![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 4.15
evaṃ jñātvā kṛtaṃ karma pūrvairapi mumukṣubhiḥ |
kuru karmaiva tasmāttvaṃ pūrvaiḥ pūrvataraṃ kṛtam ||15||
The Subodhinī commentary by Śrīdhara
ye yathā māmityādi caturbhiḥ ślokaiḥ prāsaṅgikamīśvarasya vaiṣamyaṃ parihṛtya pūrvoktameva karmayogaṃ prapañcayitumanusmārayati evamiti | ahaṅkārādirāhityena kṛtaṃ karma bandhakaṃ na bhavati | ityevaṃ jñātvā pūrvairjanakādibhirapi mumukṣubhiḥ sattvaśuddhyarthaṃ pūrvataraṃ yugāntareṣvapi kṛtam | tasmāttvamapi prathamaṃ karmaiva kuru ||15||
The Gūḍhārthadīpikā commentary by Madhusūdana
yato nāhaṃ kartā na me karmaphalaspṛheti jñānātkarmabhirna badhyate'ta āha evamiti | evamātmano'kartuḥ karmālepaṃ jñātvā kṛtaṃ karma pūrvairatikrāntairapi asmin yuge yayātiyaduprabhṛtibhirmumukṣubhiḥ | tasmāttvamapi karmaiva kuru na tūṣṇīmāsanaṃ nāpi saṃnyāsam | yadyatattvavittadātmaśuddhyarthaṃ tattvaviccellokasaṅgrahārtham | pūrvairjanakādibhiḥ pūrvataramatipūrvaṃ yugāntare kṛtam | etenāsmin yuge'nyayuge ca pūrvapūrvataraiḥ kṛtatvādavaśyaṃ tvayā kartavyaṃ karmeti darśayati ||15||
The Sārārthavarṣiṇī commentary by Viśvanātha
evambhūtameva māṃ jñātvā pūrvairjanakādibhirapi lokapravartanārthameva karma kṛtam ||15||
The Gītābhūṣaṇa commentary by Baladeva
evamiti | māmeva jñātvā tadanusāribhirmacchiṣyaiḥ pūrvairvivasvadādibhirmumukṣubhirniṣkāmaṃ karma kṛtam | tasmāttvamapi karmaiva tatkuru | na karmasaṃnyāsam | aśuddhacittaścejjñānagarbhāyai cittaśuddhyai śuddhacittaścellokasaṅgrahāyetyarthaḥ | kīdṛśaṃ pūrvaistaiḥ kṛtaṃ ? pūrvataraṃ atiprācīnam ||15||
__________________________________________________________