Chapter 81

[English text for this chapter is available]

śrīśuka uvāca |
sa itthaṃ dvijamukhyena saha saṅkathayan hariḥ |
sarvabhūtamano'bhijñaḥ smayamāna uvāca tam || 1 ||
[Analyze grammar]

brahmaṇyo brāhmaṇaṃ kṛṣṇo bhagavān prahasan priyam |
premṇā nirīkṣaṇenaiva prekṣan khalu satāṃ gatiḥ || 2 ||
[Analyze grammar]

śrībhagavānuvāca |
kimupāyanamānītaṃ brahmanme bhavatā gṛhāt |
aṇvapyupāhṛtaṃ bhaktaiḥ premṇā bhuryeva me bhavet |
bhūryapyabhaktopahṛtaṃ na me toṣāya kalpate || 3 ||
[Analyze grammar]

patraṃ puṣpaṃ phalaṃ toyaṃ yo me bhaktyā prayacchati |
tadahaṃ bhaktyupahṛtaṃ aśnāmi prayatātmanaḥ || 4 ||
[Analyze grammar]

ityukto'pi dvijastasmai vrīḍitaḥ pataye śriyaḥ |
pṛthukaprasṛtiṃ rājan na prāyacchadavāṅmukhaḥ || 5 ||
[Analyze grammar]

sarvabhūtātmadṛk sākṣāt tasyāgamanakāraṇam |
vijñāyācintayannāyaṃ śrīkāmo mābhajatpurā || 6 ||
[Analyze grammar]

pat‍nyāḥ pativratāyāstu sakhā priyacikīrṣayā |
prāpto māmasya dāsyāmi sampado'martyadurlabhāḥ || 7 ||
[Analyze grammar]

itthaṃ vicintya vasanāt cīrabaddhān dvijanmanaḥ |
svayaṃ jahāra kimidaṃ iti pṛthukataṇḍulān || 8 ||
[Analyze grammar]

nanvetadupanītaṃ me paramaprīṇanaṃ sakhe |
tarpayantyaṅga māṃ viśvaṃ ete pṛthukataṇḍulāḥ || 9 ||
[Analyze grammar]

iti muṣṭiṃ sakṛjjagdhvā dvitīyāṃ jagdhumādade |
tāvacchrīrjagṛhe hastaṃ tatparā parameṣṭhinaḥ || 10 ||
[Analyze grammar]

etāvatālaṃ viśvātman sarvasampatsamṛddhaye |
asminloke athavāmuṣmin puṃsastvattoṣakāraṇam || 11 ||
[Analyze grammar]

brāhmaṇastāṃ tu rajanīṃ uṣitvācyutamandire |
bhuktvā pītvā sukhaṃ mene ātmānaṃ svargataṃ yathā || 12 ||
[Analyze grammar]

śvobhūte viśvabhāvena svasukhenābhivanditaḥ |
jagāma svālayaṃ tāta pathyanuvrajya nanditaḥ || 13 ||
[Analyze grammar]

sa cālabdhvā dhanaṃ kṛṣṇān na tu yācitavān svayam |
svagṛhān vrīḍito'gacchan mahaddarśananirvṛtaḥ || 14 ||
[Analyze grammar]

aho brahmaṇyadevasya dṛṣṭā brahmaṇyatā mayā |
yad daridratamo lakṣmīṃ āśliṣṭo bibhratorasi || 15 ||
[Analyze grammar]

kvāhaṃ daridraḥ pāpīyān kva kṛṣṇaḥ śrīniketanaḥ |
brahmabandhuriti smāhaṃ bāhubhyāṃ parirambhitaḥ || 16 ||
[Analyze grammar]

nivāsitaḥ priyājuṣṭe paryaṅke bhrātaro yathā |
mahiṣyā vījitaḥ śrānto bālavyajanahastayā || 17 ||
[Analyze grammar]

śuśrūṣayā paramayā pādasaṃvāhanādibhiḥ |
pūjito devadevena vipradevena devavat || 18 ||
[Analyze grammar]

svargāpavargayoḥ puṃsāṃ rasāyāṃ bhuvi sampadām |
sarvāsāmapi siddhīnāṃ mūlaṃ taccaraṇārcanam || 19 ||
[Analyze grammar]

adhano'yaṃ dhanaṃ prāpya mādyāt uccaiḥ na māṃ smaret |
iti kāruṇiko nūnaṃ dhanaṃ me'bhūri nādadāt || 20 ||
[Analyze grammar]

iti taccintayan antaḥ prāpto niyagṛhāntikam |
sūryānalendusaṅkāśaiḥ vimānaiḥ sarvato vṛtam || 21 ||
[Analyze grammar]

vicitropavanodyānaiḥ kūjad‍dvijakulākulaiḥ |
protphullakamudāmbhoja kahlārotpalavāribhiḥ || 22 ||
[Analyze grammar]

juṣṭaṃ svalaṅkṛtaiḥ pumbhiḥ strībhiśca hariṇākṣibhiḥ |
kimidaṃ kasya vā sthānaṃ kathaṃ tadidamityabhūt || 23 ||
[Analyze grammar]

evaṃ mīmāṃsamānaṃ taṃ narā nāryo'maraprabhāḥ |
pratyagṛhṇan mahābhāgaṃ gītavādyena bhūyasā || 24 ||
[Analyze grammar]

patimāgatamākarṇya pat‍nyuddharṣātisambhramā |
niścakrāma gṛhāttūrṇaṃ rūpiṇī śrīrivālayāt || 25 ||
[Analyze grammar]

pativratā patiṃ dṛṣṭvā premotkaṇṭhāśrulocanā |
mīlitākṣyanamad buddhyā manasā pariṣasvaje || 26 ||
[Analyze grammar]

pat‍nīṃ vīkṣya visphurantīṃ devīṃ vaimānikīmiva |
dāsīnāṃ niṣkakaṇṭhīnāṃ madhye bhāntīṃ sa vismitaḥ || 27 ||
[Analyze grammar]

prītaḥ svayaṃ tayā yuktaḥ praviṣṭo nijamandiram |
maṇistambhaśatopetaṃ mahendrabhavanaṃ yathā || 28 ||
[Analyze grammar]

payaḥphenanibhāḥ śayyā dāntā rukmaparicchadāḥ |
paryaṅkā hemadaṇḍāni cāmaravyajanāni ca || 29 ||
[Analyze grammar]

āsanāni ca haimāni mṛdūpastaraṇāni ca |
muktādāmavilambīni vitānāni dyumanti ca || 30 ||
[Analyze grammar]

svacchasphaṭikakuḍyeṣu mahāmārakateṣu ca |
rat‍nadīpā bhrājamānān lalanā rat‍nasaṃyutāḥ || 31 ||
[Analyze grammar]

vilokya brāhmaṇastatra samṛddhīḥ sarvasampadām |
tarkayāmāsa nirvyagraḥ svasamṛddhimahaitukīm || 32 ||
[Analyze grammar]

nūnaṃ bataitanmama durbhagasya |
śaśvad daridrasya samṛddhihetuḥ |
mahāvibhūteravalokato'nyo |
naivopapadyeta yadūttamasya || 33 ||
[Analyze grammar]

nanvabruvāṇo diśate samakṣaṃ |
yāciṣṇave bhūryapi bhūribhojaḥ |
parjanyavattat svayamīkṣamāṇo |
dāśārhakāṇāmṛṣabhaḥ sakhā me || 34 ||
[Analyze grammar]

kiñcitkarotyurvapi yat svadattaṃ |
suhṛtkṛtaṃ phalgvapi bhūrikārī |
mayopaṇītaṃ pṛthukaikamuṣṭiṃ |
pratyagrahīt prītiyuto mahātmā || 35 ||
[Analyze grammar]

tasyaiva me sauhṛdasakhyamaitrī |
dāsyaṃ punarjanmani janmani syāt |
mahānubhāvena guṇālayena |
viṣajjataḥ tatpuruṣaprasaṅgaḥ || 36 ||
[Analyze grammar]

bhaktāya citrā bhagavān hi sampado |
rājyaṃ vibhūtīrna samarthayatyajaḥ |
adīrghabodhāya vicakṣaṇaḥ svayaṃ |
paśyan nipātaṃ dhanināṃ madodbhavam || 37 ||
[Analyze grammar]

itthaṃ vyavasito buddhyā bhakto'tīva janārdane |
viṣayānjāyayā tyakṣyan bubhuje nātilampaṭaḥ || 38 ||
[Analyze grammar]

tasya vai devadevasya hareryajñapateḥ prabhoḥ |
brāhmaṇāḥ prabhavo daivaṃ na tebhyo vidyate param || 39 ||
[Analyze grammar]

evaṃ sa vipro bhagavatsuhṛttadā |
dṛṣṭvā svabhṛtyairajitaṃ parājitam |
taddhyānavegodgrathitātmabandhanaḥ |
taddhāma lebhe'cirataḥ satāṃ gatim || 40 ||
[Analyze grammar]

etad brahmaṇyadevasya śrutvā brahmaṇyatāṃ naraḥ |
labdhabhāvo bhagavati karmabandhād vimucyate || 41 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
pṛthukopākhyānaṃ nāma ekaśītitamo'dhyāyaḥ || 81 ||
[Analyze grammar]