Chapter 175

[English text for this chapter is available]

vrataparibhāṣā |
agniruvāca |
tithivārarkṣadivasamāsartvabdārkasaṅkrame |
nṛstrīvratādi vakṣyāmi vasiṣṭha śṛṇu tatkramāt || 1 ||
[Analyze grammar]

śāstrodito hi niyamo vrataṃ tacca tapo mataṃ |
niyamāstu viśeṣāstu vratasyaiva damādayaḥ || 2 ||
[Analyze grammar]

vrataṃ hi kartṛsantāpāttapa ityabhidhīyate |
indriyagrāmaniyamānniyamaścābhidhīyate || 3 ||
[Analyze grammar]

anagnayastu ye viprāsteṣāṃ śreyo'bhidhīyate |
vratopavāsaniyamairnānādānaistathā dvijaḥ || 4 ||
[Analyze grammar]

te syurdevādayaḥ prītā bhuktimuktipradāyakāḥ |
upāvṛttasya pāpebhyo yastu vāso guṇaiḥ saha || 5 ||
[Analyze grammar]

upavāsaḥ sa vijñeyaḥ sarvabhogavivarjitaḥ |
kāṃsyaṃ māṃsaṃ masūrañca caṇakaṃ koradūṣakaṃ || 6 ||
[Analyze grammar]

śākaṃ madhu parānnañca tyajedupavasan striyaṃ |
puṣpālaṅkāravastrāṇi dhūpagandhanulepanaṃ || 7 ||
[Analyze grammar]

upavāse na śasyanti dantadhāvanamañjanaṃ |
dantakāṣṭhaṃ pañcagavyaṃ kṛtvā prātarvratañcaret || 8 ||
[Analyze grammar]

asakṛjjalapānācca tāmbūlasya ca bhakṣaṇāt |
upavāsaḥ praduṣyeta divāsvapnācca maithunāt || 9 ||
[Analyze grammar]

kṣamā satyandayā dānaṃ śaucamindriyanigrahaḥ |
devapūjāgniharaṇaṃ santoṣo'steyameva ca || 10 ||
[Analyze grammar]

sarvavrateṣvayaṃ dharmaḥ sāmānyo daśadhā smṛtaḥ |
pavitrāṇi japeccaiva juhuyāccaiva śaktitaḥ || 11 ||
[Analyze grammar]

nityasnāyī mitāhāro gurudevadvijārcakaḥ |
kṣāraṃ kṣaudrañca lavaṇaṃ madhu māṃsāni varjayet || 12 ||
[Analyze grammar]

tilamudgādṛte śasyaṃ śasye godhūmakodravau |
cīnakaṃ devadhānyañca śamīdhānyaṃ tathaikṣavaṃ || 13 ||
[Analyze grammar]

śitadhānyaṃ tathā puṇyaṃ mūlaṃ kṣāragaṇaḥ smṛtaḥ |
vrīhiṣaṣṭikamudgāśca kalāyāḥ satilā yavāḥ || 14 ||
[Analyze grammar]

śyāmākāścaiva nīvārā godhūmādyā vrate hitāḥ |
kuṣmāṇḍālāvuvārtākūn pālaṅkīmpūtikāntyajet || 15 ||
[Analyze grammar]

carubhaikṣyaṃ śaktukaṇāḥ śākandadhi ghṛtaṃ payaḥ |
śyāmākaśālinīvārā yavakaṃ mūlataṇḍulaṃ || 16 ||
[Analyze grammar]

haviṣyaṃ vratanaktādāvagnikāryādike hitaṃ |
madhu māṃsaṃ vihāyānyadvrate vā hitamīritaṃ || 17 ||
[Analyze grammar]

tryahaṃ prātastryahaṃ sāyaṃ tryahamadyādayācitaṃ |
tryahamparañca nāśnīyātprājāpatyañcaran dvijaḥ || 18 ||
[Analyze grammar]

ekaikaṃ grāsamaśnīyāttryahāṇi trīṇi pūrvavat |
tryahañcopavasedantyamatikṛcchraṃ caran dvijaḥ || 19 ||
[Analyze grammar]

gomūtraṃ gomayaṃ kṣīraṃ dadhi sarpiḥ kuśodakaṃ |
ekarātropavāsaśca kṛcchraṃ śāntapanaṃ smṛtaṃ || 20 ||
[Analyze grammar]

pṛthakśāntapanadravyaiḥ ṣaḍahaḥ sopavāsakaḥ |
saptāhena tu kṛcchro'yaṃ mahāśāntapano'ghahā || 21 ||
[Analyze grammar]

dvādaśāhopavāsena parākaḥ sarvapāpahā |
mahāparākastriguṇastvayameva prakīrtitaḥ || 22 ||
[Analyze grammar]

paurṇamāsyāṃ pañcadaśagrāsyamāvāsyabhojanaḥ |
ekāpāye tato vṛddhau cāndrāyaṇamato'nyathā || 23 ||
[Analyze grammar]

kapilāgoḥ palaṃ mūtraṃ ardhāṅguṣṭhañca gomayaṃ |
kṣīraṃ saptapalandadyātdadhnaścaiva paladvayaṃ || 24 ||
[Analyze grammar]

ghṛtamekapalandadyātpalamekaṃ kuśodakaṃ |
gayatryā gṛhya gomūtraṃ gandhadvāreti gomayaṃ || 25 ||
[Analyze grammar]

āpyāyasveti ca kṣīraṃ dadhikrāvṇeti vai dadhi |
tejo'sīti tathā cājyaṃ devasyeti kuśodakaṃ || 26 ||
[Analyze grammar]

brahmakūrco bhavatyevaṃ āpo hiṣṭhetyṛcaṃ japet |
aghamarṣaṇasūktena saṃyojya praṇavena vā || 27 ||
[Analyze grammar]

pītvā sarvāghanirmukto viṣṇulokī hyupoṣitaḥ |
upavāsī sāyambhojī yatiḥ ṣaṣṭhātmakālavān || 28 ||
[Analyze grammar]

māṃsavarjī cāśvamedhī satyavādī divaṃ vrajet |
agnyādheyaṃ pratiṣṭhāñca yajñadānavratāni ca || 29 ||
[Analyze grammar]

devavratavṛṣotsargacūḍākaraṇamekhalāḥ |
māṅgalyamabhiṣekañca malamāse vivarjayet || 30 ||
[Analyze grammar]

darśāddarśastu cāndraḥ syāttriṃśāhaścaiva bhāvanaḥ |
māsaḥ saurastu saṅkrānternākṣatro bhavivartanāt || 31 ||
[Analyze grammar]

sauro māso vivāhādau yajñādau sāvanaḥ smṛtaḥ |
āvdhike pitṛkārye ca cāndro māsaḥ praśasyate || 32 ||
[Analyze grammar]

āṣāḍhīmavadhiṃ kṛtvā yaḥ syātpakṣastu pañcamaḥ |
kuryācchrāddhantatra raviḥ kanyāṃ gacchatu vā na vā || 33 ||
[Analyze grammar]

māsi saṃvatsare caiva tithidvaidhaṃ yadā bhavet |
tatrottarottamā jñeyā pūrvā tu syānmalimlucā || 34 ||
[Analyze grammar]

upoṣitavyaṃ nakṣatraṃ yenāstaṃ yāti bhāskaraḥ |
divā puṇyāstu tithayo rātrau naktavrate śubhāḥ || 35 ||
[Analyze grammar]

yugmāgnikṛtabhūtāni ṣaṇmunyorvasurandhrayoḥ |
rudreṇa dvādaśo yuktā caturdaśyātha pūrṇimā || 36 ||
[Analyze grammar]

pratipadā tvamāvāsyā tithyoryugmaṃ mahāphalaṃ |
etadvyastaṃ mahāghoraṃ hanti puṇyaṃ purākṛtaṃ || 37 ||
[Analyze grammar]

narendramantrivratināṃ vivāhopadravādiṣu |
sadyaḥ śaucaṃ samākhyātaṃ kāntārāpadi saṃṣadi || 38 ||
[Analyze grammar]

ārabdhadīrghatapasāṃ na rājā vratahā striyāḥ |
garbhiṇī sūtikā naktaṃ kumārī ca rajasvalā || 39 ||
[Analyze grammar]

yadāśuddhā tadānyena kārayeta kriyāḥ sadā |
krodhātpramādāllobhādvā vratabhaṅgo bhavedyadi || 40 ||
[Analyze grammar]

dinatrayaṃ na bhuññīta muṇḍanaṃ śiraso'tha vā |
asāmarthye vratakṛtau patnīṃ vā kārayetsutaṃ || 41 ||
[Analyze grammar]

sūtake mṛtake kārtyaṃ prārabdhaṃ pūjanojjhitaṃ |
vratasthaṃ mūrchitaṃ dugdhapānādyairuddharedguruḥ || 42 ||
[Analyze grammar]

aṣtau tānyavrataghnāni āpo mūlaṃ phalaṃ payaḥ |
havirbrāhmaṇakāmyā ca gurorvacanamauṣadhaṃ || 43 ||
[Analyze grammar]

kīrtisantatividyādisaubhāgyārogyavṛddhaye |
nairmalyabhuktimuktyarthaṃ kurve vratapate vrataṃ || 44 ||
[Analyze grammar]

idaṃ vrataṃ mayā śreṣṭhaṃ gṛhītaṃ puratastava |
nirvighnāṃ siddhimāyātu tvatprasādātjagatpate || 45 ||
[Analyze grammar]

gṛhīte'smin vratavare yadyapūrṇe mriye hyahaṃ |
tatsarvaṃ pūrṇamevāstu prasanne tvayi satpatau || 46 ||
[Analyze grammar]

vratamūrtiṃ jagadbhūtiṃ maṇḍale sarvasiddhaye |
āvahaye namastubhyaṃ sannidhībhava keśava || 47 ||
[Analyze grammar]

manasā kalpitairbhaktyā pañcagavyairjalaiḥ śubhaiḥ |
pañcāmṛtaiḥ snāpayāmi tvaṃ me ca bhava pāpahā || 48 ||
[Analyze grammar]

gandhapuṣpodakairyuktamarghyamarghyapate śubhaṃ |
gṛhāṇa pādyamācāmamarghyārhaṅkuru māṃ sadā || 49 ||
[Analyze grammar]

vastraṃ vastrapate puṇyaṃ gṛhāṇa kuru māṃ sadā |
bhūṣaṇādyaiḥ suvastrādyaiśchāditaṃ vratasatpate || 50 ||
[Analyze grammar]

sugandhigandhaṃ vimalaṃ gandhamūrte gṛhāṇa vai |
pāpagandhavihīnaṃ māṃ kuru tvaṃ hi sugandhikaṃ || 51 ||
[Analyze grammar]

puṣpaṃ gṛhāṇa puṣpādipūrṇa māṃ kuru sarvadā |
puṣpagandhaṃ suvimalaṃ āyurārogyavṛddhaye || 52 ||
[Analyze grammar]

daśāṅgaṃ guggulughṛtayuktaṃ dhūpaṃ gṛhāṇa vai |
sadhūpa dhūpita māṃ tvaṃ kuru dhūpitasatpate || 53 ||
[Analyze grammar]

dīpamūrdhaśikhaṃ dīptaṃ gṛhāṇākhilabhāsakaṃ |
dīpamūrte prakāśāḍhyaṃ sarvadordhvagatiṃ kuru || 54 ||
[Analyze grammar]

annādikañca naivedyaṃ gṛhāṇānnādi satpate |
annādipūrṇaṃ kuru māmannadaṃ sarvadāyakaṃ || 55 ||
[Analyze grammar]

mantrahīnaṃ kriyāhīnaṃ bhaktihīnaṃ mayā prabho |
yatpūjitaṃ vratapate paripūrṇantadasu me || 56 ||
[Analyze grammar]

dharmaṃ dehi dhanaṃ dehi saubhāgyaṃ guṇasantatiṃ |
kīrtiṃ vidyāṃ dehi cāyuḥ svargaṃ mokṣañca dehi me || |
imāṃ pūjāṃ vratapate gṛhītvā vraja sāmprataṃ |
punarāgamanāyaiva varadānāya vai prabho || 58 ||
[Analyze grammar]

snātvā vratavatā sarvavrateṣu vratamūrtayaḥ |
pūjyāḥ suvarṇajāstā vai śaktyā vai bhūmiśāyinā || 59 ||
[Analyze grammar]

japo homaśca sāmānyavratānte dānameva ca |
caturviṃśā dvādaśa vā pañca vā traya ekakaḥ || 60 ||
[Analyze grammar]

viprāḥ prapūjyā guravo bhojyāḥ śaktyā tu dakṣiṇā |
deyā gāvaḥ suvarṇādyāḥ pādukopānahau pṛthak || 61 ||
[Analyze grammar]

jalapātrañcānnapātramṛttikācchatramāsanaṃ |
śayyā vastrayugaṃ kumbhāḥ paribhāṣeyamīritā || 62 ||
[Analyze grammar]