Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 10.24
purodhasāṃ ca mukhyaṃ māṃ viddhi pārtha bṛhaspatim |
senānīnāmahaṃ skandaḥ sarasāmasmi sāgaraḥ ||24||
The Subodhinī commentary by Śrīdhara
purodhasāmiti | purodhasāṃ madhye devapurohitatvānmukhyaṃ bṛhaspatiṃ māṃ viddhi | senānīnāṃ madhye devasenāpatiḥ skando'hamasmi | sarasāṃ sthirajalāśayānāṃ madhye samudro'smi ||24||
The Gūḍhārthadīpikā commentary by Madhusūdana
indrasya sarvarājaśreṣṭhatvāttatpurodhasaṃ bṛhaspatiṃ sarveṣāṃ purodhasāṃ rājapurohitānāṃ madhye mukhyaṃ śreṣṭhaṃ māmeva he pārtha viddhi jānīhi | senānīnāṃ senāpatīnāṃ madhye devasenāpatiḥ skando guho'hamasmi | sarasāṃ devakhātajalāśayānāṃ madhye sāgaraḥ sagaraputraiḥ khāto jalāśayo'hamasmi ||24||
The Sārārthavarṣiṇī commentary by Viśvanātha
senānīnāmityārṣam | skandhaḥ kārtikeyaḥ ||24||
The Gītābhūṣaṇa commentary by Baladeva
indrasya sarvarājamukhyatvāttatpurohitaṃ bṛhaspatiṃ sarvapatiṃ rājapurohitānāṃ mukhyaṃ māṃ viddhīti so'hamityarthaḥ | senānīnāmiti nuḍāgamanastvārṣaḥ | sarvarājasenānāṃ madhye skandaḥ kārttikeyo'ham | sarasāṃ sthirajalānāṃ madhye sāgaro'ham ||24||
__________________________________________________________