze grammar]

vanāni ca praphullāni puṣpāṇi cūtaśākhinām |
aśokānāṃ ca kalikāḥ virejuḥ saurabhānvitāḥ || 81 ||
[Analyze grammar]

kairavāṇi ca puṣpāṇi bhramarākalitāni ca |
babhūburmadanāveśakarāṇi ca viśeṣataḥ || 82 ||
[Analyze grammar]

sukāmoddīpanakaraṃ kokilākalakūjitam |
āsīdapisuramyaṃ ca manoharamatipriyam || 83 ||
[Analyze grammar]

kāmoddīpakarāḥ śabdā dvirephāṇāṃ tadā'bhavan |
candrasya viśadā kāntirvikīrṇā'bhūtsamantataḥ || 84 ||
[Analyze grammar]

kāmināṃ kāminīnāṃ ca sā'bhavat śītadīpikā |
mārutaścainayoryogakṛtsukhaḥ saṃvavau tadā || 85 ||
[Analyze grammar]

evaṃ vasantavistāro hyabhūnmadanabodhakaḥ |
acetasāmapi tarhi kāmāśaktirabhūt priye || 86 ||
[Analyze grammar]

sacetasāṃ tu jīvānāṃ lakṣmi kā varṇyate kathā |
vanaukasāṃ munīnāṃ tāpasānāṃ duḥsaho'pyabhūt || 87 ||
[Analyze grammar]

tato bhramarahuṃkāramālambyā'dṛśyavigrahaḥ |
praviṣṭaḥ karṇarandhreṇa bhavasya madano manaḥ || 88 ||
[Analyze grammar]

śaṃkarastamathā''karṇya madhuraṃ madanāśrayam |
sasmāra ca satīṃ tatra dayitāṃ rantumānasaḥ || 89 ||
[Analyze grammar]

tataḥ sā tasthau śanakaistirodhāyā'tinirmalā |
viveśa madano drāk ca vikṛtiṃ nītavāṃstadā || 90 ||
[Analyze grammar]

īṣatkrodhasamāviṣṭo dhairyamālambya dhūrjaṭiḥ |
nirasya madanaṃ yogasāmarthyena vyavasthitaḥ || 91 ||
[Analyze grammar]

tataḥ smaraḥ prajajvāla nirgato hṛdayād bahiḥ |
cūtaṃ bāṇaṃ samākṛṣya sthitastadvāmapārśvataḥ || 92 ||
[Analyze grammar]

sahakāratarordṛṣṭvā mandamārutakampitam |
stabakaṃ madano ramyaṃ haravakṣasi satvaram || 93 ||
[Analyze grammar]

mumoca mohanaṃ nāma mārgaṇaṃ makaradhvajaḥ |
harasya hṛdye puṣpabāṇaḥ papāta mohanaḥ || 94 ||
[Analyze grammar]

babhūva viddhahṛdayo'dhairyaśca madanonmukhaḥ |
evaṃ pravṛttasuratau śṛṃgāro'pi gaṇaiḥ saha || 95 ||
[Analyze grammar]

hāvabhāvayutastatra praviveśa harāntikam |
haro'pi yogavibhavādakampo'bhūnnijātmani || 96 ||
[Analyze grammar]

na dṛṣṭavānsmaracchidraṃ tadā yena viśatyapi |
etasminnantare tatra sakhībhyāṃ sahitā śivā || 97 ||
[Analyze grammar]

vyaktaṃ śaṃkarapūjārthaṃ nītvā puṣpāṇyanekaśaḥ |
saundaryayauvanonmattā śivā tasthau śivāntike || 98 ||
[Analyze grammar]

tadaiva śaṃkaro dhyānaṃ tyaktvā kṣaṇamavasthitaḥ |
tacchidraṃ prāpya madano harṣaṇākhyaśareṇa tam || 99 ||
[Analyze grammar]

harṣayāmāsa śaṃbhuṃ ca dṛṣṭvā ca harṣitaṃ satī |
śṛṃgārairvividhairbhāvairdadau kāmasahāyatām || 100 ||
[Analyze grammar]

tadaiva ca punaḥ kāmo rucyākhyaṃ prairayaccharam |
rucimantaṃ haraṃ dṛṣṭvā'muṃcatpuṣpaśaraṃ smaraḥ || 101 ||
[Analyze grammar]

tena vai śaṃbhunā dṛṣṭā strīsvabhāvātsulajjayā |
vivṛṇvatī nijāṃgāni saṃśleṣārthamupasthitā ||10 || || 2 ||
[Analyze grammar]

pūjānimittamālambya spṛṣṭau ca caraṇau tayā |
hārārpaṇaṃ samālambya spṛṣṭau gaṇḍakapolakau || 103 ||
[Analyze grammar]

lalāṭabindumālambya spṛṣṭā bhālā'kṣisubhruvaḥ |
puṣpakaṭakamālambya spṛṣṭāḥ karatalādayaḥ || 104 ||
[Analyze grammar]

puṣparaśanāmālambya spṛṣṭāḥ kaṭyūrunābhayaḥ |
candanadravamālambya spṛṣṭānyaṃgāni sarvaśaḥ || 105 ||
[Analyze grammar]

śivaḥ sparśairmahāmugdho varṇayāmāsa pārvatīm |
kiṃ mukhaṃ kiṃ śaśāṃkaśca kiṃ netre cotpale ca kim || 106 ||
[Analyze grammar]

aho bhrukuṭyau dhanuṣī kandarpabhavanā'rhaṇe |
adharaḥ kiṃ ca bimbaṃ kiṃ kiṃ nāsā śukacañcukā || 107 ||
[Analyze grammar]

kiṃ svaraḥ kokilālāpaḥ kiṃ madhyaṃ kiṃ ca vedikā |
kiṃ rūpaṃ kiṃ gatiścāsyāḥ kiṃ vastrābhūṣaṇārhatā || 108 ||
[Analyze grammar]

kiṃ lālityaṃ ca kiṃ sarvāvayavaiḥ ramaṇīyatā |
aho'dbhutākṛtiśceyaṃ lāvaṇyakāmanānidhiḥ || 100 ||
[Analyze grammar]

madarthaṃ nirmitā ceyaṃ gṛhṇāmyeva na saṃśayaḥ |
iti kṛtvā harastasyā acālayata cā'mbaram || 110 ||
[Analyze grammar]

tāvatkumārikābhāvāllajjitā dūrato gatā |
vivṛṇvatī nijāṃgāni paśyantī ca muhurmuhuḥ || 111 ||
[Analyze grammar]

suvīkṣaṇairmahāmodāt susmitā tiṣṭhati sma sā |
śaṃbhurvicintayāmāsa dṛṣṭvā bhogyārhasundarīm || 112 ||
[Analyze grammar]

asyā darśanamātreṇa mahānando bhavatyaho |
yadāliṃganametasyāḥ kuryāṃ kiṃ kiṃ mahatsukham || 113 ||
[Analyze grammar]

vicāryetthaṃ samutthāya pārvatīmabhigacchati |
tathā tathā tu sā devī paścātpaścādvisarpati || 114 ||
[Analyze grammar]

tadā svaṃ tadvaśaṃ jñātvā jñātvā tāṃ svā'vaśāṃ tathā |
vicāraṃ kṛtavān śaṃbhuḥ keyaṃ nārīviḍambanā || 115 ||
[Analyze grammar]

īśvaro'haṃ yadīccheyaṃ parāṃgasparśanaṃ vaśī |
tarhi ko'nyo'kṣamaḥ kṣudraḥ kiṃ kiṃ naiva kariṣyati || 116 ||
[Analyze grammar]

kimu vighnāḥ samutpannāḥ kurvatastapa uttamam |
kena me vikṛtaṃ citta kṛtamatra pradharṣiṇā || 117 ||
[Analyze grammar]

asvastrīdharṣaṇaṃ dharmavirodhaḥ śrutilaṃghanam |
na yogyaṃ tanmādṛśānāṃ kathamīdṛkdṛśāṃ gataḥ || 118 ||
[Analyze grammar]

vicārthetthaṃ sa parito lokayāmāsa śaṃkitaḥ |
vāmabhāge sthitaṃ kāmaṃ dadarśā''kṛṣṭabāṇakam || 119 ||
[Analyze grammar]

tāvacchaṃbhormahākrodhaḥ saṃjātastatkṣaṇe priye |
kāmo'pyuḍḍīya vyomasthaścikṣepā'moghamārgaṇām || 120 ||
[Analyze grammar]

amoghamapi moghaṃ tajjātaṃ kruddhe maheśvare |
manmatho bhayamāpā''śu cakampe bhayavihvalaḥ || 121 ||
[Analyze grammar]

sasmāra tridaśānsarvān te'pyāyayuśca tuṣṭuvuḥ |
tathāpi ca mahākrodhānalavyāptānane sati || 122 ||
[Analyze grammar]

netratrayaṃ ca bhālaṃ cā'niyamyā'nalapūritam |
jātaṃ raudraṃ vikarālaṃ bhayaṃkaraṃ lalāṭakam || 123 ||
[Analyze grammar]

prasahya vahninā netraṃ tṛtīyaṃ jāgrataṃ kṛtam |
rudrasya raudravapuṣo jagatsaṃhārabhairavāt || 124 ||
[Analyze grammar]

lalāṭamadhyagānnetrāttṛtīyātpūravegataḥ |
niḥsasāra mahāvahniḥ pralayāgnisamaprabhaḥ || 125 ||
[Analyze grammar]

jajvālordhvaśikho dīpto jvālāpravāharūpakaḥ |
yaddiśaṃ cekṣate śaṃbhustatrotpatya nipatya ca || 126 ||
[Analyze grammar]

bhrāmaṃ bhrāmaṃ yathādṛṣṭi dhāvatyagre mahānalaḥ |
etasminnantare śaṃbhurdadarśa pārśvagaṃ smaram || 127 ||
[Analyze grammar]

maccittavikṛteḥ kartā kāmo'yamiti taṃ prati |
bhālanetramatisphāraṃ vyasphārayata śaṃkaraḥ || 128 ||
[Analyze grammar]

tadutthavahninā kāmaṃ bhasmasāt kṛtavān haraḥ |
abhavanmarutāṃ vācaḥ kṣamyatāṃ kṣamyatāmiti || 129 ||
[Analyze grammar]

sa tu taṃ bhasmasāt kṛtvā jagad dagdhuṃ vyajṛmbhata |
tato bhavo jagaddhetorvyabhajajjātavedasam || 130 ||
[Analyze grammar]

sahakāre madhau candre sumanaḥsvapareṣvapi |
bhṛṃgeṣu kokilāsyeṣu vibhāgena smarānalam || 131 ||
[Analyze grammar]

dagdhe tasmin smare vīre devā duḥkhamupāgatāḥ |
sasakhī pārvatī mlānā svapiturmandiraṃ yayau || 132 ||
[Analyze grammar]

patitā ca ratistatra visaṃjñā'bhūnmṛtaiva sā |
jātāyāmatha saṃjñāyāṃ sākrośaṃ vilalāpa ha || 133 ||
[Analyze grammar]

kiṃ karomi kva gacchāmi kiṃ kṛtaṃ daivatairiha |
matpatiṃ te samāhūya nāśayāmāsurīśvarāt || 134 ||
[Analyze grammar]

hā hā nātha smara svāmin prāṇapriya sukhaprada |
idannu kimabhūdatra hā me bhāgyaṃ vidāritam || 135 ||
[Analyze grammar]

itthaṃ vilāpinī hastau pādau prasārya bhūtale |
keśānatroṭayat tvāghātayan śaśvat svamastakam || 136 ||
[Analyze grammar]

tasyā ākrandanaṃ śrutvā'bhavan sarve suduḥkhitāḥ |
āgatya suvicāryaiva devā āśvāsanaṃ daduḥ || 137 ||
[Analyze grammar]

kiṃcidbhasma gṛhītvā saṃrakṣa yatnāt bhayaṃ tyaja |
jīvayiṣyati śaṃbhuḥ saḥ prāpsyasi tvaṃ punaḥ patim || 138 ||
[Analyze grammar]

atha devāḥ śivamūcuḥ saṃprasādya punaḥ punaḥ |
kāmenaitatkṛtaṃ tatra na svārthastasya vidyate || 139 ||
[Analyze grammar]

tārakapīḍitairdevairakhilaiḥ kāritaṃ tu tat |
tvayā kāmapradāhena sastrīkā niṣphalīkṛtāḥ || 140 ||
[Analyze grammar]

kathaṃ jagatpravāho nirvahedevaṃ kṛte sati |
ratimāśvāsaya śarva kuru śokāpanodanam || 141 ||
[Analyze grammar]

ratiścāpi tadā śaṃbhuṃ jagāma śaraṇaṃ tataḥ |
uddhūlyagātraṃ śubhreṇa hṛdyena smarabhasmanā || 142 ||
[Analyze grammar]

jānubhyāmavaniṃ gatvā provāca duḥkhasāgarā |
namo'stu śaṃbhave nāmnā karmaṇā duḥkhadāya ca || 143 ||
[Analyze grammar]

namaste pārvatīsmartre ratyā vilāpakāriṇe |
satīmṛgāya namaḥ kādācitkayogine namaḥ || 144 ||
[Analyze grammar]

namo māyādyadhiṣṭhāya māyāhīnāya te namaḥ |
namo brahmasvarūpāya kṛṣṇarūpāya te namaḥ || 145 ||
[Analyze grammar]

namo vairājarūpāya sadāśivāya te namaḥ |
namaḥ śivāya rudrāya liṃgarūpāya te namaḥ || 146 ||
[Analyze grammar]

namo jyotiḥsvarūpāya śatarudrāya te namaḥ |
namaste koṭirudrāya namaḥ kailāsavāsine || 147 ||
[Analyze grammar]

namaste dvisvarūpāya duḥkhavirahiṇe namaḥ |
satīnāthāya śāntāya yogine te namonamaḥ || 148 ||
[Analyze grammar]

namo vṛṣabharūpāya śarabhāya ca te namaḥ |
namaḥ kirātarūpāya vivastrāya ca te namaḥ || 149 ||
[Analyze grammar]

brāhmaṇīṣu bhikṣukāya ratirāmāya te namaḥ |
anaṃgāya mahāṃgāya jīvanāya ca te namaḥ || 150 ||
[Analyze grammar]

namaste'stu sakāmāya dhvastakāmāya te namaḥ |
namaste'stu śaraṇyāya bhakteṣṭadāya te namaḥ || 151 ||
[Analyze grammar]

namo'stvasahyakopāya priyā''ptidāya te namaḥ |
prayaccha kāmadravyaṃ me kathaṃ jīve patiṃ vinā || 152 ||
[Analyze grammar]

iti stutvā punastatra vilāpaṃ tvakarodratiḥ |
śaṃbhuḥ prāha prasanno'smi jīvayiṣyāmi cā'ntare || 153 ||
[Analyze grammar]

rate mā khedamāpnuhi sadā manasi cetasi |
sarveṣāṃ prāṇināṃ kāmo'dṛśyo nityaṃ nivatsyati || 154 ||
[Analyze grammar]

vasa tvaṃ pramadāvarge'naṃgo vasatu puṃjane |
dvayoryoge yuvatyośca sadāyogo'stu cāntaraḥ || 155 ||
[Analyze grammar]

matkopena ca yajjātaṃ tattathā nānyathā bhavet |
anaṃgastāvadeva syānnānyathā syādratīśituḥ || 156 ||
[Analyze grammar]

kṛṣṇastvādyadvāparānte hiraṇyeśo bhaviṣyati |
sa hiraṇyāṃ pradyumnākhyaṃ kāmaṃ cotpādayiṣyati || 157 ||
[Analyze grammar]

kāmāvatāraṃ pradyamnaṃ śaṃbaro vai hariṣyati |
saḥ prakṣipya samudre taṃ nagaraṃ svaṃ gamiṣyati || 158 ||
[Analyze grammar]

tāvat tvaṃ śāmbarapure rate vāsaṃ sukhaṃ kuru |
tadā tatra saśarīraḥ kāmastvāṃ sammiliṣyati || 159 ||
[Analyze grammar]

kāmaśca śaṃbaraṃ hatvā dravyaṃ nītvā tvayā saha |
gamiṣyati svakaṃ nityaṃ nagaraṃ satyalokajam || 160 ||
[Analyze grammar]

ābhūtasaṃplavaṃ tatra sukhinau saṃbhaviṣyathaḥ |
ityuktā śirasā''vandya śaṃkaraṃ kāmavallabhā || 161 ||
[Analyze grammar]

jagāmopavanaṃ cānyadratistuhinaparvate |
ruroda cāpi bahuśo dīnā ramye sthale sthale || 162 ||
[Analyze grammar]

evaṃ ratistvaraṇyeṣu vicacāra ciraṃ samāḥ |
tato gatvā tu nagaraṃ śambarāsurapālitam || 163 ||
[Analyze grammar]

dāsī bhūtvā samuvāsa patijanmehayā sadā |
pratīkṣamāṇā taṃ kālaṃ rudrādiṣṭaṃ yugātmakam || 164 ||
[Analyze grammar]

atha krodhamayaṃ vahniṃ dagdhukāmaṃ jagattrayam |
taṃ vāḍavatanuṃ brahmā saumyajvālāmukhaṃ priye || 165 ||
[Analyze grammar]

sāgaraṃ samagāllokahitāyā''dāya vāḍavam |
prāha kṣārārṇavaṃ brahmā nirdiśāmi gṛhāṇa tat || 166 ||
[Analyze grammar]

ayaṃ krodho maheśasya vāḍavaṃ rūpamāśritaḥ |
jvālāmukhastvayā dhāryo yāvadābhūtasamplavam || 167 ||
[Analyze grammar]

bhojanaṃ toyametasya tava nityaṃ bhaviṣyati |
ityuktaḥ sāgaro vahnimaṃgīcakre tu vāḍavam || 168 ||
[Analyze grammar]

tataḥ praviṣṭo jaladhau sa vāḍavatanuḥ śuciḥ |
vāryaughānsudahaṃstasya jvālāmālātidīpitaḥ || 169 ||
[Analyze grammar]

tatpītamiṣṭasalilā meghā varṣanti bhūtale |
svāsthyaṃ prāpa jagatsarvaṃ nirmuktaṃ vāḍavādbhayāt || 170 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne gaṃgāvatāre śaṃbhostapaḥ pārvatyāḥ sevā indrapreṣitakāmakṛtabāṇaprayogaḥ tṛtīyanetravahninā kāmadāhaḥ rativilāpaḥ anaṃgasya pradyumnātmakabhāvisadehasya varadānam rateḥ śambaragṛhe vāsaḥ krodhāgnirūpavaḍavānalasya samudre vāsa |
ityādinirūpaṇanāmā paṃcāśītyadhika śatatamo'dhyāyaḥ || 185 ||
[Analyze grammar]