Chapter 8

yudhiṣṭhira uvāca |
brahmeśa keśavādīnāṃ gauryā gaṇapatestathā |
durgāsūryāgnisomānāṃ vratāni madhusūdana || 1 ||
[Analyze grammar]

śāstrāṃtareṣu dṛṣṭāni tava buddhigatāni ca |
tāni sarvāṇi me deva vada devakiranandana || 2 ||
[Analyze grammar]

pratipatkramayogena vihitā yasya yā tithiḥ |
devasya tasyāṃ yatkāryaṃ tadaśeṣeṇa kīrtaya || 3 ||
[Analyze grammar]

śrīkṛṣṇa uvāca |
vasaṃte kiṃśukāśokaśobhane pratipattithiḥ |
śuklā tasyāṃ prakurvīta snānaṃ niyamatatparaḥ || 4 ||
[Analyze grammar]

nārī naro vā rājendra saṃtarpya pitṛdevatāḥ |
nadyāstīre taḍāge vā gṛhe vā niyatātmavān || 5 ||
[Analyze grammar]

piṣṭātakena vilikhedvatsaraṃ puruṣākṛtim |
tataścandanacūrṇena puṣpadhūpādinārcayet || 6 ||
[Analyze grammar]

dīpaiścāpi sanaivedyaiḥ pūjayedvatsaraṃ tadā |
māsartunāmabhiḥ paścānnamaskārāṃtayojitaiḥ |
pūjayedbrāhmaṇānvidvānmaṃtrairvedoditaiḥ śubhaiḥ || 7 ||
[Analyze grammar]

saṃvatsaro'si parivatsarosīḍā vatsaro'bhitsaro'si uṣasaste kalpaṃtāmahorātrāste kalpaṃtāmardhamāsaste kalpatāṃ māsāste kalpatāmṛtavaste kalpantāṃ saṃvatsaraste kalpatām || 8 ||
[Analyze grammar]

evamabhyarcya vāsobhiḥ paścāttamabhiveṣṭayet |
kālodbhavairmūlaphalainairvedyairmodakādibhiḥ || 9 ||
[Analyze grammar]

tatastaṃ prārthayetpaścātpuraḥ sthitvā kṛtāṃjaliḥ |
bhagavaṃstvatprasādena varṣa śubhadamastu me || 10 ||
[Analyze grammar]

evamuktvā yathāśakti dadyādviprāya dakṣiṇām |
lalāṭapaṭṭe tilakaṃ kuyaccāṃdanapaṅkajam || 11 ||
[Analyze grammar]

tataḥ prabhṛtyanudinaṃ tilakālaṃkṛtaṃ mukham |
dhāryaṃ saṃvatsaraṃ yāvacchaśineva nabhastalam || 12 ||
[Analyze grammar]

evaṃ naro vā nārī vā vratametatsamācaret |
sadaiva puruṣa vyāghra bhogānbhuvi bhunaktyasau || 13 ||
[Analyze grammar]

bhūtāḥ pretāḥ piśācāśca durvārā vairiṇo grahāḥ |
nirarthakā bhavaṃtyete tilakaṃ vīkṣya tatkṣaṇāt || 14 ||
[Analyze grammar]

pūrvamāsīnmahīpālo nāmnā śatruṃjayo jayī |
citralekheti tasyābhūdbhāryā cāritrabhūṣaṇā || 15 ||
[Analyze grammar]

tayā vratamidaṃ caitre gṛhītaṃ dvijasannidhau |
saṃvatsaraṃ pūjayitvā dhṛtvā hṛdi janārdanam || 16 ||
[Analyze grammar]

asūyuḥ kṣeptukāmo vā samāgacchati yaḥ puraḥ |
prayāti priyakṛttasyā dṛṣṭvā mukhamadhomukhaḥ || 17 ||
[Analyze grammar]

sapatnīdarpāpaharā vaśīkṛtamahītalā |
bharturiṣṭā prahṛṣṭā ca sukhamāste nirākulā || 18 ||
[Analyze grammar]

tāvatkareṇābhibhūto bhartā putraḥ savedanaḥ |
śiro'rtyā nāśaṃ prayātaḥ suhṛdāṃ duḥkhadāyakaḥ || 19 ||
[Analyze grammar]

dharmarājapuraṃ prāptuṃ sarvabhūtāpahārakaḥ |
tasminkṣaṇe mahārājaḥ dharmarājasya kiṃkarāḥ || 20 ||
[Analyze grammar]

tasya dvāramanuprāptāḥ praveṣṭuṃ gṛhamañjasā |
śatruṃjayaṃ samānetuṃ kālamṛtyupuraḥsarāḥ || 21 ||
[Analyze grammar]

pārśvasthitāṃ citralekhāṃ tilakālaṃkṛtānanām |
dṛṣṭvā pranaṣṭasaṃkalpāḥ parāvṛtya gatāḥ punaḥ || 22 ||
[Analyze grammar]

gateṣu teṣu sa nṛpaḥ putreṇa saha bhārata |
nīrujo bubhuje bhogānpūrvakarmārjitāñchubhān || 23 ||
[Analyze grammar]

etadvrataṃ mahābhāga kīrtitaṃ te mahodayam |
śaṃkareṇa samākhyātaṃ mama pūrvaṃ yudhiṣṭhira || 24 ||
[Analyze grammar]

etattrilokatilakālakabhūṣaṇaṃ te khyātaṃ vrataṃ sakaladuḥkhaharaṃ paraṃ ca |
itthaṃ samācarati yaḥ sa sukhaṃ vihṛtya martyaḥ prayāti padamāpadi padmayoneḥ || 25 ||
[Analyze grammar]