Chapter 21

ekaviṃśo'dhyāyaḥ - 21
śakraḥ---
śabdārthavyaktirūpāyai ṣaḍadhvaparivartini|
adhvātītāvabodhākhye namaste harivallabhe || 1 ||
1. ṣaḍadhveti| varṇakalātattvamantrapadabhuvanākhyāḥ ṣaḍadhvānaḥ|
varṇāḥ prakāśitā devi yathāvat sarvahetavaḥ|
mantramārgamidānīṃ me yathāvadvaktumarhasi || 2 ||
2. sarveti| śabdānāmarthānāṃ cetyarthaḥ|
śrīḥ---
eka eva paro devaḥ śrīmān puruṣasattamaḥ|
ṣāḍ‌guṇyāmbhonidhirdivyaḥ sarvātmā sarvatomukhaḥ || 3 ||
3. - - - - - - - - - - - - -
tasyāhaṃ paramā śaktirahaṃtā śrīrabhedinī|
sarvādhārā sarvaśaktiḥ sarvajñā sarvatomukhī || 4 ||
4. - - - - - - - - - - -
mayi prakāśate viśvaṃ darpaṇodaraśailavat|
bodha eva svarūpaṃ me nirmalānandalakṣaṇaḥ || 5 ||
5. - - - - - - - - - - - -
icchāparavatī sāhaṃ bodhakāṃśavivartinī|
śabdabrahmamayī bhūtvā vivarte'haṃ kalādhvanā || 6 ||
6. icchāparavatīti| svacchandetyarthaḥ| vivartaḥ pariṇāmaḥ| kalādhvaneti| jñānādiguṇātmanetyarthaḥ|
kalā jñānādayaḥ proktāḥ ṣaḍ‌ guṇāḥ pārameśvarāḥ|
tāsāṃ trikadviyogena vivarte tattvavartmanā || 7 ||
7. trikadviyogena; yugalatrayayogenetyarthaḥ|
saṃkarṣaṇādayo devāstattvāni surasattama|
varṇavyatikarairbhūyo vivarte mantravartmanā || 8 ||
8. - - - - - - - - - - -
tasya mantrādhvano vyaktiṃ gadantyā me niśāmaya|
śabdabrahmavivarto'yaṃ kiraṇāyutasaṃkulaḥ || 9 ||
9. - - - - - - - - - - -
cillakṣaṇaḥ ṣaḍ‌guṇātmā tasya bhedaścaturvidhaḥ|
vkacidbījaṃ vkacitpiṇḍaṃ vkacitsaṃjñā vkacitpadam || 10 ||
10. - - - - - - - - - - - - - - -
turyaṃ suṣuptiḥ svapnaśca jāgradbījādayaḥ kramāt|
ekasvaraṃ dvisvaraṃ vā svaravyañjanayordvayam || 11 ||
11. bījapiṇḍasaṃjñāpadamantrāḥ krameṇa turyādijāgradantapadacatuṣṭayasaṃgatā jñeyā ityarthaḥ|
bījaṃ bahusvaraṃ vāpi vijñeyaṃ vibudheśvara|
{1}antarā harayaḥ piṇḍaṃ vkacitsvarasamāyutam || 12 ||
12. antarā madhye sthitāḥ harayaḥ vyañjanāni piṇḍamantra ityarthaḥ| tasyāpavādamāha---vkaciditi|
{1. antarāhurayaḥ A.; antarāhalayaḥ B. G.; antarākulayaḥ C.; anantarāvilaṃ D. }
tattadvācyābhidhā saṃjñā namaḥpraṇavasaṃyutā|
kriyākārakasaṃyogastutisaṃbodhalakṣaṇaḥ || 13 ||
13. padamantrasvarūpamāha---kriyetyādi| saṃbodhaḥ saṃbodhanam|
nānābhijñāsamāyuktaḥ padātmā mantra ucyate|
etaccatuṣṭayaṃ mantraṃ saṃpūrṇaṃ devatātmani || 14 ||
14. abhijñā saṃjñā|
sā catuṣṭayasaṃbaddhā siddhimiṣṭāṃ prayacchati|
kṣetrakṣetrajñabhāvaṃ ca mantrāṇāṃ tridaśeśvara || 15 ||
15. sā; devatā|
vijñāya tattvato mantrān prayuñjīta vicakṣaṇaḥ|
śakraḥ---
kṣetrakṣetrajñasadbhāvaṃ mantrāṇāṃ vada me'mbuje || 16 ||
16. - - - - - - - - - - - -
{2}yadvijñāya na muhyanti siddhimeṣyanti cācirāt|
śrīḥ---
bījaṃ bījavatāṃ jīvaḥ śiṣṭaṃ kṣetraṃ prakīrtitam || 17 ||
17. bījavatāṃ mantrāṇāṃ bījākṣaraṃ jīva ityarthaḥ|
{2. F. omits four lines from here. }
nirbījānāmādi jīvaḥ kṣetraṃ tu pariśeṣitam|
bījānāṃ caiva piṇḍānāmastu kṣetrajña ucyate || 18 ||
18. ādīti| ādyakṣaramityarthaḥ| astu; akārastvityarthaḥ|
śiṣṭaṃ tu kṣetramuddiṣṭamakārarahite punaḥ
kṣetrajñaḥ svara uddiṣṭaḥ kevale ca svare punaḥ || 19 ||
19. akārarahite punariti uttaratrānveti| svaraḥ; yaḥ kaścit svara ityarthaḥ| kevale ca svare ityuttaratrānveti|
jīvaḥ syāt prathamā mātrā dvitīyādi {3}tanurbhavet|
ekamātre tu jīvaḥ syāt saṃskāro'dbhutalakṣaṇaḥ{4} || 20 ||
20. saṃskāra iti| madhyamā vāgityarthaḥ| atrāṣṭādaśādhyāyasthaḥ ṣaḍ‌viṃśaḥ śloko'vadheyaḥ|
{3. manurbhavet B. }
{4. saṃskārodbodhalakṣaṇaḥ I. }
uccāryamāṇaṃ kṣetraṃ syānniḥsvare piṇḍake punaḥ|
prathamo jīva uddiṣṭaḥ śiṣṭaṃ kṣetraṃ pracakṣate{5} || 21 ||
21. uccāryamāṇamiti| vaikharītyarthaḥ|
{5. kṣetrajña ucyate I. }
kṣetrakṣetrajñasadbhāva eṣa te saṃpradarśitaḥ|
ādau madhye tathānte ca triṣu vānyataratra vā || 22 ||
22. - - - - - - - - - - - - -
eṣāṃ piṇḍo'thavā bījaṃ te mantrāḥ sārvakālikāḥ|
bījābhāve tu mantrāṇāṃ bījaṃ kṛtvādimākṣaram || 23 ||
23. yatra mantre bījaṃ nāsti tatra prathamākṣaramanusvārayutaṃ bījamityarthaḥ| yathā gaṇapataye namaḥ ityatra gaṃ iti bījamantraḥ|
anusvārayutaṃ paścāt sakalaṃ mantra ucyate|
prakrīḍayanti puruṣaṃ mantrā rāgeṇa rañjitam || 24 ||
24. - - - - - - - - - - - - -
caturdaśavibhāgasthe prākṛte bhuvanādhvani|
turyavarjaṃ suṣuptyādyo prākṛte ca padādhvani || 25 ||
25. - - - - - - - - - - - -
ācāryadṛṣṭipātasthaṃ puruṣaṃ saṃyatendriyam|
prasādasumukhā mantrā uttārya bhuvanādhvanaḥ || 26 ||
26. - - - - - - - - - - - -
{6}padādhvanaśca vairāgyaṃ janayantaḥ pade pade|
kramāttattvakalāvarṇapadavīṣu nayanti tam || 27 ||
27. - - - - - - - - - - -
{6. I. omits three lines from here. }
māntraṃ prāsādamāsādya nirdhūtāśeṣabandhanaḥ|
lakṣmīnārāyaṇākhyaṃ tadviśati brahma śāśvatam || 28 ||
28. - - - - - - - - - - - - -
śakraḥ---
ācāryaḥ kīdṛśo devi śiṣyastasya ca kīdṛśaḥ|
mantreṣu katamo mantraḥ prabhavet paramāptaye || 29 ||
29. - - - - - - - - - - - -
kathaṃ sa copadeṣṭavya etad brūhi namo'stu te|
śrīḥ---
sarvalakṣaṇasaṃyukto{7} brāhnaṇe vedapāragaḥ || 30 ||
30. - - - - - - - - - - - -
{7. saṃpanno C. }
ṣaṭ‌karmanirataḥ śāntaḥ pañcakālarataḥ śuciḥ|
pañcarātrārthavinmaunī mantrākṣarakṛtaśramaḥ || 31 ||
31. - - - - - - - - - - -
na sthūlo na kṛśo hrasvo na kāṇo naiva rogavān|
nāndho na badhiro mūḍho na khalvāṭo na paṅ‌gukaḥ || 32 ||
32. - - - - - - - - - - - - -
na hīnāṅgo'tiriktāṅgo na śvitrī na ca ḍāmbhikaḥ|
na krodhano na duścarmā na lobhahatacetanaḥ || 33 ||
33. - - - - - - - - - - - -
akulīnaṃ durācāraṃ śaṭhaṃ jihnaṃ ca varjayet|
dayādāntiśamopetaṃ{8} dṛḍhabhaktiṃ kriyāparam || 34 ||
34. - - - - - - - - - - - - -
satyavāk‌chīlasaṃpannaṃ rekhākarmasu kauśalam|
jitendriyaṃ susutuṣṭa karuṇāpūrṇamānasam || 35 ||
35. - - - - - - - - - - - - -
{9}āryalakṣaṇasaṃpannamārjavaṃ cāruhāsinam|
{10}evaṃguṇagaṇākīrṇaṃ guruṃ vidyāttu vaiṣṇavam{11} || 36 ||
36. - - - - - - - - - - - - - - -
{9. āryaṃ F.; kuryāt I. }
{10. evaṃguruguṇā C. B. }
{11. kevalam F. }
śiṣyaśca tādṛśo jñeyaḥ sarvalakṣaṇalakṣitaḥ|
kṣāntiśīlaṃ sudhīmantaṃ{12} krodhalobhavivarjitam || 37 ||
37. - - - - - - - - - - - - - -
{12. suśīlaṃ taṃ B. }
snānārcanarataṃ{13} nityaṃ guruśuśrūṣaṇodyatam|
viprāgnidevapitṛṣu bhaktaṃ tarpaṇaśīlinam || 38 ||
38. - - - - - - - - - - -
{13. paraṃ C. }
kulīnaṃ ca tathā prājñaṃ śāsrārthanirataṃ sadā|
brāhnaṇaṃ kṣatriyaṃ vaiśyaṃ śūdraṃ vā bhagavatparam || 39 ||
39. - - - - - - - - - - - - -
īdṛglakṣaṇasaṃyuktaṃ śiṣyamārjavasaṃyutam|
varṇadharmakriyopetāṃ nārīṃ vā sadvivekinīm || 40 ||
40. - - - - - - - - - - - -
{14}vidyādanumate patyurananyāṃ patimāninam|
evaṃlakṣaṇakaṃ śiṣyamācāryo bhagavanmayaḥ|
{15}jñāpayedvidhivanmantrān gurudṛṣṭyā samīkṣya tu || 41 ||
41. anena srīśūdrayorapi tāntrikamantragrahaṇe adhikāro vidhīte| paraṃ tu tāraviṣaye viśeṣo granthāntareṣvavagantavyaḥ|
{14. dadyāt I. }
{15. śrāvayedvividhān C. }
iti {16}śrīpāñcarātrasāre lakṣmītantre guruśiṣyalakṣaṇaṃ nāma ekaviṃśo'dhyāyaḥ
{16. śrīpañcarātra A.; śrīpāñcarātre B. D. }
********ityekaviṃśo'dhyāyaḥ********