Chapter 14

tato mārabalaṃ jitvā dhairyeṇa ca śamena ca |
paramārthaṃ vijijñāsuḥ sa dadhyau dhyānakovidaḥ || 1 ||
[Analyze grammar]

sarveṣu dhyānavidhiṣu prāpya caiśvaryamuttamam |
sasmāra prathame yāme pūrvajanmaparamparām || 2 ||
[Analyze grammar]

amutrāhamayaṃ nāma cyutastasmādihāgataḥ |
iti janmasahasrāṇi sasmārānubhavanniva || 3 ||
[Analyze grammar]

smṛtvā janma ca mṛtyuṃ ca tāsu tāsūpapattiṣu |
tataḥ sattveṣu kāruṇyaṃ cakāra karuṇātmakaḥ || 4 ||
[Analyze grammar]

kṛtveha svajanotsargaṃ punaranyatra ca kriyāḥ |
atrāṇaḥ khalu loko 'yaṃ paribhramati cakravat || 5 ||
[Analyze grammar]

ityevaṃ smaratastasya babhūva niyatātmanaḥ |
kadalīgarbhaniḥsāraḥ saṃsāra iti niścayaḥ || 6 ||
[Analyze grammar]

dvitīye tvāgate yāme so 'dvitīyaparākramaḥ |
divyaṃ cakṣuḥ paraṃ lebhe sarvacakṣuṣmatāṃ varaḥ || 7 ||
[Analyze grammar]

tatastena sa divyena pariśuddhena cakṣuṣā |
dadarśa nikhilaṃ lokamādarśa iva nirmale || 8 ||
[Analyze grammar]

sattvānāṃ paśyatastasya nikṛṣṭotkṛṣṭakarmaṇām |
pracyutiṃ copapattiṃ ca vavṛdhe karuṇātmatā || 9 ||
[Analyze grammar]

ime duṣkṛtakarmāṇaḥ prāṇino yānti durgatim |
ime 'nye śubhakarmāṇaḥ pratiṣṭhante tripiṣṭape || 10 ||
[Analyze grammar]

upapannāḥ pratibhaye narake bhṛśadāruṇe |
amī duḥkhairbahuvidhaiḥ pīḍyante kṛpaṇaṃ vata || 11 ||
[Analyze grammar]

pāyyante kvathitaṃ kecidagnivarṇamayorasam |
āropyante ruvanto 'nye niṣṭaptastambhamāyasam || 12 ||
[Analyze grammar]

pacyante piṣṭavatkecidayaskumbhīṣvavāṅmukhāḥ |
dahyante karuṇaṃ keciddīpteṣvaṅgārarāśiṣu || 13 ||
[Analyze grammar]

kecittīkṣṇairayodaṃṣṭrairbhakṣyante dāruṇaiḥ śvabhiḥ |
keciddhṛṣṭairayastuṇḍairvāyasairāyasairiva || 14 ||
[Analyze grammar]

keciddāhapariśrāntāḥ śītacchāyābhikāṅkṣiṇaḥ |
asipatraṃ vanaṃ nīlaṃ baddhā iva viśantyamī || 15 ||
[Analyze grammar]

pāṭyante dāruvat kecitkuṭhārairbahubāhavaḥ |
duḥkhe 'pi na vipadyante karmabhirdhāritāsavaḥ || 16 ||
[Analyze grammar]

sukhaṃ syāditi yatkarma kṛtaṃ duḥkhanivṛttaye |
phalaṃ tasyedamavaśairduḥkhamevopabhujyate || 17 ||
[Analyze grammar]

sukhārthamaśubhaṃ kṛtvā ya ete bhṛśaduḥkhitāḥ |
āsvādaḥ sa kimeteṣāṃ karoti sukhamaṇvapi || 18 ||
[Analyze grammar]

hasadbhiryatkṛtaṃ karma kaluṣaṃ kaluṣātmabhiḥ |
etatpariṇate kāle krośadbhiranubhūyate || 19 ||
[Analyze grammar]

yadyeva pāpakarmāṇaḥ paśyeyuḥ karmaṇāṃ phalam |
vameyuruṣṇarudhiraṃ marmasvabhihatā iva || 20 ||
[Analyze grammar]

śārīrebhyo 'pi duḥkhebhyo nārakebhyo manasvinaḥ |
anāryaiḥ saha saṃvāso mama kṛcchratamo mataḥ || 21 ||
[Analyze grammar]

ime 'nye karmabhiścitraiścittavispandasambhavaiḥ |
tiryagyonau vicitrāyāmupapannāstapasvinaḥ || 22 ||
[Analyze grammar]

māṃsatvagbāladantārthaṃ vairādapi madādapi |
hanyante kṛpaṇā yatra bandhūnāṃ paśyatāmapi || 23 ||
[Analyze grammar]

aśaknuvanto 'pyavaśāḥ kṣuttarṣaśramapīḍitāḥ |
go 'śvabhūtāśca vāhyante pratodakṣatamūrtayaḥ || 24 ||
[Analyze grammar]

vāhyante gajabhūtāśca balīyāṃso 'pi durbalaiḥ |
aṅkuśakliṣṭamūrdhānastāḍitāḥ pādapārṣṇibhiḥ || 25 ||
[Analyze grammar]

satsvapyanyeṣu duḥkheṣu duḥkhaṃ yatra viśeṣataḥ |
parasparavirodhācca parādhīnatayaiva ca || 26 ||
[Analyze grammar]

khasthāḥ khasthairhi bādhyante jalasthā jalacāribhiḥ |
sthalasthāḥ sthalasaṃsthaistu prāpyante cetaretaraiḥ || 27 ||
[Analyze grammar]

upapannāstathā ceme mātsaryākrāntacetasaḥ |
pitṛloke nirāloke kṛpaṇaṃ bhuñjate phalam || 28 ||
[Analyze grammar]

sūcīchidropamamukhāḥ parvatopamakukṣayaḥ |
kṣuttarṣajanitairduḥkhaiḥ pīḍyante duḥkhabhāginaḥ || 29 ||
[Analyze grammar]

puruṣo yadi jānīta mātsaryasyedṛśaṃ phalam |
sarvathā śivivaddadyāccharīrāvayavānapi || 30 ||
[Analyze grammar]

āśayā samabhikrāntā ghāryamāṇāḥ svakarmabhiḥ |
labhante na hyamī bhoktuṃ pravṛddhānyaśucīnyapi || 31 ||
[Analyze grammar]

ime 'nye narakaṃ prāpya garbhasañjñe 'śucihrade |
upapannā manuṣyeṣu duḥkhamarchanti jantavaḥ || 32 ||
[Analyze grammar]