Chapter 2

[English text for this chapter is available]

vyāsa uvāca |
iti saṃpraśnasaṃhṛṣṭo viprāṇāṃ raumaharṣaṇiḥ |
pratipūjya vacasteṣāṃ pravaktuṃ upacakrame || 1 ||
[Analyze grammar]

sūta uvāca |
yaṃ pravrajantamanupetamapetakṛtyaṃ |
dvaipāyano virahakātara ājuhāva |
putreti tanmayatayā taravo'bhineduḥ |
taṃ sarvabhūtahṛdayaṃ munimānato'smi || 2 ||
[Analyze grammar]

yaḥ svānubhāvamakhila śrutisāramekaṃ |
adhyātmadīpaṃ atititīrṣatāṃ tamo'ndham |
saṃsāriṇāṃ karuṇayā'ha purāṇaguhyaṃ |
taṃ vyāsasūnumupayāmi guruṃ munīnām || 3 ||
[Analyze grammar]

nārāyaṇaṃ namaskṛtya naraṃ caiva narottamam |
devīṃ sarasvatīṃ vyāsaṃ tato jayamudīrayet || 4 ||
[Analyze grammar]

munayaḥ sādhu pṛṣṭo'haṃ bhavadbhiḥ lokamaṅgalam |
yatkṛtaḥ kṛṣṇasaṃpraśno yenātmā suprasīdati || 5 ||
[Analyze grammar]

sa vai puṃsāṃ paro dharmo yato bhaktiradhokṣaje |
ahaitukyapratihatā yayātmā saṃprasīdati || 6 ||
[Analyze grammar]

vāsudeve bhagavati bhaktiyogaḥ prayojitaḥ |
janayatyāśu vairāgyaṃ jñānaṃ ca yad ahaitukam || 7 ||
[Analyze grammar]

dharmaḥ svanuṣṭhitaḥ puṃsāṃ viṣvaksenakathāsu yaḥ |
notpādayed yadi ratiṃ śrama eva hi kevalam || 8 ||
[Analyze grammar]

dharmasya hyāpavargyasya nārtho'rthāyopakalpate |
nārthasya dharmaikāntasya kāmo lābhāya hi smṛtaḥ || 9 ||
[Analyze grammar]

kāmasya nendriyaprītiḥ lābho jīveta yāvatā |
jīvasya tattvajijñāsā nārtho yaśceha karmabhiḥ || 10 ||
[Analyze grammar]

vadanti tat tattvavidaḥ tattvaṃ yat jñānamadvayam |
brahmeti paramātmeti bhagavāniti śabdyate || 11 ||
[Analyze grammar]

tat śraddadhānā munayo jñānavairāgyayuktayā |
paśyantyātmani cātmānaṃ bhaktyā śrutagṛhītayā || 12 ||
[Analyze grammar]

ataḥ pumbhiḥ dvijaśreṣṭhā varṇāśramavibhāgaśaḥ |
svanuṣṭhitasya dharmasya saṃsiddhiḥ haritoṣaṇam || 13 ||
[Analyze grammar]

tasmādekena manasā bhagavān sātvatāṃ patiḥ |
śrotavyaḥ kīrtitavyaśca dhyeyaḥ pūjyaśca nityadā || 14 ||
[Analyze grammar]

yad adanudhyāsinā yuktāḥ karmagranthinibandhanam |
chindanti kovidāstasya ko na kuryāt kathāratim || 15 ||
[Analyze grammar]

śuśrūṣoḥ śraddadhānasya vāsudevakathāruciḥ |
syānmahatsevayā viprāḥ puṇyatīrthaniṣevaṇāt || 16 ||
[Analyze grammar]

śrṛṇvatāṃ svakathāṃ kṛṣṇaḥ puṇyaśravaṇakīrtanaḥ |
hṛdyantaḥstho hyabhadrāṇi vidhunoti suhṛtsatām || 17 ||
[Analyze grammar]

naṣṭaprāyeṣvabhadreṣu nityaṃ bhāgavatasevayā |
bhagavati uttamaśloke bhaktirbhavati naiṣṭhikī || 18 ||
[Analyze grammar]

tadā rajastamobhāvāḥ kāmalobhādayaśca ye |
ceta etairanāviddhaṃ sthitaṃ sattve prasīdati || 19 ||
[Analyze grammar]

evaṃ prasannamanaso bhagavad‍bhaktiyogataḥ |
bhagavat tattvavijñānaṃ muktasaṅgasya jāyate || 20 ||
[Analyze grammar]

bhidyate hṛdayagranthiḥ chidyante sarvasaṃśayāḥ |
kṣīyante cāsya karmāṇi dṛṣṭa evātmanīśvare || 21 ||
[Analyze grammar]

ato vai kavayo nityaṃ bhaktiṃ paramayā mudā |
vāsudeve bhagavati kurvantyātmaprasādanīm || 22 ||
[Analyze grammar]

sattvaṃ rajastama iti prakṛterguṇāstaiḥ |
yuktaḥ paraḥ puruṣa eka ihāsya dhatte |
sthityādaye hariviriñcihareti saṃjñāḥ |
śreyāṃsi tatra khalu sattvatanoḥ nṛṇāṃ syuḥ || 23 ||
[Analyze grammar]

pārthivād dāruṇo dhūmaḥ tasmādagnistrayīmayaḥ |
tamasastu rajastasmāt sattvaṃ yad brahmadarśanam || 24 ||
[Analyze grammar]

bhejire munayo'thāgre bhagavantaṃ adhokṣajam |
sattvaṃ viśuddhaṃ kṣemāya kalpante ye'nu tāniha || 25 ||
[Analyze grammar]

mumukṣavo ghorarūpān hitvā bhūtapatīnatha |
nārāyaṇakalāḥ śāntā bhajanti hyanasūyavaḥ || 26 ||
[Analyze grammar]

rajastamaḥprakṛtayaḥ samaśīlā bhajanti vai |
pitṛbhūtaprajeśādīn śriyaiśvaryaprajepsavaḥ || 27 ||
[Analyze grammar]

vāsudevaparā vedā vāsudevaparā makhāḥ |
vāsudevaparā yogā vāsudevaparāḥ kriyāḥ || 28 ||
[Analyze grammar]

vāsudevaparaṃ jñānaṃ vāsudevaparaṃ tapaḥ |
vāsudevaparo dharmo vāsudevaparā gatiḥ || 29 ||
[Analyze grammar]

sa evedaṃ sasarjāgre bhagavān ātmamāyayā |
sad asad rūpayā cāsau guṇamayyāguṇo vibhuḥ || 30 ||
[Analyze grammar]

tayā vilasiteṣveṣu guṇeṣu guṇavāniva |
antaḥpraviṣṭa ābhāti vijñānena vijṛmbhitaḥ || 31 ||
[Analyze grammar]

yathā hyavahito vahniḥ dāruṣvekaḥ svayoniṣu |
nāneva bhāti viśvātmā bhūteṣu ca tathā pumān || 32 ||
[Analyze grammar]

asau guṇamayairbhāvaiḥ bhūta sūkṣmendriyātmabhiḥ |
svanirmiteṣu nirviṣṭo bhuṅkte bhūteṣu tad‍guṇān || 33 ||
[Analyze grammar]

bhāvayatyeṣa sattvena lokānvai lokabhāvanaḥ |
līlāvatārānurato devatiryaṅ narādiṣu || 34 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe naimiṣīyopākhyāne dvitīyo'dhyāyaḥ || 2 ||
[Analyze grammar]