Chapter 45

[English text for this chapter is available]

vasudevadevakī sāntvanam ugrasenasya rājyābhiṣekaḥ rāmakṛṣṇayorupanayanaṃ vidyādhyayanaṃ gururmṛtaputrasyānayanaṃ ca |
atha pañcacatvāriṃśo'dhyāyaḥ |
śrīśuka uvāca |
pitarāvupalabdhārthau viditvā puruṣottamaḥ |
mā bhūditi nijāṃ māyāṃ tatāna janamohinīm || 1 ||
[Analyze grammar]

uvāca pitarāvetya sāgrajaḥ sātvarṣabhaḥ |
praśrayāvanataḥ prīṇannamba tāteti sādaram || 2 ||
[Analyze grammar]

nāsmatto yuvayostāta nityotkaṇṭhitayorapi |
bālyapaugaṇḍakaiśorāḥ putrābhyāmabhavankvacit || 3 ||
[Analyze grammar]

na labdho daivahatayorvāso nau bhavadantike |
yāṃ bālāḥ pitṛgehasthā vindante lālitā mudam || 4 ||
[Analyze grammar]

sarvārthasambhavo deho janitaḥ poṣito yataḥ |
na tayoryāti nirveśaṃ pitrormartyaḥ śatāyuṣā || 5 ||
[Analyze grammar]

yastayorātmajaḥ kalpa ātmanā ca dhanena ca |
vṛttiṃ na dadyāttaṃ pretya svamāṃsaṃ khādayanti hi || 6 ||
[Analyze grammar]

mātaraṃ pitaraṃ vṛddhaṃ bhāryāṃ sādhvīṃ sutaṃ śiśum |
guruṃ vipraṃ prapannaṃ ca kalpo'bibhracchvasanmṛtaḥ || 7 ||
[Analyze grammar]

tannāvakalpayoḥ kaṃsānnityamudvignacetasoḥ |
moghamete vyatikrāntā divasā vāmanarcatoḥ || 8 ||
[Analyze grammar]

tatkṣantumarhathastāta mātarnau paratantrayoḥ |
akurvatorvāṃ śuśrūṣāṃ kliṣṭayordurhṛdā bhṛśam || 9 ||
[Analyze grammar]

śrīśuka uvāca |
iti māyāmanuṣyasya harerviśvātmano girā |
mohitāvaṅkamāropya pariṣvajyāpaturmudam || 10 ||
[Analyze grammar]

siñcantāvaśrudhārābhiḥ snehapāśena cāvṛtau |
na kiñcidūcatū rājanbāṣpakaṇṭhau vimohitau || 11 ||
[Analyze grammar]

evamāśvāsya pitarau bhagavāndevakīsutaḥ |
mātāmahaṃ tūgrasenaṃ yadūnāmakaronnṛpam || 12 ||
[Analyze grammar]

āha cāsmānmahārāja prajāścājñaptumarhasi |
yayātiśāpādyadubhirnāsitavyaṃ nṛpāsane || 13 ||
[Analyze grammar]

mayi bhṛtya upāsīne bhavato vibudhādayaḥ |
baliṃ harantyavanatāḥ kimutānye narādhipāḥ || 14 ||
[Analyze grammar]

sarvānsvānjñātisambandhāndigbhyaḥ kaṃsabhayākulān |
yaduvṛṣṇyandhakamadhu dāśārhakukurādikān || 15 ||
[Analyze grammar]

sabhājitānsamāśvāsya videśāvāsakarśitān |
nyavāsayatsvageheṣu vittaiḥ santarpya viśvakṛt || 16 ||
[Analyze grammar]

kṛṣṇasaṅkarṣaṇabhujairguptā labdhamanorathāḥ |
gṛheṣu remire siddhāḥ kṛṣṇarāmagatajvarāḥ || 17 ||
[Analyze grammar]

vīkṣanto'harahaḥ prītā mukundavadanāmbujam |
nityaṃ pramuditaṃ śrīmatsadayasmitavīkṣaṇam || 18 ||
[Analyze grammar]

tatra pravayaso'pyāsanyuvāno'tibalaujasaḥ |
pibanto'kṣairmukundasya mukhāmbujasudhāṃ muhuḥ || 19 ||
[Analyze grammar]

atha nandaṃ samasādya bhagavāndevakīsutaḥ |
saṅkarṣaṇaśca rājendra pariṣvajyedamūcatuḥ || 20 ||
[Analyze grammar]

pitaryuvābhyāṃ snigdhābhyāṃ poṣitau lālitau bhṛśam |
pitrorabhyadhikā prītirātmajeṣvātmano'pi hi || 21 ||
[Analyze grammar]

sa pitā sā ca jananī yau puṣṇītāṃ svaputravat |
śiśūnbandhubhirutsṛṣṭānakalpaiḥ poṣarakṣaṇe || 22 ||
[Analyze grammar]

yāta yūyaṃ vrajaṃ tāta vayaṃ ca snehaduḥkhitān |
jñātīnvo draṣṭumeṣyāmo vidhāya suhṛdāṃ sukham || 23 ||
[Analyze grammar]

evaṃ sāntvayya bhagavānnandaṃ savrajamacyutaḥ |
vāso'laṅkārakupyādyairarhayāmāsa sādaram || 24 ||
[Analyze grammar]

ityuktastau pariṣvajya nandaḥ praṇayavihvalaḥ |
pūrayannaśrubhirnetre saha gopairvrajaṃ yayau || 25 ||
[Analyze grammar]

atha śūrasuto rājanputrayoḥ samakārayat |
purodhasā brāhmaṇaiśca yathāvaddvijasaṃskṛtim || 26 ||
[Analyze grammar]

tebhyo'dāddakṣiṇā gāvo rukmamālāḥ svalaṅkṛtāḥ |
svalaṅkṛtebhyaḥ sampūjya savatsāḥ kṣaumamālinīḥ || 27 ||
[Analyze grammar]

yāḥ kṛṣṇarāmajanmarkṣe manodattā mahāmatiḥ |
tāścādadādanusmṛtya kaṃsenādharmato hṛtāḥ || 28 ||
[Analyze grammar]

tataśca labdhasaṃskārau dvijatvaṃ prāpya suvratau |
gargādyadukulācāryādgāyatraṃ vratamāsthitau || 29 ||
[Analyze grammar]

prabhavau sarvavidyānāṃ sarvajñau jagadīśvarau |
nānyasiddhāmalaṃ jñānaṃ gūhamānau narehitaiḥ || 30 ||
[Analyze grammar]

atho gurukule vāsamicchantāvupajagmatuḥ |
kāśyaṃ sāndīpaniṃ nāma hyavantipuravāsinam || 31 ||
[Analyze grammar]

yathopasādya tau dāntau gurau vṛttimaninditām |
grāhayantāvupetau sma bhaktyā devamivādṛtau || 32 ||
[Analyze grammar]

tayordvijavarastuṣṭaḥ śuddhabhāvānuvṛttibhiḥ |
provāca vedānakhilān sāṅgopaniṣado guruḥ || 33 ||
[Analyze grammar]

sarahasyaṃ dhanurvedaṃ dharmānnyāyapathāṃstathā |
tathā cānvīkṣikīṃ vidyāṃ rājanītiṃ ca ṣaḍvidhām || 34 ||
[Analyze grammar]

sarvaṃ naravaraśreṣṭhau sarvavidyāpravartakau |
sakṛnnigadamātreṇa tau sañjagṛhaturnṛpa || 35 ||
[Analyze grammar]

ahorātraiścatuḥṣaṣṭyā saṃyattau tāvatīḥ kalāḥ* |
gurudakṣiṇayācāryaṃ chandayāmāsaturnṛpa || 36 ||
[Analyze grammar]

dvijastayostaṃ mahimānamadbhutaṃ |
saṃlakṣya rājannatimānuṣīṃ matim |
sammantrya patnyā sa mahārṇave mṛtaṃ |
bālaṃ prabhāse varayāṃ babhūva ha || 37 ||
[Analyze grammar]

tathetyathāruhya mahārathau rathaṃ |
prabhāsamāsādya durantavikramau |
velāmupavrajya niṣīdatuḥ kṣaṇaṃ |
sindhurviditvārhaṇamāharattayoḥ || 38 ||
[Analyze grammar]

tamāha bhagavānāśu guruputraḥ pradīyatām |
yo'sāviha tvayā grasto bālako mahatormiṇā || 39 ||
[Analyze grammar]

śrīsamudra uvāca |
na cāhārṣamahaṃ deva daityaḥ pañcajano mahān |
antarjalacaraḥ kṛṣṇa śaṅkharūpadharo'suraḥ || 40 ||
[Analyze grammar]

āste tenāhṛto nūnaṃ tacchrutvā satvaraṃ prabhuḥ |
jalamāviśya taṃ hatvā nāpaśyadudare'rbhakam || 41 ||
[Analyze grammar]

tadaṅgaprabhavaṃ śaṅkhamādāya rathamāgamat |
tataḥ saṃyamanīṃ nāma yamasya dayitāṃ purīm || 42 ||
[Analyze grammar]

gatvā janārdanaḥ śaṅkhaṃ pradadhmau sahalāyudhaḥ |
śaṅkhanirhrādamākarṇya prajāsaṃyamano yamaḥ || 43 ||
[Analyze grammar]

tayoḥ saparyāṃ mahatīṃ cakre bhaktyupabṛṃhitām |
uvācāvanataḥ kṛṣṇaṃ sarvabhūtāśayālayam |
līlāmanuṣyayorviṣṇo yuvayoḥ karavāma kim || 44 ||
[Analyze grammar]

śrībhagavānuvāca |
guruputramihānītaṃ nijakarmanibandhanam |
ānayasva mahārāja macchāsanapuraskṛtaḥ || 45 ||
[Analyze grammar]

tatheti tenopānītaṃ guruputraṃ yadūttamau |
dattvā svagurave bhūyo vṛṇīṣveti tamūcatuḥ || 46 ||
[Analyze grammar]

śrīgururuvāca |
samyaksampādito vatsa bhavadbhyāṃ guruniṣkrayaḥ |
ko nu yuṣmadvidhaguroḥ kāmānāmavaśiṣyate || 47 ||
[Analyze grammar]

gacchataṃ svagṛhaṃ vīrau kīrtirvāmastu pāvanī |
chandāṃsyayātayāmāni bhavantviha paratra ca || 48 ||
[Analyze grammar]

guruṇaivamanujñātau rathenānilaraṃhasā |
āyātau svapuraṃ tāta parjanyaninadena vai || 49 ||
[Analyze grammar]

samanandanprajāḥ sarvā dṛṣṭvā rāmajanārdanau |
apaśyantyo bahvahāni naṣṭalabdhadhanā iva || 50 ||
[Analyze grammar]