Chapter 2

janaka uvāca |
aho nirañjanaḥ śānto bodho'haṃ prakṛteḥ paraḥ |
etāvantamahaṃ kālaṃ mohenaiva viḍambitaḥ || 1 ||
[Analyze grammar]

yathā prakāśayāmyeko dehamenaṃ tathā jagat |
ato mama jagatsarvamathavā na ca kiñcana || 2 ||
[Analyze grammar]

saśarīramaho viśvaṃ parityajya mayā'dhunā |
kutaścitkauśalādeva paramātmā vilokyate || 3 ||
[Analyze grammar]

yathā na toyato bhinnāstaraṅgāḥ phenabudbudāḥ |
ātmano na tathā bhinnaṃ viśvamātmavinirgatam || 4 ||
[Analyze grammar]

tantumātro bhavedeva paṭo yadvadvicārataḥ |
ātmatanmātramevedaṃ tadvadviśvaṃ vicāritam || 5 ||
[Analyze grammar]

yathaivekṣurase kḷptā tena vyāptaiva śarkarā |
tathā viśvaṃ mayi kḷptaṃ mayā vyāptaṃ nirantaram || 6 ||
[Analyze grammar]

ātmājñānājjagadbhāti hātmajñānānna bhāsate |
rajjvajñānādahirbhāti tajjñānādbhāsate na hi || 7 ||
[Analyze grammar]

prakāśo me nijaṃ rūpaṃ nātirikto'smyahaṃ tataḥ |
yadā prakāśate viśvaṃ tadā'hambhāsa eva hi || 8 ||
[Analyze grammar]

aho vikalpitaṃ viśvamajñānānmayi bhāsate |
rūpyaṃ śuktau phaṇī rajjau vāri sūryakare yathā || 9 ||
[Analyze grammar]

matto vinirgataṃ viśvaṃ mayyeva layameṣyati |
mṛdi kumbho jale vīciḥ kanake kaṭakaṃ yathā || 10 ||
[Analyze grammar]

aho ahaṃ namo mahyaṃ vināśo yasya nāsti me |
brahmādistambaparyantaṃ jagannāśe'pi tiṣṭhataḥ || 11 ||
[Analyze grammar]

aho ahaṃ namo mahyameko'haṃ dehavānapi |
kvacinna gantā nāgantā vyāpya viśvamavasthitaḥ || 12 ||
[Analyze grammar]

aho ahaṃ namo mahyaṃ dakṣo nāstīha matsamaḥ |
asaṃspṛśya śarīreṇa yena viśvaṃ ciraṃ dhṛtam || 13 ||
[Analyze grammar]

aho ahaṃ namo mahyaṃ yasya me nāsti kiñcana |
athavā yasya me sarvaṃ yadvāṅmanasagocaram || 14 ||
[Analyze grammar]

jñānaṃ jñeyaṃ tathā jñātā tritayaṃ nāsti vāstavam |
ajñānādbhāti yatredaṃ so'hamasmi nirañjanaḥ || 15 ||
[Analyze grammar]

dvaitamūlamaho duḥkhaṃ nānyattasyā'sti bheṣajam |
dṛśyametanmṛṣā sarvameko'haṃ cidraso'malaḥ || 16 ||
[Analyze grammar]

bodhamātro'hamajñānādupādhiḥ kalpito mayā |
evaṃ vimṛśato nityaṃ nirvikalpe sthitirmama || 17 ||
[Analyze grammar]

aho mayi sthitaṃ viśvaṃ vastuto na mayi sthitam |
na me bandho'sti mokṣo vā bhrāntiḥ śāntā nirāśrayā || 18 ||
[Analyze grammar]

saśarīramidaṃ viśvaṃ na kiñciditi niścitam |
śuddhacinmātra ātmā ca tatkasminkalpanādhunā || 19 ||
[Analyze grammar]

śarīraṃ svarganarakau bandhamokṣau bhayaṃ tathā |
kalpanāmātramevaitatkiṃ me kāryaṃ cidātmanaḥ || 20 ||
[Analyze grammar]

aho janasamūhe'pi na dvaitaṃ paśyato mama |
araṇyamiva saṃvṛttaṃ kva ratiṃ karavāṇyaham || 21 ||
[Analyze grammar]

nāhaṃ deho na me deho jīvo nāhamahaṃ hi cit |
ayameva hi me bandha āsīdyā jīvite spṛhā || 22 ||
[Analyze grammar]

aho bhuvanakallolairvicitrairdrāksamutthitam |
mayyanantamahāmbhodhau cittavāte samudyate || 23 ||
[Analyze grammar]

mayyanantamahāmbhodhau cittavāte praśāmyati |
abhāgyājjīvavaṇijo jagatpoto vinaśvaraḥ || 24 ||
[Analyze grammar]

mayyanantamahāmbhodhāvāścaryaṃ jīvavīcayaḥ |
udyanti ghnanti khelanti praviśanti svabhāvataḥ || 25 ||
[Analyze grammar]