Chapter 4

śrīnārāyaṇa uvāca |
sa aikṣata prajāyeya paramātmā svayaṃ hariḥ |
mahākālaṃ svakāṃ śaktiṃ sasarja vibhurātmanaḥ || 1 ||
[Analyze grammar]

sarveṣāmantakartāraṃ māyākṣobhakaraṃ param |
ājñāṃ cakre haristasmai māyāṃ saṃkṣobhayeti hi || 2 ||
[Analyze grammar]

māyāṃ tatkṣobhitāṃ dṛṣṭvā pumānmuktastu vai hareḥ |
ājñākaro'paraḥ kaścinmāyayā yuyuje tadā || 3 ||
[Analyze grammar]

sā māyā prakṛtirmūlā pumāṃstu puruṣaḥ patiḥ |
iti prakṛtipuruṣau sargaṃ sasarjatuḥ svakam || 4 ||
[Analyze grammar]

tābhyāṃ pradhānapuruṣā jajñire koṭiśaḥ khalu |
pradhānaṃ tu mahattattvaṃ triguṇaṃ kṣetramucyate || 5 ||
[Analyze grammar]

pūruṣastatpatiḥ prokto yugalāni bhavanti vai |
pūruṣā īśvarāḥ sarve līnā ye prakṛtau tu prāk || 6 ||
[Analyze grammar]

prādurbhūtāśca te sarve jāyāpatisarūpiṇaḥ |
pradhānapuruṣābhyāṃ tu mahāviṣṇuḥ prajāyata || 7 ||
[Analyze grammar]

ahaṃkāraḥ sa vai proktaḥ svarṇapūruṣa ityapi |
pradhānāyāḥ suputrī sā tvahaṃkṛtiriti smṛtā || 8 ||
[Analyze grammar]

hiraṇyā sā mahālakṣmīrmahāviṣṇoḥ sahāyinī |
mahālakṣmīrmahāviṣṇuryugalaṃ tatprakīrtitam || 9 ||
[Analyze grammar]

mahāviṣṇormahālakṣmyāṃ yo garbhaḥ samajāyata |
hiraṇyagarbha ityuktastaccāṇḍaṃ samajāyata || 10 ||
[Analyze grammar]

hiraṇyā'ṇḍaṃ dvidhā bhinnaṃ tato jajñe virāḍayam |
vairājyapi pramadā ca virāṭpatnī tu sā matā || 11 ||
[Analyze grammar]

ahaṃkṛtermahāviṣṇostattvāni ṣoḍaśo'bhavan |
sāttvikāttu samanaskānīndriyāṇi daśā'bhavan || 12 ||
[Analyze grammar]

tāmasāttanmātravargo taddevā rājasāttathā |
śrotratvaṅnetrarasanā vākpāṇipādapāyavaḥ || 12 ||
[Analyze grammar]

upasthaṃ cetīndriyāṇi manaḥ karaṇamāntaram |
pañcajñānendriyaṃ bodhyaṃ pañca karmendriyaṃ matam || 14 ||
[Analyze grammar]

śrotrādīnāṃ tu pañcānāṃ jñānotpādanaśaktitaḥ |
vāgādīnāṃ tu pañcānāṃ karmotpādanaśaktitaḥ || 15 ||
[Analyze grammar]

jñānakarmendriyākhyā vai manaḥ syādubhayātmakam |
digvātārkapraceto'śvivahnīndropendramitrakāḥ || 16 ||
[Analyze grammar]

candraśceti matā devā īśasṛṣṭimayā ime |
īśvarāṇāṃ śarīreṣu golakeṣu vasanti te || 17 ||
[Analyze grammar]

manaścaikaṃ caturdhā tu jāyate vṛttibhedataḥ |
mano'haṃcittabuddhyākhyaṃ procyate tattvavedibhiḥ || 18 ||
[Analyze grammar]

tāni virāṭsvarūpeṇa saṃhatānīśavāñcchayā |
tathāpi prāṇaśūnyaṃ tannodatiṣṭhad yadā virāṭ || 19 ||
[Analyze grammar]

śrīhariḥ prāṇarūpo vai bhūtvā tatra viveśa ha |
prāṇaśaktirjīvanākhyā yena nyastā''ntare tataḥ |
prāṇātmanaścetanasya śrīharestatsamanvayāt || 20 ||
[Analyze grammar]

vairājaṃ rūpamityarthe kārye'nvarthaṃ babhūva ha |
tasya nābhimahānālapadmādbrahma vyajāyata || 21 ||
[Analyze grammar]

rājasaḥ sarjakaḥ so'tha rudrastadbhālato'bhavat |
tāmasaḥ sa tu saṃhartā hṛdo viṣṇurbabhūva ha || 22 ||
[Analyze grammar]

sāttvikaḥ poṣakaḥ proktaste svaśaktisamanvitāḥ |
brahmaṇastu śarīrasthā brāhmī proktā tadaṃganā || 23 ||
[Analyze grammar]

sṛṣṭiriti samākhyātā brahmaṇo'rdhāṃganā hi sā |
rudraśaktistu rudrāṇī śivā harāṃganā satī || 24 ||
[Analyze grammar]

vaiṣṇavī viṣṇuśaktiryā sā'pi lakṣmīriti smṛtā |
teṣāṃ trayāṇāṃ tisrastāḥ sṛṣṭivinaṣṭipuṣṭidāḥ || 25 ||
[Analyze grammar]

patnyastadātmikāstattatkāryasāhāyyadā matāḥ |
pagbrahmā''jñayā sṛṣṭipravāhaṃ vāhayanti te || 26 ||
[Analyze grammar]

āmūlapuruṣātsarve keśāntā īśvarāḥ smṛtāḥ |
śuddhasattvaśarīrāste sattvaṃ bhūtistu sā hareḥ || 27 ||
[Analyze grammar]

tasmānīśāstu te sarve parabrahmavibhūtayaḥ |
tatreśvareṣu sarveṣu praviṣṭau dīvyati prabhuḥ || 28 ||
[Analyze grammar]

teṣāṃ tūpāsyamūrtidhṛk śrīhariḥ saṃbabhūva ha |
vāsudevaḥ sa vai proktaḥ īśvarāṇāṃ niyāmakaḥ || 29 ||
[Analyze grammar]

īśvarāṇāṃ mahārāja īśvareḍyapadāmbujaḥ |
svaśaktyā vāsudevyā sa sahito bhagavānayam || 30 ||
[Analyze grammar]

dhāmnyakṣare svavāsāya śvetaṃ nirmāya dhāma tat |
śvete divye svake dhāmni nivāsamakarotprabhuḥ || 31 ||
[Analyze grammar]

amṛtākhye pare dhāmni vāsudevaḥ sa eva hi |
vāsudevaḥ svayaṃ svasyeśvarasṛṣṭikṛte punaḥ |
janmapuṣṭilayārthaṃ svaṃ rūpatrayamadhārayat || 32 ||
[Analyze grammar]

īśasṛṣṭisamunnetā hyaniruddho vyajāyata |
īśasṛṣṭestu sampoṣṭā pradyumnaḥ samajāyata || 33 ||
[Analyze grammar]

īśasṛṣṭerviloptā sa saṃkarṣaṇo'nujāyata |
tisrastu mūrtayaḥ sākṣādvāsudevasya santi hi || 34 ||
[Analyze grammar]

śrīhariṇā svayaṃ prohya dhṛtaṃ rūpacatuṣṭayam |
vyūhacatuṣṭayaṃ tasmātprocyate śāstravedibhiḥ || 35 ||
[Analyze grammar]

vyūhādhīnāstatra kecidīśāścaturmukhāḥ pare |
aṣṭamukhāstathā cānye ṣoḍaśāsyāḥ śatānanāḥ || 36 ||
[Analyze grammar]

sahasrāsyā ayutāsyā niyutāsyāstathā pare |
arbudāsyāḥ koṭimukhāstāvaccaraṇapāṇayaḥ || 37 ||
[Analyze grammar]

viṣṇostatrā'ṇḍagolāstu canurdaśasamīritāḥ |
sadāśivasya rudrasya tvaṣṭāviṃśatigolakāḥ || 38 ||
[Analyze grammar]

aṇḍāḥ pradhānamāyāyāḥ ṣaṭpañcāśatsamīritāḥ |
mahāviṣṇoḥ śate dve ca tathā dvādaśa golakāḥ || 39 ||
[Analyze grammar]

prakṛtipuruṣāṇḍāni santi pañcaśatāni vai |
mahākālasya lokāstu sahasraṃ parikīrtitāḥ || 40 ||
[Analyze grammar]

vāsudevasya kṛṣṇasya nārāyaṇasya bhūmayaḥ |
divyā'nantā asaṃkhyātāḥ santi vācāmagocarāḥ || 41 ||
[Analyze grammar]

īśvarāṇāntu sarveṣāṃ manobuddhīndriyādayaḥ |
ātmabhūtāḥ śaktayaḥ svāḥ śuddhasattvānvitā matāḥ || 42 ||
[Analyze grammar]

bhogyabhogopakaraṇabhogasādhanabhūmayaḥ |
śuddhasattvātmikāḥ santi paramānandamiśritāḥ || 43 ||
[Analyze grammar]

paramātmā haristatra prāvirbhavatyabhīkṣṇaśaḥ |
yathākāryaṃ yathā tattadīśaprārthanabhāvanam || 44 ||
[Analyze grammar]

īśvarāṇāṃ tu kāryāṇi nirvartya śrīharistataḥ |
tattadīśā''yuṣā sthitvā tirobhāvamupaiti hi || 45 ||
[Analyze grammar]

tattatsvarūpasadbhaktyā te'pi yānti parāṃ gatim |
pūrṇamaiśvaryamābhuktvā te gacchantyapunarbhavam || 46 ||
[Analyze grammar]

tadā muktastu te sarve śrīhariṃ samupāsate |
īśvarāṇāmapi muktirevaṃ bhavati śāśvatī || 47 ||
[Analyze grammar]

svāmī nārāyaṇaḥ śrīmāṃsteṣāṃ muktikaraḥ prabhuḥ |
niyāmakaḥ parabrahmā'nvito'pi vyatirekavān || 48 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vāsudevādibrahmānteśvarāṇāṃ sṛṣṭikathananāmā caturtho'dhyāyaḥ || 4 ||
[Analyze grammar]