Chapter 147

śrīnārāyaṇa uvāca |
asurāṇāṃ tadā cā''sītkaśmalaṃ paramaṃ mahat |
vicakrame padaikena kṣitiṃ sa vā mano rame || 1 ||
[Analyze grammar]

saptasvargān dvitīyena tṛtīyārthaṃ na śiṣyate |
atha brahmā marīcyādyāḥ sanandādyāśca yoginaḥ || 2 ||
[Analyze grammar]

vedopavedā niyamā yamāḥ purāṇasaṃhitāḥ |
yatayo munayo brahmacāriṇaścordhvaretasaḥ || 3 ||
[Analyze grammar]

vavandire padaṃ satyākrāntaṃ śrīvāmanasya te |
toyaiḥ puṣpaiścandanaiśca divyagandhānulepanaiḥ || 4 ||
[Analyze grammar]

sugandhadhūpadīpaiśca lājā'kṣataphalādibhiḥ |
stavanairjayaśabdaiśca śaṃkhadundubhiniḥsvanaiḥ || 5 ||
[Analyze grammar]

nṛtyavāditragītaiśca tatsāmarthyamayaistathā |
pupūjurvijayasyāsya mahotsavamaghoṣayat || 6 ||
[Analyze grammar]

asurāstu prajvalitā hṛtsu naitad viṣehire |
kapaṭino vāmanasyā'satyakramasya sarvathā || 7 ||
[Analyze grammar]

devapakṣaprapāteśca vadha evāsti śāsanam |
ityāyudhāni jagṛhurdaityā hyāsuradānavāḥ || 8 ||
[Analyze grammar]

sahetihastakā ugrāḥ svārthamātraparāyaṇāḥ |
anicchanto baleḥ rājñaḥ prādravajjātamanyavaḥ || 9 ||
[Analyze grammar]

tānprati pārṣadā viṣṇordhṛtaśastrāstrapāṇayaḥ |
balo nandaḥ sunando'tha prabalaḥ kumudastathā || 10 ||
[Analyze grammar]

viśvaksenaḥ kumudākṣo garuḍaḥ sāttvatastathā |
jayantaḥ śrutadevaśca puṣpadantastathā'pare || 11 ||
[Analyze grammar]

sarve nāgāyutabalāścamūṃ te jaghnurāsurīm |
balistu vārayāmāsa daityān dānavapuṃgavān || 12 ||
[Analyze grammar]

mā yudhyata nivartadhvaṃ kālo nā'smākamarthadaḥ |
yo no bhavāya devo'bhūd divaukasāṃ viparyaye || 12 ||
[Analyze grammar]

sa eva bhagavānadyā'smatto viparyayaṃ gataḥ |
tasmātparājayaṃ prāpya stheyaṃ tacchāsane'dhunā || 14 ||
[Analyze grammar]

prāpte punastu samaye vijeṣyāmo harerbalāt |
daityā vākyaṃ baleḥ śrutvā viviśuste rasātalam || 15 ||
[Analyze grammar]

athā'tra garuḍaḥ pāśairbaliṃ babandha vāruṇaiḥ |
hāhākāro mahānāsīd brahmāṇḍe'tra sthale sthale || 16 ||
[Analyze grammar]

vāmanaḥ prāha baddhaṃ taṃ rājyahīnaṃ śriyojjhitam |
padāni trīṇi dattāni tatraikamavaśiṣyate || 17 ||
[Analyze grammar]

dvābhyāṃ krāntaṃ tava rājyaṃ tṛtīyamupakalpaya |
pratiśrutamadātuste narake vasatirdhruvā || 18 ||
[Analyze grammar]

vipralabdheḥ phalaṃ bhuṃkṣva nirayaṃ katicitsamāḥ |
evaṃ viprakṛto bhaktaḥ prāha devaṃ hi rañjayan || 19 ||
[Analyze grammar]

na me vaco vyalīkaṃ syāt tavānugrahakāraṇāt |
maccharīraṃ tṛtīyasya padasyārthe samarpitam || 20 ||
[Analyze grammar]

tava pāśaśca pādaśca mama syādabhavāya hi |
ślādhyaścāsurabhāvānāṃ parokṣasthitiko guruḥ || 21 ||
[Analyze grammar]

pitāmaho mama deva tvayā rakṣita eva ha |
prahalādastadvadatrāpi bhavapāśātsurakṣitaḥ || 22 ||
[Analyze grammar]

tava hastakṛtaḥ pāśo na pāśaḥ kintu muktaye |
rājyaṃ svarga sukhaṃ bandhurjīvanaṃ maraṇaṃ guruḥ || 23 ||
[Analyze grammar]

muktiḥ pāśaśca yatkiṃcit tanme tvameva vartase |
nānyaṃ jānāmi sukhadaṃ bandhadaṃ mokṣadaṃ ca vā || 24 ||
[Analyze grammar]

āsanācca tadāgatya prahlādaḥ prāha keśavam |
tvayā datte pade moho'syātra tvayā vināśitaḥ || 25 ||
[Analyze grammar]

sa evānugraho jātastvāṃ vinā ko vimocayet |
sandhyāvalī baleḥ patnī prāṃjaliḥ prāha mādhavam || 26 ||
[Analyze grammar]

tvayā dattaṃ tvayā bhuktaṃ tvayaivopahṛtaṃ tathā |
tava krīḍāmayaṃ sarvaṃ mūḍha svāmitvavaibhavāḥ || 27 ||
[Analyze grammar]

brahmovāca tadā devaṃ muñcainaṃ sāttvataṃ balim |
ātmanivedinaṃ bhaktaṃ hṛṣyantaṃ bandhane'pi yat || 28 ||
[Analyze grammar]

hṛtaṃ sarvasvamevā'sya bandhanaṃ cāpi saṃkṛtam |
śarīraṃ cārpitaṃ tena nā'yamarhati nigraham || 29 ||
[Analyze grammar]

vāmanaḥ prāha madbhakte'haṃmamatve tu māyayā |
ahite yadi rājyādestadā ko'nugraho nu me || 30 ||
[Analyze grammar]

janmakarmavayorūpavidyaiśvaryadhanādibhiḥ |
yadi naiva vimuhyeta so'yaṃ tvanugraho mama || 31 ||
[Analyze grammar]

yadi muhyeta tanmohaṃ nāśayāmi prasahya vai |
tadāpi manmati syāccedajaiṣīdajayāṃ hi saḥ || 32 ||
[Analyze grammar]

kīdṛśo'yaṃ mama bhaktaḥ parīkṣito mayā'dhunā |
kṣīṇarikthaścyutaḥ sthānād baddhaścaivāpamānitaḥ || 33 ||
[Analyze grammar]

guruṇā pratisiddho'pi satya jahau na matkṛte |
chalena yācitaḥ sarvasvaṃ balāt hṛtavānaham || 34 ||
[Analyze grammar]

tathāpi mama dāsatvaṃ naiva tyajati sanmatiḥ |
tasmānnāhaṃ tyajāmyenaṃ madārādhanatatparam || 35 ||
[Analyze grammar]

rasātalaṃ śubhaṃ lokaṃ dadāmyasmai samṛddhimat |
sarveṣāṃ dānavānāṃ ca nāgānāṃ yādasāmapi || 36 ||
[Analyze grammar]

rājānaṃ tu baliṃ kurve yāvadābhūtasamplavam |
manvantare ca sāvarṇau punaścendro bhaviṣyasi || 37 ||
[Analyze grammar]

bale yamanugṛhṇāmi tatsarvaṃ vidhunomyaham |
mānaṃ mohaṃ vināśyaiva punaḥ smṛddhaṃ karomi tam || 38 ||
[Analyze grammar]

baliḥ prāha tadā devaṃ nāthā''ptaṃ yādṛśaṃ mayā |
tādṛśaṃ nānyalabdhavyaṃ vacmi kiṃ me'tidhanyatām || 39 ||
[Analyze grammar]

tṛtīyacaraṇārthaṃ me śiraścātrā'vaśiṣyate |
nidhehi caraṇaṃ tatra sarvaṃ prāptaṃ mayā bhavet || 40 ||
[Analyze grammar]

hariḥ sakaruṇastasya nyadhānmūrdhni padaṃ svakam |
tṛtīyaṃ kramamāsādya prasampūrṇamanorathaḥ || 41 ||
[Analyze grammar]

baliṃ prasahya bhāreṇa rasātalamavānayat |
tatra rājye niyuyoja jñātibhiḥ parivāritam || 42 ||
[Analyze grammar]

balistaṃ vāmanaṃ prāha bhagavan padmakomale |
pattale te mama lomaśūlāḥ protā hi duḥkhadāḥ || 43 ||
[Analyze grammar]

kva daityasya vapurvajraṃ kva hareḥ pādapaṃkajam |
pāde pīḍā'bhavad yasmātkuru nātha mayi kṣamām || 44 ||
[Analyze grammar]

iti kṛtvā balistatra lileha jihvayā padam |
cucumba pattalaṃ premṇā komalaṃ mokṣadaṃ muhuḥ || 45 ||
[Analyze grammar]

yallābhe labdhamevedaṃ sarvaṃ yatra pratiṣṭhitam |
kathaṃ tallehanaṃ na syādānandāmṛtapānadam || 46 ||
[Analyze grammar]

hariḥ prāha bale'laṃ tai bhaktyā tuṣṭo'smi vāñchitam |
śṛṇu tad yadi kiṃcitsyānna me'deyaṃ tavā'sti yat || 47 ||
[Analyze grammar]

baliḥ prāha sadā tvetaccaraṇaṃ me gṛhe vaset |
śaśvatprapūjanārthāya daityāghakṣālakaṃ śubham || 48 ||
[Analyze grammar]

kūpāṃ kuru mayi śrīśa sadā rakṣāṃ vidhehi me |
na punardaityatāṃ yāyāṃ pārṣadaṃ kuru māṃ prabho || 49 ||
[Analyze grammar]

hariḥ prāha tadā rakṣāṃ kariṣye dvārasaṃsthitaḥ |
sudarśanaṃ ca me cakraṃ rājyarakṣāṃ kariṣyati || 50 ||
[Analyze grammar]

nāhaṃ baliṃ vinā tiṣṭhe māṃ vinā na baleḥ sthitiḥ |
tubhyaṃ darśanadānāya tiṣṭhāmi tava gopure || 51 ||
[Analyze grammar]

tvacchāsanā'tigānduṣṭāṃścakraṃ me sūdayiṣyati |
rakṣayiṣye sadā'haṃ tvāṃ sakuṭumbaparicchadam || 52 ||
[Analyze grammar]

sadā sannihitaṃ māṃ tvaṃ drakṣyase bhavane tava |
mama kṛpāvaśātte hyāsuro bhāvo vinaṅkṣyati || 53 ||
[Analyze grammar]

kuru rāsātalaṃ rājyaṃ sutale te pitāmahaḥ |
prahalādosti mama bhaktaḥ pātāle hāṭakeśvaraḥ || 54 ||
[Analyze grammar]

śaṃbhuścāsti mama bhaktastatra tatra vasāmyaham |
gadāmādāya govindo vasāmi balimandire || 55 ||
[Analyze grammar]

vāmano bhagavān sākṣād kṛtvā rūpāntaraṃ tataḥ |
bale saudhe nivasati sadā rakṣaṇahetave || 56 ||
[Analyze grammar]

pratigṛhya balerlokān vaṭuveṣeṇa vāmanaḥ |
mahendrāya samukuṭahāratilakabhūṣitam || 57 ||
[Analyze grammar]

kṛtvā maṃgalasatkāryaṃ dadau rājyaṃ trilokagam |
tato devāḥ sagandharvāḥ ṛṣayaśca mahaujasaḥ || 58 ||
[Analyze grammar]

caturdaśastarāvāsāḥ pupūjustvindramacyutam |
yajñāntimastadā homaḥ saśrīphalasamedhitaḥ || 59 ||
[Analyze grammar]

viṣṇunā cendrahastena kāritastatra pūrtakṛt |
śukraṃ prāha haristatra karmacchidraṃ tathā''kramam || 60 ||
[Analyze grammar]

vaiṣamyaṃ parihāryaṃ ca tvayā vai guruṇā yataḥ |
śukraḥ prāha hariṃ yatra karmadraṣṭā bhavānmataḥ || 61 ||
[Analyze grammar]

kutastatkarmavaiṣamyaṃ yajñeśo yatra pūjitaḥ |
mantratastantrataśchidraṃ deśakālārhavastutaḥ || 5 ||
[Analyze grammar]

sarvaṃ jātaṃ tu niśchidraṃ tava sākṣādupasthiteḥ |
pūrṇāhutiṃ vidhāyā'vabhṛthasnānaṃ ca vāridhau || 63 ||
[Analyze grammar]

somanāthe mahākṣetre kṛtavantaśca yājñikāḥ |
viṣṇunā preṣitāḥ sarve gatā svasvaniketanam || 64 ||
[Analyze grammar]

trailokyaṃ mahadaiśvaryamavāpa tridaśeśvara |
atha prajāpatirbrahmā viṣṇustathā ca śaṃkaraḥ || 65 ||
[Analyze grammar]

dakṣabhṛgvaṃgiromukhyā devarṣipitṛbhūmipāḥ |
kaśyapasyā'diteḥ prītyai sarvalokasya śāntaye || 66 ||
[Analyze grammar]

dikpālā lokapālāśca hyakurvan vāmanaṃ patim |
ṛṣīṇāṃ ca munīnāṃ ca devānāṃ bhūbhṛtaḥ tathā || 67 ||
[Analyze grammar]

lokānāṃ lokapālānāṃ dharmāṇāṃ yaśasāṃ śriyaḥ |
vratānāṃ dānadharmāṇāṃ yajñānāṃ puṇyakarmaṇām || 68 ||
[Analyze grammar]

maṅgalānāṃ vibhūtīnāṃ tathā svargā'pavargayoḥ |
upendraṃ kalpayāñcakre patiṃ sarvavibhūtaye || 69 ||
[Analyze grammar]

tadā sarve mumudire vāmanaṃ praṇipatya ca |
gatāḥ svasvarājadhānīmindro'nujaṃ tu vāmanam || 70 ||
[Analyze grammar]

devayānena saudhaṃ svaṃ nītvā'pūjayadacyutam |
prāpya trilokajaṃ rājyaṃ copendrabhujarakṣitaḥ || 71 ||
[Analyze grammar]

mahendro mumude devāḥ sukhino vāmanāśritāḥ |
itthaṃ surakṣitāḥ sendradevāḥ śrīviṣṇunā purā || 72 ||
[Analyze grammar]

devānāṃ paramo harṣaḥ sañjāto vāmanārpitaḥ |
nivāsāya manaścakre vāmano vāmanasthalīm || 73 ||
[Analyze grammar]

vāmanena purā yatrā'rthitā bhikṣā muhurmuhuḥ |
balestu nigrahāt tadvai pura daityairvināśitam || 74 ||
[Analyze grammar]

puraṃ sarvaṃ tathā smṛddhiṃ ninyudaityā rasātalam |
tatastaṃ brāhmaṇaṃ gargaṃ papraccha bhagavānprabhuḥ || 75 ||
[Analyze grammar]

kasminsthāne mayā kāryaṃ vaiṣṇavaṃ nagaraṃ vada |
yatra saukhyaṃ tathā muktirnṝṇāṃ syād bhavabandhanāt || 76 ||
[Analyze grammar]

vastrāpathe raivatasya paścime vāmanasthalī |
nagarī kāritā viśvakarmaṇā viprasātkṛtā || 77 ||
[Analyze grammar]

patnīvratena vipreṇa rājyaṃ tasyāḥ kṛtaṃ purā |
vaṃśaparamparāprāptaṃ yugānte'nyakarasthitam || 78 ||
[Analyze grammar]

tīrthānāṃ raivate sārdhakoṭitrayaṃ vasatyapi |
bhadrā madhumatī corjasvatī svarṇasurakṣikā || 79 ||
[Analyze grammar]

sarvā vai bhagavatpatnyo nadīrūpeṇa saṃsthitāḥ |
yannāmasmaraṇād yatra snānād dānācca tīryate || 80 ||
[Analyze grammar]

pratikalpaṃ mahāyajñā bhavanti balinā kṛtāḥ |
kvacid himagireḥ prānte kvacidbhūmau tu puṣkare || 81 ||
[Analyze grammar]

kvacicca raivate tvadrau narmadāyāstaṭe kvacit |
kalpāntare vāmano'yaṃ narmadāyāstaṭe baleḥ || 82 ||
[Analyze grammar]

yajñe gatvā baliṃ badhvā trilokīṃ tu hariṣyati |
evaṃ vāmanarūpāṇi sahasrāṇi bhavanti vai || 83 ||
[Analyze grammar]

kalpe kalpe catuṣkyāṃ ca bhinnā vai vāmanāḥ smṛtāḥ |
nāntosti me'vatārāṇāṃ diṅmātraṃ procyate mayā || 84 ||
[Analyze grammar]

etatte sarvamākhyātaṃ vāmanaṃ vaibhavaṃ priye |
vada lakṣmi tataḥ puṇyaṃ hṛdyaṃ śrotuṃ kimicchasi || 85 ||
[Analyze grammar]

iti śrīlakṣmīnārāyaṇīyasahitāyā prathame kṛtayugasantāne baleḥ pāśabandhanaṃ rasātalarājyadānaṃ vāmanasya baligṛhe vāsaḥ indrāya trilokīdānam avabhṛthasnānaṃ vāmanasthalīnāmnī purī kāritetyādinirūpaṇanāmā saptacatvāriṃśadadhikaśata |
tamo'dhyāyaḥ || 147 ||
[Analyze grammar]