Chapter 30

[English text for this chapter is available]

kapila uvāca |
tasyaitasya jano nūnaṃ nāyaṃ vedoruvikramam |
kālyamāno'pi balino vāyoriva ghanāvaliḥ || 1 ||
[Analyze grammar]

yaṃ yaṃ arthamupādatte duḥkhena sukhahetave |
taṃ taṃ dhunoti bhagavān pumānchocati yatkṛte || 2 ||
[Analyze grammar]

yadadhruvasya dehasya sānubandhasya durmatiḥ |
dhruvāṇi manyate mohād gṛhakṣetravasūni ca || 3 ||
[Analyze grammar]

janturvai bhava etasmin yāṃ yāṃ yonimanuvrajet |
tasyāṃ tasyāṃ sa labhate nirvṛtiṃ na virajyate || 4 ||
[Analyze grammar]

narakastho'pi dehaṃ vai na pumān tyaktumicchati |
nārakyāṃ nirvṛtau satyāṃ devamāyāvimohitaḥ || 5 ||
[Analyze grammar]

ātmajāyāsutāgāra paśudraviṇa bandhuṣu |
nirūḍhamūlahṛdaya ātmānaṃ bahu manyate || 6 ||
[Analyze grammar]

sandahyamānasarvāṅga eṣāṃ udvahanādhinā |
karoti avirataṃ mūḍho duritāni durāśayaḥ || 7 ||
[Analyze grammar]

ākṣiptātmendriyaḥ strīṇāṃ asatīnāṃ ca māyayā |
raho racitayālāpaiḥ śiśūnāṃ kalabhāṣiṇām || 8 ||
[Analyze grammar]

gṛheṣu kūṭadharmeṣu duḥkhatantreṣvatandritaḥ |
kurvan dukhapratīkāraṃ sukhavanmanyate gṛhī || 9 ||
[Analyze grammar]

arthairāpāditairgurvyā hiṃsayetaḥ tataśca tān |
puṣṇāti yeṣāṃ poṣeṇa śeṣabhugyātyadhaḥ svayam || 10 ||
[Analyze grammar]

vārtāyāṃ lupyamānāyāṃ ārabdhāyāṃ punaḥ punaḥ |
lobhābhibhūto niḥsattvaḥ parārthe kurute spṛhām || 11 ||
[Analyze grammar]

kuṭumbabharaṇākalpo mandabhāgyo vṛthodyamaḥ |
śriyā vihīnaḥ kṛpaṇo dhyāyan śvasiti mūḍhadhīḥ || 12 ||
[Analyze grammar]

evaṃ svabharaṇākalpaṃ tatkalatrādayastathā |
nādriyante yathā pūrvaṃ kīnāśā iva gojaram || 13 ||
[Analyze grammar]

tatrāpyajātanirvedo bhriyamāṇaḥ svayambhṛtaiḥ |
jarayopāttavairūpyo maraṇābhimukho gṛhe || 14 ||
[Analyze grammar]

āste'vamatyopanyastaṃ gṛhapāla ivāharan |
āmayāvyapradīptāgniḥ alpāhāro'lpaceṣṭitaḥ || 15 ||
[Analyze grammar]

vāyunotkramatottāraḥ kaphasaṃruddhanāḍikaḥ |
kāsaśvāsakṛtāyāsaḥ kaṇṭhe ghuraghurāyate || 16 ||
[Analyze grammar]

śayānaḥ pariśocadbhiḥ parivītaḥ svabandhubhiḥ |
vācyamāno'pi na brūte kālapāśavaśaṃ gataḥ || 17 ||
[Analyze grammar]

evaṃ kuṭumbabharaṇe vyāpṛtātmājitendriyaḥ |
mriyate rudatāṃ svānāṃ uruvedanayāstadhīḥ || 18 ||
[Analyze grammar]

yamadūtau tadā prāptau bhīmau sarabhasekṣaṇau |
sa dṛṣṭvā trastahṛdayaḥ śakṛn mūtraṃ vimuñcati || 19 ||
[Analyze grammar]

yātanādeha āvṛtya pāśairbaddhvā gale balāt |
nayato dīrghamadhvānaṃ daṇḍyaṃ rājabhaṭā yathā || 20 ||
[Analyze grammar]

tayornirbhinnahṛdayaḥ tarjanairjātavepathuḥ |
pathi śvabhirbhakṣyamāṇa ārto'ghaṃ svamanusmaran || 21 ||
[Analyze grammar]

kṣuttṛṭparīto'rkadavānalānilaiḥ |
santapyamānaḥ pathi taptavāluke |
kṛcchreṇa pṛṣṭhe kaśayā ca tāḍitaḥ |
calatyaśakto'pi nirāśramodake || 22 ||
[Analyze grammar]

tatra tatra patanchrānto mūrcchitaḥ punarutthitaḥ |
pathā pāpīyasā nītastarasā yamasādanam || 23 ||
[Analyze grammar]

yojanānāṃ sahasrāṇi navatiṃ nava cādhvanaḥ |
tribhirmuhūrtairdvābhyāṃ vā nītaḥ prāpnoti yātanāḥ || 24 ||
[Analyze grammar]

ādīpanaṃ svagātrāṇāṃ veṣṭayitvolmukādibhiḥ |
ātmamāṃsādanaṃ kvāpi svakṛttaṃ parato'pi vā || 25 ||
[Analyze grammar]

jīvataścāntrābhyuddhāraḥ śvagṛdhrairyamasādane |
sarpavṛścika daṃśādyaiḥ daśadbhiścātmavaiśasam || 26 ||
[Analyze grammar]

kṛntanaṃ cāvayavaśo gajādibhyo bhidāpanam |
pātanaṃ giriśṛṅgebhyo rodhanaṃ cāmbugartayoḥ || 27 ||
[Analyze grammar]

yāstāmisrāndhatāmisrā rauravādyāśca yātanāḥ |
bhuṅkte naro vā nārī vā mithaḥ saṅgena nirmitāḥ || 28 ||
[Analyze grammar]

atraiva narakaḥ svarga iti mātaḥ pracakṣate |
yā yātanā vai nārakyaḥ tā ihāpyupalakṣitāḥ || 29 ||
[Analyze grammar]

evaṃ kuṭumbaṃ bibhrāṇa udarambhara eva vā |
visṛjyehobhayaṃ pretya bhuṅkte tatphalamīdṛśam || 30 ||
[Analyze grammar]

ekaḥ prapadyate dhvāntaṃ hitvedaṃ svakalevaram |
kuśaletarapātheyo bhūtadroheṇa yad bhṛtam || 31 ||
[Analyze grammar]

daivenāsāditaṃ tasya śamalaṃ niraye pumān |
bhuṅkte kuṭumbapoṣasya hṛtavitta ivāturaḥ || 32 ||
[Analyze grammar]

kevalena hi adharmeṇa kuṭumbabharaṇotsukaḥ |
yāti jīvo'ndhatāmisraṃ caramaṃ tamasaḥ padam || 33 ||
[Analyze grammar]

adhastāt naralokasya yāvatīryātanādayaḥ |
kramaśaḥ samanukramya punaratrāvrajecchuciḥ || 34 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe triṃśo'dhyāyaḥ || 30 ||
[Analyze grammar]