Chapter 10

[English text for this chapter is available]

vidura uvāca |
antarhite bhagavati brahmā lokapitāmahaḥ |
prajāḥ sasarja katidhā daihikīrmānasīrvibhuḥ || 1 ||
[Analyze grammar]

ye ca me bhagavanpṛṣṭāḥ tvayyarthā bahuvittama |
tānvadasvānupūrvyeṇa chindhi naḥ sarvasaṃśayān || 2 ||
[Analyze grammar]

sūta uvāca |
evaṃ sañcoditastena kṣattrā kauṣāravo muniḥ |
prītaḥ pratyāha tān praśnān hṛdisthānatha bhārgava || 3 ||
[Analyze grammar]

maitreya uvāca |
viriñco'pi tathā cakre divyaṃ varṣaśataṃ tapaḥ |
ātmani ātmānamāveśya yathāha bhagavān ajaḥ || 4 ||
[Analyze grammar]

tad vilokyābjasaṃbhūto vāyunā yadadhiṣṭhitaḥ |
padmaṃ ambhaśca tatkāla kṛtavīryeṇa kampitam || 5 ||
[Analyze grammar]

tapasā hi edhamānena vidyayā cātmasaṃsthayā |
vivṛddhavijñānabalo nyapād vāyuṃ sahāmbhasā || 6 ||
[Analyze grammar]

tadvilokya viyadvyāpi puṣkaraṃ yadadhiṣṭhitam |
anena lokānprāglīnān kalpitāsmītyacintayat || 7 ||
[Analyze grammar]

padmakośaṃ tadāviśya bhagavatkarmacoditaḥ |
ekaṃ vyabhāṅkṣīdurudhā tridhā bhāvyaṃ dvisaptadhā || 8 ||
[Analyze grammar]

etāvān jīvalokasya saṃsthābhedaḥ samāhṛtaḥ |
dharmasya hyanimittasya vipākaḥ parameṣṭhyasau || 9 ||
[Analyze grammar]

vidura uvāca |
yathāttha bahurūpasya harerad‍bhutakarmaṇaḥ |
kālākhyaṃ lakṣaṇaṃ brahman yathā varṇaya naḥ prabho || 10 ||
[Analyze grammar]

maitreya uvāca |
guṇavyatikarākāro nirviśeṣo'pratiṣṭhitaḥ |
puruṣaḥ tadupādānaṃ ātmānaṃ līlayāsṛjat || 11 ||
[Analyze grammar]

viśvaṃ vai brahmatanmātraṃ saṃsthitaṃ viṣṇumāyayā |
īśvareṇa paricchinnaṃ kālenāvyaktamūrtinā || 12 ||
[Analyze grammar]

yathedānīṃ tathāgre ca paścādapyetadīdṛśam |
sargo navavidhastasya prākṛto vaikṛtastu yaḥ || 13 ||
[Analyze grammar]

kāladravyaguṇairasya trividhaḥ pratisaṅkramaḥ |
ādyastu mahataḥ sargo guṇavaiṣamyamātmanaḥ || 14 ||
[Analyze grammar]

dvitīyastvahamo yatra dravyajñānakriyodayaḥ |
bhūtasargastṛtīyastu tanmātro dravyaśaktimān || 15 ||
[Analyze grammar]

caturtha aindriyaḥ sargo yastu jñānakriyātmakaḥ |
vaikāriko devasargaḥ pañcamo yanmayaṃ manaḥ || 16 ||
[Analyze grammar]

ṣaṣṭhastu tamasaḥ sargo yastvabuddhikṛtaḥ prabhoḥ |
ṣaḍime prākṛtāḥ sargā vaikṛtānapi me śrṛṇu || 17 ||
[Analyze grammar]

rajobhājo bhagavato līleyaṃ harimedhasaḥ |
saptamo mukhyasargastu ṣaḍvidhastasthuṣāṃ ca yaḥ || 18 ||
[Analyze grammar]

vanaspatyoṣadhilatā tvaksārā vīrudho drumāḥ |
utsrotasastamaḥprāyā antaḥsparśā viśeṣiṇaḥ || 19 ||
[Analyze grammar]

tiraścāmaṣṭamaḥ sargaḥ so'ṣṭāviṃśadvidho mataḥ |
avido bhūritamaso ghrāṇajñā hṛdyavedinaḥ || 20 ||
[Analyze grammar]

gaurajo mahiṣaḥ kṛṣṇaḥ sūkaro gavayo ruruḥ |
dviśaphāḥ paśavaśceme aviruṣṭraśca sattama || 21 ||
[Analyze grammar]

kharo'śvo'śvataro gauraḥ śarabhaścamarī tathā |
ete caikaśaphāḥ kṣattaḥ śrṛṇu pañcanakhān paśūn || 22 ||
[Analyze grammar]

śvā sṛgālo vṛko vyāghro mārjāraḥ śaśaśallakau |
siṃhaḥ kapirgajaḥ kūrmo godhā ca makarādayaḥ || 23 ||
[Analyze grammar]

kaṅkagṛdhrabakaśyena bhāsabhallūkabarhiṇaḥ |
haṃsasārasacakrāhva kākolūkādayaḥ khagāḥ || 24 ||
[Analyze grammar]

arvāksrotastu navamaḥ kṣattarekavidho nṛṇām |
rajo'dhikāḥ karmaparā duḥkhe ca sukhamāninaḥ || 25 ||
[Analyze grammar]

vaikṛtāstraya evaite devasargaśca sattama |
vaikārikastu yaḥ proktaḥ kaumārastūbhayātmakaḥ || 26 ||
[Analyze grammar]

devasargaścāṣṭavidho vibudhāḥ pitaro'surāḥ |
gandharvāpsarasaḥ siddhā yakṣarakṣāṃsi cāraṇāḥ || 27 ||
[Analyze grammar]

bhūtapretapiśācāśca vidyādhrāḥ kinnarādayaḥ |
daśaite vidurākhyātāḥ sargāste viśvasṛkkṛtāḥ || 28 ||
[Analyze grammar]

ataḥ paraṃ pravakṣyāmi vaṃśān manvantarāṇi ca |
evaṃ rajaḥplutaḥ sraṣṭā kalpādiṣvātmabhūrhariḥ |
sṛjatyamoghasaṅkalpa ātmaivātmānamātmanā || 29 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe daśamo'dhyāyaḥ || 10 ||
[Analyze grammar]