Chapter 7

tatastātaḥ sabhāṃ dṛṣṭvā tathā saṃjātasaṃpadam |
yathāpradhānamābhāṣya vinītavadabhāṣata || 1 ||
[Analyze grammar]

kimatra pṛcchyate yatra kṣiptāṅgirasabuddhayaḥ |
apṛṣṭā eva bhāṣadhve prītinirvāsitatrapāḥ || 2 ||
[Analyze grammar]

tena yad rocate sādhu pūjyebhyaḥ pūjitaṃ dinam |
tatrāyaṃ svasutaḥ prītyā bālaḥ saṃskriyatāmiti || 3 ||
[Analyze grammar]

atha prastāvae etasminnanujñātapraveśayā |
kaliṅgasenayā rājā dūrādeva namaskṛtaḥ || 4 ||
[Analyze grammar]

ehīti sā nṛpeṇoktā na atimantharavikramā |
upagamyopaparyaṅkamadhyāstādiṣṭamāsanam || 5 ||
[Analyze grammar]

āyuktamauktikastokabhūṣaṇā vimalāmbarā |
saradvimalahaṃseva cakāśatkāśacāmarā || 6 ||
[Analyze grammar]

kaṃdharāmūlavisrastaślathabandhaśiroruhā |
paścimācalakūṭasthatimirā dyaurivoṣasi || 7 ||
[Analyze grammar]

yauvanāntamanuprāptā prāvṛḍantamivāpagā |
calaccaṭulatākārā bhṛtāpi nibhṛtākṛtiḥ || 8 ||
[Analyze grammar]

vinītāpi pragalbheva sthavireva taruṇyapi |
mitavāgapi vācālāvyākhyātavyā hi tanmatiḥ || 9 ||
[Analyze grammar]

upaviṣṭā purastasyādaśavarṣeva bālikā |
tayā me dṛṣṭirākṛṣṭā guṇairnauriva mantharā || 10 ||
[Analyze grammar]

acirasthāpitasphītabhaṅgurasnigdhamūrdhajā |
nilīnakokilakulā tanvī cūtalateva sā || 11 ||
[Analyze grammar]

nimeṣonmeṣaśūnyena sahajāyāmaśobhinā |
cakṣuṣā vīkṣyamāṇā māṃ sahasrākṣamivākarot || 12 ||
[Analyze grammar]

rūḍhā dāḍimagarbhābhadaśanodbhāsatiānanā |
drāḍimīmukulākāravibhaktadaśanacchadā || 13 ||
[Analyze grammar]

sitasārasanonnadhamahārajanakañcukā |
raktendīvaramāleva mṛṇāladalabandhanā || 14 ||
[Analyze grammar]

unnīyante sma bālāyāścihnairaṅgāni komalaiḥ |
latāyāḥ sahakārasya phalāni mukulairiva || 15 ||
[Analyze grammar]

athāpṛcchanmahīpālaḥ kasyeyaṃ rūpiṇīriti |
duhitṛtvamanuprāptā nāmāsyāḥ kathyatāmiti || 16 ||
[Analyze grammar]

kaliṅgasenayākhyātaṃ śocyeyaṃ tanayā mama |
yāmeva pṛcchati svāmī bhṛtyāṃ madanamañjukām || 17 ||
[Analyze grammar]

tataḥ sasnehamāhūya mātarehīti bhūpatiḥ |
ūrūmāropayadbālāṃ sā cemāṃ vāmalocanām || 18 ||
[Analyze grammar]

drutamādityaśarmā ca gṛhītvā lagnamabravīt |
aho citramiti smeramabhūcca nṛpatermukham || 19 ||
[Analyze grammar]

yudhamānarajanmeṣaviṣāṇonmeṣajanmanā |
dhvanināpi na taccakṣurākṣiptaṃ nihitaṃ mayi || 20 ||
[Analyze grammar]

rājā tu vastrābharaṇamanalpamapakalmaṣam |
sāmbāyai dāpayitvāsyai tadāsthānaṃ vyasarjayat || 21 ||
[Analyze grammar]

antaḥpuraṃ mahīpālaḥ kumāravaṭakāmaham |
dīrghamuṣṇaṃ ca viśvasya bālā svaṃ bhavanaṃ yayau || 22 ||
[Analyze grammar]

atha puṇye dine rājā dvijarājajanāvṛtaḥ |
svayaṃ bhadrāsanasthaṃ māṃ yauvarājye'bhiṣiktavān || 23 ||
[Analyze grammar]

tathā hariśikhaṃ rājā mudājñāpitavāniti |
yatra prasthāpyate bhartā gantavyaṃ tava nirvyatham || 24 ||
[Analyze grammar]

senāpatiśca mantrī ca bhavānbhavatu sodyamaḥ |
ityājñāpitavān rājā prahvaṃ hariśikhaṃ tataḥ || 25 ||
[Analyze grammar]

khaḍgacarmadharo rakṣedapramattaḥ prabhuṃ bhavān |
ityājñayā pramuditaṃ kṛtavānmarubhūtikam || 26 ||
[Analyze grammar]

ādiśadgomukhaṃ bhartū ramaṇīyaṃ manastvayā |
ramaṇīyaiḥ kriyālāpairapavādojjhitairiti || 27 ||
[Analyze grammar]

tapantakamathāvocatkarṇakuṇḍalavṛttinā |
na tyājyo bhavatā svāmī kadāciditi pārthivaḥ || 28 ||
[Analyze grammar]

tairahaṃ saṃvṛto'nyaiśca gṛhītachattracāmaraiḥ |
maṅgalālaṃkṛtāṅgaśca suraviprānavandiṣi || 29 ||
[Analyze grammar]

piturmātaramāsīnāṃ pitaraṃ ca samantriṇam |
ambādvayapradhānaṃ ca sphītaṃ rājāvarodhanam || 30 ||
[Analyze grammar]

tataḥ puṣparathārūḍhaḥ prasarpanmaṅgaladhvanim |
puṣpapallavalājādyāmākrāmaṃ paritaḥ purīm || 31 ||
[Analyze grammar]

tataḥ prāptābhiṣeko'haṃ sārdhaṃ hariśikhādibhiḥ |
svādhikāraparaiḥ krīḍan saṃvatsaramayāpayam || 32 ||
[Analyze grammar]

varṣābhiṣeke nirvṛtte pūrveṇa samaḍambare |
āvṛttyā sarvavidyānāṃ sthiratāmudapādayam || 33 ||
[Analyze grammar]

evaṃ me samatīteṣu keṣuciddivaseṣvaham |
prātarbhojanavelāyāṃ na paśyāmi sma gomukham || 34 ||
[Analyze grammar]

na cānena vinā mahyaṃ nirvāṇamapi rocate |
tenānena vināsmabhirabhuktairgamitaṃ dinam || 35 ||
[Analyze grammar]

jñāyatāṃ gomukhaḥ kveti mayokte marubhūtikaḥ |
unmattakaḥ sa saṃvṛtta ityavocadgatāgataḥ || 36 ||
[Analyze grammar]

yadi cātrāryaputrasya nāsti saṃpratyayastataḥ |
gatvā tapantakastasya vikārānprekṣatāmiti || 37 ||
[Analyze grammar]

tatastapantako gatvā punarāgatya coktavān |
āryaputra na tanmithyā yadāha marubhūtikaḥ || 38 ||
[Analyze grammar]

vimalādarśasaṃkrāntaṃ mukhamālokya gomukhaḥ |
kampayitvā śiraḥ krodhānnirdārayati locane || 39 ||
[Analyze grammar]

kadācicca smitaṃ kṛtvā prasanne netratārake |
saṃcārayati karṇāntaṃ kadācinnāsikāntaram || 40 ||
[Analyze grammar]

madhūcchiṣṭanigṛṣṭau ca tāmbūladravalohitau |
vivṛtya dūramadharau dantāntenāpi niśyati || 41 ||
[Analyze grammar]

vikārānevamākārāndṛṣṭvā tasyāhamāgataḥ |
tenāryaputra tvaritaṃ kriyāsya kriyatāmiti || 42 ||
[Analyze grammar]

athānantaramāgatya saṃbhogamṛditāmbaraḥ |
prāgalbhyānmṛduvailakṣyo māmavandata gomukhaḥ || 43 ||
[Analyze grammar]

kaccitsvastho'si bhadreti mayoktaḥ sannabhāṣata |
kimarthaṃ cāhaṃ svastho na hyahaṃ marubhūtikaḥ || 44 ||
[Analyze grammar]

yo hi nāgarakaṃ manyo manyate māmanāmayam |
unmattakaṃ sa unmattaḥ prakṛtibhraṣṭamānasaḥ || 45 ||
[Analyze grammar]

atha śāstropaniṣadastāta yaugandharāyaṇāt |
ahaṃ śikṣitumārabdhaḥ sa cāpi vyāpṛtaḥ sadā || 46 ||
[Analyze grammar]

vyācaṣṭe ca tadā mahyamantaraṃ labhate yadā |
tena māṃ mā pratīkṣadhvaṃ bhojanāyodyatā iti || 47 ||
[Analyze grammar]

tataścārabhya divasātsāyamāyātavānayam |
kadāciddivase'nyasmindvayostriṣu gateṣu ca || 48 ||
[Analyze grammar]

ekadā bhojanasyānte kuto'pyāgatya sādaraḥ |
aho śobhantae ityuccaiḥ prāśaṃsatkhaṇḍamodakān || 49 ||
[Analyze grammar]

mayā tu dāpitānanyān krudhyanniva vihāya saḥ |
balādākṛṣya gatavān svayamucchiṣṭamodakān || 50 ||
[Analyze grammar]

āryaputra sphuṭībhūtamunmattatvaṃ priyasya vaḥ |
acikitsyaśca saṃvṛtta ityavocattapantakaḥ || 51 ||
[Analyze grammar]

evamābharaṇaṃ vāsastāmbūlaṃ candanādi ca |
labdhalabdhaṃ gacchati sma gṛhītvā kvāpi gomukhaḥ || 52 ||
[Analyze grammar]

evaṃprāye ca vṛttānte kumāravaṭakaṃ gataḥ |
niveditābhyāgamano rumaṇvānmāmavandata || 53 ||
[Analyze grammar]

taṃ tātamiva dṛṣṭvāhamupakrāntaśca vanditum |
tena coddhatahastena tāta mā meti vāritaḥ || 54 ||
[Analyze grammar]

uktaṃ ca na tvayā tāta bālena vāsmadādayaḥ |
vandyastvamadhunā prāpto loke'smiṃl lokapālatām || 55 ||
[Analyze grammar]

anyacca rājasaṃdeśamākhyātumahamāgataḥ |
yattvāmāha mahārājaḥ sabhṛtyaṃ tannibodhyatām || 56 ||
[Analyze grammar]

puryāmatra śaratkāle yātrā citrā pravartitā |
yā nāgavanayātreti na kvacinna vikathyate || 57 ||
[Analyze grammar]

etāvantaṃ ca sā kālaṃ yuṣmabhyaṃ na prakāśitā |
mā bhūdvidyāvighāto vastadvyākṣiptadhiyāmiti || 58 ||
[Analyze grammar]

cittāpahāriṇī yātrā hāryacittā ca bālatā |
cittavidyā ca vidyeta durghaṭastrikasaṃgamaḥ || 59 ||
[Analyze grammar]

uktaṃ cājāgarūkasya mandabuddheḥ sukhātmanaḥ |
granthabhīrośca sidhyanti na śāstrāṇi tapāṃsi ca || 60 ||
[Analyze grammar]

adhunā buddhaboddhavyāḥ prāptakomalayauvanāḥ |
bhavanto niḥsukhāḥ santaḥ saṃtapantīva me manaḥ || 61 ||
[Analyze grammar]

tadasti yadi vaḥ kāṅkṣā taṃ yātrotsavamīkṣitum |
tato yāta nirāśaṅkānāsti cedāsyatāmiti || 62 ||
[Analyze grammar]

mayoktaṃ suhṛdaḥ pṛṣṭvā yadno niṣpadyate hitam |
tadvo vijñāpayiṣyāmi tāvatpṛcchāmi tāniti || 63 ||
[Analyze grammar]

rumaṇvatā tataḥ proktaṃ kapolāgalitāśruṇā |
haihayānāṃ kulaṃ tuṅgaṃ ciraṃ vijayatāṃ jagat || 64 ||
[Analyze grammar]

bhavatā sādhuvṛttena gotradāsāḥ kṛtā vayam |
yannaḥ saṃbhāvitāḥ putrāḥ praśnaprativacaḥkṣamāḥ || 65 ||
[Analyze grammar]

ityuktvā nirgate tasmin suhṛdaḥ pṛṣṭavānaham |
yasya yadvaḥ sthitaṃ buddhau tena tatkathyatāmiti || 66 ||
[Analyze grammar]

tato hariśikhenoktaṃ na me gamanamīpsitam |
yataḥ śūnyāni durgāṇi gṛhyante'nantarairnṛpaiḥ || 67 ||
[Analyze grammar]

śrutamevāryaputreṇa proṣite jagatīpatau |
vijñāya nagarīṃ śūnyāṃ yattadāruṇinā kṛtam || 68 ||
[Analyze grammar]

durgasya ca kṛtā rakṣā rājā ca paritoṣitaḥ |
khyāpitaṃ dhīracittatvamātmanaśca bhavediti || 69 ||
[Analyze grammar]

tvaṃ kimāttheti pṛṣṭaḥ sannavocanmarubhūtikaḥ |
yuktaṃ hariśikhenoktamityetacca tapantakaḥ || 70 ||
[Analyze grammar]

athoktavān smitamukhaḥ sāsūya iva gomukhaḥ |
kimatra bhaṇyate ko'nyo mantrī hariśikhādvaraḥ || 71 ||
[Analyze grammar]

idaṃ tvācakṣva kenāyaṃ niyukto durgarakṣaṇe |
rakṣataścāniyuktasya doṣamandha na paśyasi || 72 ||
[Analyze grammar]

yuvarājo yuvā vidvān kṛtāstro mandakautukaḥ |
bhavadādisahāyaśca kathaṃ yāyādacittatām || 73 ||
[Analyze grammar]

yacca rājoditaṃ vakṣye nāsti cedāsyatāmiti |
tadāśayaparīkṣārthamapi cettanna duṣyati || 74 ||
[Analyze grammar]

ataḥ pustakavinyastagranthabaddhārthabuddhayaḥ |
praśnānugrahamarhanti nedṛśakūṭamantriṇaḥ || 75 ||
[Analyze grammar]

ahaṃ punarguṇopāyaprayogakuśalo yataḥ |
cetasyaiḥ saha saṃparkaḥ prayogakuśalairmama || 76 ||
[Analyze grammar]

sukhaṃ naḥ sevituṃ kālo na ṣāḍguṇyakadarthanām |
yaccoktaṃ dharmaśāstreṇa tattāvadavadhīyatām || 77 ||
[Analyze grammar]

vayasaḥ karmaṇo'rthasya śrutasyābhijanasya ca |
veṣavāgbuddhisārūpyamācaranvicarediha || 78 ||
[Analyze grammar]

tenottiṣṭhata gacchāmo yātrāmadbhutadarśanām |
krīḍiṣyāmaśca kāntāsu sthalīṣu mṛgayāmiti || 79 ||
[Analyze grammar]

tacca me gomukhenoktaṃ praviṣṭaṃ hṛdayaṃ yataḥ |
yuktasaccānukūlaṃ ca vacaḥ kasmai na rocate || 80 ||
[Analyze grammar]

punaśca gomukhenoktaṃ yātrāṃ lokasya gacchataḥ |
prāsādatalamāruhya samṛddhirdṛśyatāmiti || 81 ||
[Analyze grammar]

athāhamabhraṃlihaśaṅgacakraṃ dhvajaprabhāpīḍitaśakracāpam |
prāsādamārohamudāraśobhaṃ śaśīva pūrvācalarājakūṭam || 82 ||
[Analyze grammar]