Chapter 68

[English text for this chapter is available]

sāṃbavivāhaḥ balarāmeṇa hastināpurakarṣaṇaṃ ca |
śrīśuka uvāca |
duryodhanasutāṃ rājan lakṣmaṇāṃ samitiṃjayaḥ |
svayaṃvarasthāmaharat sāṃbo jāmbavatīsutaḥ || 1 ||
[Analyze grammar]

kauravāḥ kupitā ūcuḥ durvinīto'yamarbhakaḥ |
kadarthīkṛtya naḥ kanyāṃ akāmāṃ aharad balāt || 2 ||
[Analyze grammar]

badhnītemaṃ durvinītaṃ kiṃ kariṣyanti vṛṣṇayaḥ |
ye'smat prasādopacitāṃ dattāṃ no bhuñjate mahīm || 3 ||
[Analyze grammar]

nigṛhītaṃ sutaṃ śrutvā yadyeṣyantīha vṛṣṇayaḥ |
bhagnadarpāḥ śamaṃ yānti prāṇā iva susaṃyatāḥ || 4 ||
[Analyze grammar]

iti karṇaḥ śalo bhūriḥ yajñaketuḥ suyodhanaḥ |
sāmbamārebhire baddhuṃ kuruvṛddhānumoditāḥ || 5 ||
[Analyze grammar]

dṛṣṭvānudhāvataḥ sāmbo dhārtarāṣṭrān mahārathaḥ |
pragṛhya ruciraṃ cāpaṃ tasthau siṃha ivaikalaḥ || 6 ||
[Analyze grammar]

taṃ te jighṛkṣavaḥ kruddhāḥ tiṣṭha tiṣṭheti bhāṣiṇaḥ |
āsādya dhanvino bāṇaiḥ karṇāgraṇyaḥ samākiran || 7 ||
[Analyze grammar]

so'paviddhaḥ kuruśreṣṭha kurubhiryadunandanaḥ |
nāmṛṣyat tadacintyārbhaḥ siṃha kṣudramṛgairiva || 8 ||
[Analyze grammar]

visphūrjya ruciraṃ cāpaṃ sarvān vivyādha sāyakaiḥ |
karṇādīn ṣaḍrathān vīraḥ tāvadbhiryugapat pṛthak || 9 ||
[Analyze grammar]

caturbhiścaturo vāhān ekaikena ca sārathīn |
rathinaśca maheṣvāsān tasya tatte'bhyapūjayan || 10 ||
[Analyze grammar]

taṃ tu te virathaṃ cakruḥ catvāraścaturo hayān |
ekastu sārathiṃ jaghne cicchedānyaḥ śarāsanam || 11 ||
[Analyze grammar]

taṃ baddhvā virathīkṛtya kṛcchreṇa kuravo yudhi |
kumāraṃ svasya kanyāṃ ca svapuraṃ jayino'viśan || 12 ||
[Analyze grammar]

tacchrutvā nāradoktena rājan sañjātamanyavaḥ |
kurūn pratyudyamaṃ cakruḥ ugrasenapracoditāḥ || 13 ||
[Analyze grammar]

sāntvayitvā tu tān rāmaḥ sannaddhān vṛṣṇipuṅgavān |
naicchay kurūṇāṃ vṛṣṇīnāṃ kaliṃ kalimalāpahaḥ || 14 ||
[Analyze grammar]

jagāma hāstinapuraṃ rathenādityavarcasā |
brāhmaṇaiḥ kulavṛddhaiśca vṛtaścandra iva grahaiḥ || 15 ||
[Analyze grammar]

gatvā gajāhvayaṃ rāmo bāhyopavanamāsthitaḥ |
uddhavaṃ preṣayāmāsa dhṛtarāṣṭraṃ bubhutsayā || 16 ||
[Analyze grammar]

so'bhivandyāmbikāputraṃ bhīṣmaṃ droṇaṃ ca bāhlikam |
duryodhanaṃ ca vidhivad rāmamāgatamabravīt || 17 ||
[Analyze grammar]

te'tiprītāstamākarṇya prāptaṃ rāmaṃ suhṛttamam |
tamarcayitvābhiyayuḥ sarve maṅgalapāṇayaḥ || 18 ||
[Analyze grammar]

taṃ saṅgamya yathānyāyaṃ gāmarghyaṃ ca nyavedayan |
teṣāṃ ye tatprabhāvajñāḥ praṇemuḥ śirasā balam || 19 ||
[Analyze grammar]

bandhūn kuśalinaḥ śrutvā pṛṣṭvā śivamanāmayam |
parasparamatho rāmo babhāṣe'viklavaṃ vacaḥ || 20 ||
[Analyze grammar]

ugrasenaḥ kṣitīśeśo yad va ājñāpayat prabhuḥ |
tad avyagradhiyaḥ śrutvā kurudhvaṃ māvilambitam || 21 ||
[Analyze grammar]

yad yūyaṃ bahavastvekaṃ jitvādharmeṇa dhārmikam |
abadhnītātha tanmṛṣye bandhūnāmaikyakāmyayā || 22 ||
[Analyze grammar]

vīryaśauryabalonnaddhaṃ ātmaśaktisamaṃ vacaḥ |
kuravo baladevasya niśamyocuḥ prakopitāḥ || 23 ||
[Analyze grammar]

aho mahaccitramidaṃ kālagatyā duratyayā |
ārurukṣatyupānad vai śiro mukuṭasevitam || 24 ||
[Analyze grammar]

ete yaunena saṃbaddhāḥ sahaśayyāsanāśanāḥ |
vṛṣṇayastulyatāṃ nītā asmad dattanṛpāsanāḥ || 25 ||
[Analyze grammar]

cāmaravyajane śaṅkhaṃ ātapatraṃ ca pāṇḍuram |
kirīṭamāsanaṃ śayyāṃ bhuñjantyasmadupekṣayā || 26 ||
[Analyze grammar]

alaṃ yadūnāṃ naradevalāñchanaiḥ |
dātuḥ pratīpaiḥ phaṇināmivāmṛtam |
ye'smatprasādopacitā hi yādavā |
ājñāpayantyadya gatatrapā bata || 27 ||
[Analyze grammar]

kathamindro'pi kurubhiḥ bhīṣmadroṇārjunādibhiḥ |
adattamavarundhīta siṃhagrastamivoraṇaḥ || 28 ||
[Analyze grammar]

śrībādarāyaṇiruvāca |
janmabandhuśrīyonnaddha madāste bharatarṣabha |
āśrāvya rāmaṃ durvācyaṃ asabhyāḥ puramāviśan || 29 ||
[Analyze grammar]

dṛṣṭvā kurūnāṃ dauḥśīlyaṃ śrutvāvācyāni cācyutaḥ |
avocat kopasaṃrabdho duṣprekṣyaḥ prahasan muhuḥ || 30 ||
[Analyze grammar]

nūnaṃ nānāmadonnaddhāḥ śāntiṃ necchantyasādhavaḥ |
teṣāṃ hi praśamo daṇḍaḥ paśūnāṃ laguḍo yathā || 31 ||
[Analyze grammar]

aho yadūn susaṃrabdhām kṛṣṇaṃ ca kupitaṃ śanaiḥ |
sāntvayitvāhameteṣāṃ śamamicchan ihāgataḥ || 32 ||
[Analyze grammar]

ta ime mandamatayaḥ kalahābhiratāḥ khalāḥ |
taṃ māmavajñāya muhuḥ durbhāṣān mānino'bruvan || 33 ||
[Analyze grammar]

nograsenaḥ kila vibhuḥ bhojavṛṣṇyandhakeśvaraḥ |
śakrādayo lokapālā yasyādeśānuvartinaḥ || 34 ||
[Analyze grammar]

sudharmā'kramyate yena pārijāto'marāṅghripaḥ |
ānīya bhujyate so'sau na kilādhyāsanārhaṇaḥ || 35 ||
[Analyze grammar]

yasya pādayugaṃ sākṣāt śrīrupāste'khileśvarī |
sa nārhati kila śrīśo naradevaparicchadān || 36 ||
[Analyze grammar]

yasyāṅghripaṅkajarajo'khilalokapālaiḥ |
maulyuttamairdhṛtamupāsitatīrthatīrtham |
brahmā bhavo'hamapi yasya kalāḥ kalāyāḥ |
śrīścodvahema ciramasya nṛpāsanaṃ kva || 37 ||
[Analyze grammar]

bhuñjate kurubhirdattaṃ bhūkhaṇḍaṃ vṛṣṇayaḥ kila |
upānahaḥ kila vayaṃ svayaṃ tu kuravaḥ śiraḥ || 38 ||
[Analyze grammar]

aho aiśvaryamattānāṃ mattānāmiva māninām |
asaṃbaddhā giro rukṣāḥ kaḥ sahetānuśāsītā || 39 ||
[Analyze grammar]

adya niṣkauravaṃ pṛthvīṃ kariṣyāmītyamarṣitaḥ |
gṛhītvā halamuttasthau dahanniva jagattrayam || 40 ||
[Analyze grammar]

lāṅgalāgreṇa nagaraṃ udvidārya gajāhvayam |
vicakarṣa sa gaṅgāyāṃ prahariṣyannamarṣitaḥ || 41 ||
[Analyze grammar]

jalayānamivāghūrṇaṃ gaṅgāyāṃ nagaraṃ patat |
ākṛṣyamāṇamālokya kauravāḥ jātasaṃbhramāḥ || 42 ||
[Analyze grammar]

tameva śaraṇaṃ jagmuḥ sakuṭumbā jijīviṣavaḥ |
salakṣmaṇaṃ puraskṛtya sāmbaṃ prāñjalayaḥ prabhum || 43 ||
[Analyze grammar]

rāma rāmākhilādhāra prabhāvaṃ na vidāma te |
mūḍhānāṃ naḥ kubuddhīnāṃ kṣantumarhasyatikramam || 44 ||
[Analyze grammar]

sthityutpattyapyayānāṃ tvameko heturnirāśrayaḥ |
lokān krīḍanakānīśa krīḍataste vadanti hi || 45 ||
[Analyze grammar]

tvameva mūrdhnīdamananta līlayā |
bhūmaṇḍalaṃ bibharṣi sahasramūrdhan |
ante ca yaḥ svātmani ruddhaviśvaḥ |
śeṣe'dvitīyaḥ pariśiṣyamāṇaḥ || 46 ||
[Analyze grammar]

kopaste'khilaśikṣārthaṃ na dveṣānna ca matsarāt |
bibhrato bhagavan sattvaṃ sthitipālanatatparaḥ || 47 ||
[Analyze grammar]

namaste sarvabhūtātman sarvaśaktidharāvyaya |
viśvakarman namaste'stu tvāṃ vayaṃ śaraṇaṃ gatāḥ || 48 ||
[Analyze grammar]

śrīśuka uvāca |
evaṃ prapannaiḥ saṃvignaiḥ vepamānāyanairbalaḥ |
prasāditaḥ suprasanno mā bhaiṣṭetyabhayaṃ dadau || 49 ||
[Analyze grammar]

duryodhanaḥ pāribarhaṃ kuñjarān ṣaṣṭihāyanān |
dadau ca dvādaśaśatāni ayutāni turaṅgamān || 50 ||
[Analyze grammar]

rathānāṃ ṣaṭsahasrāṇi raukmāṇāṃ sūryavarcasām |
dāsīnāṃ niṣkakaṇṭhīnāṃ sahasraṃ duhitṛvatsalaḥ || 51 ||
[Analyze grammar]

pratigṛhya tu tatsarvaṃ bhagavān sātvatarṣabhaḥ |
sasutaḥ sasnuṣaḥ prāyāt suhṛdbhirabhinanditaḥ || 52 ||
[Analyze grammar]

tataḥ praviṣṭaḥ svapuraṃ halāyudhaḥ |
sametya bandhūnanuraktacetasaḥ |
śaśaṃsa sarvaṃ yadupuṅgavānāṃ |
madhye sabhāyāṃ kuruṣu svaceṣṭitam || 53 ||
[Analyze grammar]

adyāpi ca puraṃ hyetat sūcayad rāmavikramam |
samunnataṃ dakṣiṇato gaṅgāyāṃ anudṛśyate || 54 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
hastinapurakarṣaṇarūpasaṃkarṣaṇavijayo nāma aṣṭaṣaṣṭitamo'dhyāyaḥ || 68 ||
[Analyze grammar]