Chapter 167

yudhiṣṭhira uvāca |
tanme kathaya deveśa yena dattena mānavaḥ |
bahuputro bahudhano bahubhṛtyaśca jāyate || 1 ||
[Analyze grammar]

śrīkṛṣṇa uvāca |
purā bhārata vaṃśesminrājāsīddhavyavāhanaḥ || |
pitṛpaitāmahaṃ tena prāptaṃ rājya makaṃṭakam || 2 ||
[Analyze grammar]

na tasya rājye vidhvaṃso na vairijanitaṃ bhayam |
śarīrotthamahāvyādhirna caivāṃtaradāyakaḥ || 3 ||
[Analyze grammar]

tasyaivaṃ kurvato rājyaṃ pūrvakarmārjitāśubhāt |
nāsti bhṛtyo bhārasahaḥ sarvarājyadhuraṃdharaḥ || 4 ||
[Analyze grammar]

na putraḥ priyakṛtkaścinna maṃtrī madhurākṣaraḥ |
na mitraṃ kāryakaraṇe samartho na suhṛttathā || 5 ||
[Analyze grammar]

na bhojyasamaye prāpte bhojanaṃ sārvakāmikam |
na pūgaphalasaṃyuktaṃ tāṃbūlaṃ vasanaṃ na ca || 6 ||
[Analyze grammar]

na dhanaṃ janasaṃbandhakārako ratnasaṃcayaḥ |
tasyaivaṃ kurvato rājyamavyāhatamaceṣṭitam || 7 ||
[Analyze grammar]

athaikasmindine vipraḥ pippalādo'tiviśrutaḥ |
ājagāma mahāyogī rājñaḥ pārśvaṃ mahādyutiḥ || 8 ||
[Analyze grammar]

tamāgataṃ muniṃ dṛṣṭvā rājapatnī śubhāvatī |
pādyārghyāsanadānena sarvathā tamapūjayat || 9 ||
[Analyze grammar]

tataḥ kathāṃte kasmiṃścittamuvāca śubhāvatī |
bhagavanrājyametannaḥ sarvabādhāvivarjitam || 10 ||
[Analyze grammar]

kasmānna bhṛtyāḥ putrā vā maṃtrimitrādikaṃ dvija |
bhogāvāptirna ca tathā sarvalokātiśāyinī || 11 ||
[Analyze grammar]

pippalāda uvāca |
yadyena pūrvavihitaṃ tadasau prākṛte phalam |
karmabhūmiriyaṃ rājñi nātaḥ śocitumarhasi || 12 ||
[Analyze grammar]

na tatkurvaṃti rājāno na dāyādā na śatravaḥ |
na bāṃdhavā na mitrāṇi yadyena na purā kṛtam || 13 ||
[Analyze grammar]

tasmādbhavadbhiyarddattaṃ prāptaṃ tadrājyamuttamam |
bhṛtyamitrādisaṃbaṃdho na dattaḥ prāpyate kutaḥ || 14 ||
[Analyze grammar]

śubhāvatyuvāca |
idānīmeva viprarṣe kasmāttannopadiśyate |
yena me bahavaḥ putrā dhanaṃ bhṛtyā bhavaṃti vai || 15 ||
[Analyze grammar]

maṃtro vā siddhayogo vā vrataṃ dānamupoṣitam |
kathayasvāmalamate yena saṃpadyate sukham || 16 ||
[Analyze grammar]

tataḥ sa kathayāmāsa pippalādo dvijottamaḥ |
āpākākhyaṃ mahādānaṃ sarvasaṃpatpradāyakam || 17 ||
[Analyze grammar]

śraddhayā kuruśārdūla nārī vāpyatha vā pumān |
yena dattena bhāgyānāṃ bahūnāṃ bhājanaṃ bhavet || 18 ||
[Analyze grammar]

tacchrutvā sa dadau rājā'pākākhyaṃ dānamuttamam |
lebhe putrānpaśūnbhṛtyānmaṃtrimitrasuhṛjjanān || 19 ||
[Analyze grammar]

śrīkṛṣṇa uvāca |
āpākākhyaṃ mahādānaṃ kathayāmi yudhiṣṭhira |
dattena yena kāmānāṃ pumānbhavati bhājanam || 20 ||
[Analyze grammar]

grahatārābalaṃ labdhvā bhārgavaṃ pūjayecchubham |
vāsobhirbhūṣaṇaiścaiva puṣpairagarucaṃdanaiḥ || 21 ||
[Analyze grammar]

kuryāttathaiva sammānaṃ yathā tuṣṭo'bhijāyate |
kuruṣva tvaṃ me bhāṃḍāni gurūṇi ca laghūni ca || 22 ||
[Analyze grammar]

maṇikādīni śubhrāṇi sthālyaśca sumanoharāḥ |
ghaṭakāḥ karakāścaiva galaṃtyaḥ kuṃḍalāni ca || 23 ||
[Analyze grammar]

śarāvādīni pātrāṇi bhāṃḍamuccāvacaṃ bahu |
saṃpādaya mahābhāga viśvakarmā tvameva hi || 24 ||
[Analyze grammar]

bhārgavo'pi prayatnena nānā bhāṃḍānvitaṃ śubham |
āpākaṃ kalpayeddivyaṃ vidhidṛṣṭena karmaṇā || 29 ||
[Analyze grammar]

sahasramekaṃ bhāṃḍānāṃ sthāpayitvā vicakṣaṇaḥ |
saṃdhyākāle jvalitvā tu dadyāccāpi hutāśanam || 26 ||
[Analyze grammar]

rātrau jāgaraṇaṃ kuryādgītamaṅgalanisvanaiḥ |
tataḥ prabhāte vimale jñātvā nirvāpitaṃ śanaiḥ || 27 ||
[Analyze grammar]

raktavastraiḥ samācchādya puṣpamālābhirarcayet |
yajamānastataḥ snātvā śuklāṃbaradharaḥ śuciḥ || 28 ||
[Analyze grammar]

hemaraupyāṇi bhāṃḍāni tāmralohamayāni ca |
paritaḥ sthāpayitvā ca svaśaktyā tāni ṣoḍaśa || 29 ||
[Analyze grammar]

pūjayitvā prayatnena kṛtvā cāru pradakṣiṇām |
brāhmaṇānpūjayitvā ca bhārgavaṃ pūjya yatnataḥ || 30 ||
[Analyze grammar]

nāryaścāvidhavāstatra samānīya prapūjya ca |
pradakṣiṇaṃ tataḥ kṛtvā maṃtreṇānena pūjayet || 31 ||
[Analyze grammar]

āpākabrahmarūposi bhāṃḍānīmāni jaṃtavaḥ |
pradānātte prajāpuṣṭiḥ svargaścāstu mamākṣayaḥ || 32 ||
[Analyze grammar]

bhāṃḍarūpāṇi yānyatra kalpitāni mayā kila |
bhūtvā satpātrarūpāṇi upatiṣṭhaṃtu tāni me || 33 ||
[Analyze grammar]

yā ca yadbhāṃḍamādatte tasyaitaddāpayettataḥ |
svecchayā caiva gṛhṇātu na nivāryāstu kāścana || 34 ||
[Analyze grammar]

anena vidhinā yastu dānametatprayacchati |
viśvakarmā bhavettuṣṭastasya janmatrayaṃ nṛpa || 35 ||
[Analyze grammar]

nārī ca dattvā saubhāgyamatulaṃ pratipadyate |
gṛhaṃ sarvaguṇopetaṃ bhṛtyamitrajanairvṛtam || 36 ||
[Analyze grammar]

aviyogaṃ sadā bhartrā rūpaṃ cānuttamaṃ labhet |
bhūdānametannirdiṣṭaṃ prakāreṇa tavānagha |
bhidyate bahubhirbhedairbhūmireṣā nareśvara || 37 ||
[Analyze grammar]

niṣpādya bhāṃḍanicayoccataraṃ prayatnādāpākadānamiha yā kurute varastrī |
sā putrapautrapaśuvṛddhimukhāni bhuktvā pretya svabhartṛsahitā sukhinī sadāste || 38 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāda āpākadānavidhivarṇanaṃ nāma saptaṣaṣṭyuttaraśatatamo'dhyāyaḥ || 167 ||
[Analyze grammar]